2 Kɔrintioanɛ 2 - ONUGBÙ NYƐNYÃ VUVƆ

¹ Kɛlɛso ɛbhɛtɛ nɛ́ mɛ́ kɛtɔkpu mɛ sɛ ɛtɛa ba wunɔ kɔ nɛ ishui mɛ pupɔɛ.

² Alasɛ onugɛ ɛkpɛ nɔ ishui mɛ pupɔɛ, ane yɛ aka lɛ gɛ aba kpɛ mɛ same pɔ wunɔ gɛ ɛkpɛ ishu mɛ pupɔɛ?

³ Ɛŋlɔmɛ keplukpa anasɛ gɛ ɛbhɛtɛ sɛ tɛ kibe nɔ nɛ gɛ ɛba tɛ ba mɔ butɔ denɔ ba gɛ ba ta kpɛ mɛ same nɔ kɔ. Ɛyɛkɛ wunɔ petee abhaŋa sɛ wunɔ petee nɔ bɔ mɔ same nɛ mɛ.

⁴ Alasɛ ɛŋlɔmɛ kɔ nɔ nɛ ishu mɛ pupɔɛ anɛ butɔ denɔ idzyi mɛ nɛ ɛwɔ̃mɛ gelee, ganɛ sɛ tɛ kpɛ nɔ obulo pɔ sɛ tɛ ɛkɔ nɔ mɔ tɛdzudzu mɛ kɔ wɔnɔ tɛdɛdɛmɛnɔ.

Tɛtsyitsye Kɔ Buizizi Elete

⁵ Onugɛ anɔ teli akɔ ishu mɛ pupɔɛ, adɛ kɔ mɛ ishu mɛ pupɔɛ gelee ana anasɛ gɛ akɔ nɔ ishu mɛ pupɔɛ nɔ petee, kɔ kapɛ tɛeli—ganɛ sɛ tɛ nɔ yɛkɔɛ lɛ gɛganɛ fanɔ.

⁶ Batɔtɛtɛta nɛ gɛ ba kɔ yɛ denɔ banɔ kapɛ gbɛgbla nɔ kɔ kɛ kpe kɔ yɛ.

⁷ Ɔtsɔ̃ nɛlɛɔzakɔ, alasɛ tɛ nɔ yɛkɔ tsye klɛ tɛ nɔ yɔ yɛ dzyi, sɛ tɛ atɛ ba yɛkɔ ishutsitsi kpãwũkpãwũ atrɔ shu.

⁸ Kɛlɛso, ɛkpɛtɔkpuesi kɔ nɔ, tɛ nɔ kɔ lɔ ti wunɔ tɛdɛdɛmɛnɔ nɛ yɛ.

⁹ Kɛbui nɔ nɛ so gɛ ɛŋlɔmɛ sɛsɛ nɔ kɛlɛ nu sɛ tɛ ɛmɔ onugɛ nɔ bɔ ŋa tɛfifekedi nɛ abha klɛ nɔ bɔ tatɔ nɛ́ ebui petee mɛ.

¹⁰ Onugɛ nɔ yɛkɔ kibui otsye anɔteli, mɛ tsyɛ ɛyɛkɔ tsye yɛ. Klɛ kɛgɛ ɛyɛkɔ tsye—onugɛ kɛdɔ tili za sɛ ba yɛkɔ tsye—ɛyɛkɔ tsye nɛ Kristo amɛ anɛ́ wunɔɛ tɔkpu,

¹¹ sɛ tɛ Satana atɛ ba ŋa bulɔ abha. Alasɛ bu nyi yɛ bushɛwuwa.

Onugbunyɛnya Vuvɔ Axwɛwa

¹² Ɔtsɔnɛ gɛ ɛvɛ Troasɛ tɛ ɛɖɔ Kristo bui dzyɔgo klɛ ɛmɔ sɛ Apalete adanɛ kidzo kɔ mɛ,

¹³ Ɔbɔ nanɔ nɛ ɔtsɔ̃ ɛkamɔ ishu mɛ yuyɔ, alasɛ ɛdɛ mɔ madzya Tito nɛ ɔkɛlɛ. Kɛlɛso itsre alɛ sɛ ba za mɔmɔ klɛ ɛshɛ vɛ Makedonia.

¹⁴ Pɔ ahwɛhuhu yɛ nu Kpaya ayɛ, gɛ agbanɔ lɔ kibenyɛbe nɛ Kristo kabhaŋɛŋa kidzogɛga mɛ klɛ ɔganɔ bulɔ abha Kristo tɛ lɛlɔ̃ huhuhu kɔ yɛ kibuititi kana ɔkɔnyɔkɔ.

¹⁵ Alasɛ bu nu Kristo bubɔhuhu kɔ Kpaya gɛ bu lɛ bagɛ bayɛkɛkɔ anɛ bagɛ ba lɛla nɛ shi.

¹⁶ Kɔ bagɛ be lũku butsi, kɔ abhlatɔ, tɛlũku huhuhu ɛkpã. Klɛ ane ya lɛ gɛ aba bhɛtɛ ebuia nɛ?

¹⁷ Bulɔ bu tɛ dzi anasɛ banɔ gelee, bu tɛ yɛkɔ Kpaya buiɖɛɖɔ akpɛ anasɛ kedzigɛga sɛ tɛ bu mɔ trɔ. Kɛlɛlɛ nɛede, nɛ Kristoe mɛ bu ɖɔaɖɔ nɛ Kpaya amɛ anɛ kɛdzyɔgo bhɛbhɛtɛ, anasɛ banɔ gɛ ba kpɛ denɔ Kpaya kɔ.