2 Kɔrintioanɛ 12 - ONUGBÙ NYƐNYÃ VUVƆ

Paolo Kɛdɔmumɔ Anɛ Yɛ Kiwui

¹ Ɛba ɛvɛ lɛabha zɛ fekeshu. Kɛlɛlɛmɛ sɛ kɛdɔnyɛdɔ ma gɛ ɛba mɔ trɔ, ɛba vɛ lɛabha tɛ ɛmɔ klɛ tɛ ibukasɛ denɔ Apalete nɔ kɔ.

² Inyi anɔ teli gɛ alɛ Kristo mɛ gɛ nɛ agɔ lɔfɔntalɛ̃ gɛ aba fla mɛ ede tsoku owũsise ɔtramɛ nɛ mɛ. Tɛ aza ishuidzya mɛ ɔdɔgɔsɛ ekoeyi ishuidzya mɛ o iti nyi--Kpaya yɛ enyi.

³ Klɛ ɛnyi sɛ anɔ anɛ, ishuidzya mɛ pɛnɔ ishuidzya nɛede ɛtɛ nyi, pɔ Kpaya enyi—

⁴ bɛ vu yɛ avɛnɔ kabha nɛ paradiso. Enu ebui nɛ gɛ lamaɖɔkɔ, ebui gɛ ba dɛ kɔɛ dzo sɛ tɛ anɔ aɖɔ.

⁵ Ɛba fekeshu nɛ̀ anɔ anɛ di, pɔ mɛnahwɛ ɛtɛ ba fekeshu, ɔdɛ sɛ mɛ tɛbubotso shu.

⁶ Onugɛ ɛba yɛkɔ sɛ tɛ ɛfekeshu tsyɛ, ɛtɛ ba dzi agã, alasɛ ba zɛɖɔ kɛbui gbɛagba. Pɔ ɛba zukɔlɔ, sɛ tɛ anɔnyanɔ atɛ ba yɛkɔ mɛ sɛ ɛɖama dɛ gɛ ba kɔɛdzo nɛ kɛgɛ ɛbhɛtɛ pɛnɔ kɛ gɛ ɛɖɔ.

⁷ Tɛ be bu mɛ edenɔ bugbɛgbla nɛ mɛ alasɛ ebui bubukasɛ gbɛgbla gɛ ɛmɔ, ɔkɛlɛ la kɔ mɛ ewui nɛ mɛ shuidzya mɛ, Satana axwɛdɛ tɛ etu mɛ.

⁸ Atɛ tata mɛ kpɛ kɛtɔkpuesi kɔ Apalete sɛ tɛ ebui lɛ ekoeyinɔ nɛ mɛ mɛ.

⁹ Pɔ aɖɔ tsre mɛ sɛ, “Mɛ ɛyamyuyɔ kpe kɔ nɔ, alasɛ ba bhɛtɛ mɛ kemi nɛ kana nɛ́ tɛbubotsoe mɛ.” Kɛlɛso ɛba fekeshu gelee dɛa na gɛ ɛba mɔ same nɛ mɛ tɛbubotso shu, sɛ tɛ Kristo bupu nɛ za mɛabha.

¹⁰ Kɛlɛ nu sɛ, alasɛ Kristo so ɛdɛmɛ nɛ tɛbubotso, tɛkukula, butɔ mumɔ, tɛ kpɛkpatɔnɔ, nɛ ebui tɛtɛtrɔ anɔabha. Alasɛ kibe nɔ gɛ ebotso, kɛlɛ mɛ gɛganɛ.

Paulo Tɛyɛyɛkɔ Ebui Kɔ Kɔrintioanɛ

¹¹ Ɛkpɛ manahwɛ shu bugã, pɔ wunɔ gbanɛ mɛ ɔkpɛ lɛ mɛ. Wunɔ lɛ lɛkɔ sɛ tɛ nɔ kpɛ mɛ nɛabha alasɛ ɛdɛ nu agugɔɛ zhiesi kɔ “bagbɛgbladɛ-bakpɛkpɛ,” kɛlɛmɛ tsyɛ ɛdɛ nu kɛdɔnyɛdɔ.

¹² Kɛdɔ nɛ gɛ kɛ kasɛ sɛ akpɛkpɛ—kɛdɔmumɔ bhɛbhɛtɛ bi, anɛ̀ ebuiyinɔanɔ—ba bhɛtɛ nɛ wunɔɛ mɛ nɛ̀ tɛbhɛbhɛtɛ gbɛgbla.

¹³ Kɛlɛ nɔ lɛesi kɔ basɔlɛha bhlatɔ, kɛlɛmazɛ lɛ mɛ ɛtɛ ba dzi kituku kɔ nɔ? Yɛkɔ buzizi nɛ ɔtsye mɛ!

¹⁴ Ɔtsɔnɛ ɛbala sɛ tɛ ɛba wunɔ kɔ butramɛ, klɛ ɛtɛ ba dzi kituku kɔ nɔ, alasɛ kɛgɛ ɛpɛɛ kɛ dɛ nu wunɔ nahwɛmɛdɔ pɔ wunɔ. Nɛ alɛlɛ nɛede banɛvɔ ba ma sɛ tɛ ba bala kɛdɔ kɔ ba gɛ ba mɔ alɛ, pɔ ba gɛ bamɔ alɛ, ba lɛ alasɛ tɛ ba bala kɛdɔ kɔ ba le yi alɛ.

¹⁵ So same be kumɛ mɔmɔ sɛ ɛba tɛkɔ kɛdɔnyɛdɔ gɛ kɛlɛ mahwɛ klɛ nɛ kɛgɛ mɛ nahwɛ wa lɛ shuixwɛ. Onugɛ ɛdɛmɛ wunɔ bui mɔmɔ, nɔ bɔ dɛmɛ mɛbui bhliyi?

¹⁶ Nɔ kɔ lɛ za anasɛ gɛ kɛ ba za, ɛka dzi kituku kɔ nɔ. Pɔ, anasɛ bushɛ anɔ nɛ gɛ inu ivu nɔ!

¹⁷ Kɛlɛ lɛmɛ sɛ ɛzuru nɔ ganɔ banɔ nɛ gɛ ɛkpɛ nɛ wunɔ kɔ nɛabha?

¹⁸ Ɛkpɛ kɛtɔkpuesi kɔ Tito sɛ tɛ avɛ wunɔ kɔ klɛ ɛkpɛ bulɔ adzya plɛnɔ yɛ. Tito edi zru nɔ, ezru nɔ? Ganɛ ɔfufɔɛ torikpo lɛlɛ buyɛkɔ bhɛtɛ kɛdɔ nɔ klɛ bu ga kidzo trikpoe lɛlɛ nɛabha?

¹⁹ No bui tɔkpuimɛ kibenyɛbe sɛ bu wlãnkɛ bulɔnahwɛ shu kɔ nɔ? Bu ɖɔaɖɔ nɛ Kpaya amɛ anasɛ bagɛ ba lɛ nɛ Kristo, klɛ kɛdɔnyɛdɔ gɛ bu bhɛtɛ, mɛ ɔbhɛalɛ mɔ, wunɔ tɛ gɛganɛ so gɛ bu bhɛtɛ lɛ.

²⁰ Alasɛ isifu sɛ kibenɔ nɛ gɛ ɛba ɛtɛ ba mɔ nɔ anasɛ gɛ ɛpɛɛ sɛ tɛ nɔ za, klɛ nɔ tɛ bɔ mɔ mɛ anasɛ gɛ nɔ pɛɛ sɛ tɛ ɛza. Isifu sɛ ebla pɛpɛɛ, kabhawuwlãnkɛ, obulo gɛganɛ mumɔ, kɛdɔ wuwlãnkɛ, kɛdɔ kukula, aglɔ shuibui ɖɛɖɔ, ishu fifeke anɛ aglɔ shu zizi.

²¹ Kifu ku mɛ sɛ kibenɔ nɛ gɛ ɛzɛ ba mɛ Kpaya aba kɔ mɛ shuimɛyɔ nɛ wunɔ amɛ, klɛ ɛba mɔ obulo nɛ banɔ gelee gɛ babhɛtɛ ebuikpã bafla klɛ ba dɛ tsyinɛtɛmɛ nɛ balɛ buzizi nɛ mɛ, badzɛ ebuikpã bhɛbhɛtɛ anɛ ɛkpãzizi zɛza gɛ ba yɛkɔ ishu akpɛ lɛ mɛ.