2 Kɔrintioanɛ 10 - ONUGBÙ NYƐNYÃ VUVƆ

Paolo Awlãnkɛ Yɛ Axwɛwakɔ

¹ Kristo yɛ tɛyɛyɔ anɛ ishunyɛnyɛna, ibisi denɔ wunɔ kɔ—Mɛ, Paulo, gɛ mɛ “kɛwɔ̃ɛ ku” kibelɛlɛ gɛ bu tsya amɛ nɛ amɛ nɛ wunɔ, pɔ “ɛgɛganɛ” kibelɛlɛ gɛ ɛma!

² Ɛkpɛtɔkpuesi kɔ nɔ kɛbenɔ gɛ ɛbá, ɛtɛ ba za gɛganɛ anasɛ gɛ ɛpɛɛ sɛ tɛ ɛza nɛ banɔ teli shu gɛ ba yɛkɔ sɛ bɔ lɛ nɛ ɛkpã nɛ́ kanɔa nɛ tɛzɛza mɛ nu.

³ Alasɛ kɛlɛlɛmɛ sɛ bu lɛ nɛ kanɔ nɛ mɛ, bu dɛ bu keyu anasɛ gɛ kanɔ nɛ abhɛtɛ.

⁴ Buyutɛdɔ gɛ bɔ yɛkɔ ta buyu nɔ bu dɛ nu kanɔɛmɛ buyutɛdɔ. Nɛ kɛlɛmaza, Kpaya bupu lɛ balɛ ahwɛ gɛ ba bayɛkɔ ayɛɛ ɛgɛganɛ kɔ.

⁵ Bu yɛɛ kibuiwɛwlãkɛ nɛ kɛbhɛbhɛtɛ kanyaka gɛ kɛlɔɛtiti nɛ Kpaya shu, klɛ buvu kɛtɔkpu mɛ buinyɛbui akpɛ buvu sɛ tɛ babhɛtɛ lɛ kɔ batɔtata kɔ Kristo.

⁶ Klɛ bu ba za tɛ bɛbala mɛ kɔ batɔtɛtɛta kɔ bagɛ ba ta ta tɔ nɛ balɛ ebuibhɛbhɛtɛ shu, kibelɛlɛ nɛ gɛ batɔtɛta nɛ ana.

⁷ Nɔ di ebui nɛ kabhaɛdɔ kɔ ko. Onugɛ anɔteli ayɛkɛ shuabhaŋa sɛ Kristo ayɛ yɛ enu, alasɛ tɛ etsodzi avɛ ishu mɛ sɛ bunu Kristo ayɛ anasɛ gɛ enu.

⁸ Alasɛ tsyɛ onugɛ ɛfekeshu nɛ kibui tili shu wee denɔ kemi gɛ Apalete akɔ lɔ kɔ wunɔ tɛbhubhɔtrɔ dɛ sɛ tɛ ɛti yɛ ehuesi, Mɛ kɛwɔɛ̃ tɛbaku mɛ nɛ lɛ shu.

⁹ Ɛdɛ pɛɛ sɛ tɛ kɛkasɛ sɛ ɛpɛɛ sɛ tɛ ɛkpɛ nɔɛ fu nɛ̀ mɛ buplukpa wũŋlɔmɛ nɛ mɛ.

¹⁰ Alasɛ beteli baɖɔ sɛ, “Yɛ buplukpa nɛ lupu klɛ bu lɛ kemi, pɔ nɛ yɛnahwɛ enu agɛ adɛ gɛganɛ klɛ yɛ kaɖɔɖuɖɔ ke di nu kɛdɔnyɛdɔ.”

¹¹ Banɔ alɛ nɛɛ di be ti sɛ ebui nɛ gɛ buŋlɔmɛ kpɛ bulɔ buplukpa nɛ mɛ kibelɛlɛ nɛ gɛ bu ma bulɔ bu ba vɛ bulɔ ebui nɛabha kibenɔ nɛ gɛ bu lɛ.

¹² Bu dɛ pɛɛ sɛ tɛ bu kla shu pɛnɔ buyɛkɔ bulɔshu sɔnɔ beteli gɛ bakpɛ balɛshu nɛabha. Kibenɔ nɛ gɛ ba da balɛshu edi nɛ balɛshu klɛ ba yɛkɔ balɛshu asɔnɔ balɛshu, beti nyi bui.

¹³ Bulɔ, kidzidzii dzi lɛ dzi, butɛ ba fekeshu dɔfla kidzo dɛ kɛ lɛ gɛ kɛ lɛ, pɔ bu ba zhinɔ bulɔ ishufifeke nɛabha zɛ waɛxwɛ nɛ gɛ Kpaya akɔ lɔ, kɛxwɛ nɛ gɛ kɛ ku wunɔ ahwɛ tsyɛ.

¹⁴ Butɛ vɛ fanɔ nɛ bulɔ ishufifeke mɛ, anasɛ gɛ kɛ ba za onugɛ bu dɛ ba wɔnɔ kɔ, alasɛ bu yɛkɛ anasɛ gɛ nɔ lɛ Kristo kibui zyɔgo nɔ bha.

¹⁵ Ɔdɔgɔsɛ bu ga dɔflaɛdzo kɛ lɛ gɛ kɛ lɛ nɛ ishufifeke kɔ kɛxwɛ gɛ bhlatɔ bawa. Bulɔ kidzoenudidi kɛlɛ nu sɛ, anasɛ gɛ wunɔ tɛyɛyɛkɛŋa vɛlɛabha gɛ kɛ she, bulɔ axwɛwɛwa nɛ wɔnɔ mɛ laba nɛ atrɔ gelee,

¹⁶ sɛ tɛ buɖɔ kibui dzyɔgo kpɛ ɛma gɛ lɛ lɛ wunɔ bha. Alasɛ bu dɛ pɛɛ sɛ tɛ bu fekeshu nɛ axwɛ nɛ gɛ la tɛ wa nɛ anɔ bhlatɔ ɔzakɔ.

¹⁷ Pɔ “Nɔ kɔ agɛ efekɛshu efekeshu nɛ Apalete nɛ mɛ.”

¹⁸ Alasɛ ganɛ anɔ nɛ gɛ akpɛ yɛ shu nɛabha yɛ abha la trɔahwɛ, pɔ anɔ nɛ gɛ Apalete akpɛ nɛabha.