2 Kɔrintioanɛ 1 - ONUGBÙ NYƐNYÃ VUVƆ

¹ Mɛ Paolo, Kristo Yesu anɔkpɛkpɛ nɛ́ Kpaya tɛpɛpɛɛ nu, Timotio bulɔ adzya. Kɔ Kpaya busɔlɛɔha nɛ́ Kɔrintio, ɔyɛkɔ plɛnɔ kpayabanɔ nɛ petee ganɔ Akasia:

² Kɛdɔkukɔ anɛ ishuyuyɔ denɔ Kpaya bulɔ Aka anɛ̀ Apalete Yesu Kristo akɔ kɔ nɔ.

Ɛyɛmɛyuyɔ Petee Kpaya

³ Kabhakpɛkpɛ kɔ Kpaya anɛ Aka bulɔ Apalete Yesu Kristo, eshutukubui didi Aka nɛ ɛyamyuyɔ petee Kpaya,

⁴ agɛ akɔ lɔ ɛyamyuyɔ anɛ́ bulɔ tɛtɛtrɔ petee abha, sɛ tɛ bu bana ɛyamyuyɔ kɔ bagɛ ba lɛ tɛtɛtrɔ tili mɛ nɛ̀ ɛyamyuyɔ nɛ gɛ bulɔnahwɛ bu yɛkɛ denɔ Kpaya ɔkɔ.

⁵ Alasɛ anasɛ gɛ Kristo butɔ nɛ kpɛ ku bulɔ ɛkpã mɛ, kanake ganɔ Kristo abha bulɔ ɛyamyuyɔ yukugbɛgba.

⁶ Onugɛ ebui atrɔ bulɔ abha, la lɛ kɔ nɔ ɛyamyuyɔ anɛ tɛyɛyɛkɛkɔ, onugɛ bulɔ ɛyamyuyɔ, kɛ kɔ nɔ ɛyamyuyɔ, gɛ kɛ kɔ nɔ tɛdɛdɔfɔ̃ awɔ̃dzudzu anɛ butɔ lɛlɛ nɛ gɛ bulɔ bumɔ.

⁷ Klɛ bulɔ kidzoenudidi kɔ nɔ kɛ lɛ gɛganɛ, alasɛ bu nyi sɛ anasɛ gɛ nɔ yɛkɔ ebui nɛ bulɔ butɔ nɛ mɛ, kanakɛ nɔ yɛkɔ ebui nɛ bulɔ ɛyamyuyɔ nɛ mɛ.

⁸ Bu dɛ pɛɛ sɛ tɛ nɔ za matimati mɛ, badzya, denɔ butɔ nɛ gɛ bu mɔ nɛ Asia ɛma nɛ mɛ. Bu za ebui gɛganɛ gɛ atrɔ bulɔa bha, gɛ bu tɛ ba na alɛ nu za, gɛ kɔ sɛ kidzoenu didi dɛ za bulɔ ɛkpã.

⁹ Kɛgbɛagba, nɛ bulɔ idzyi mɛ bu mɔɛlɛ sɛ be bhui butsi pɔ kɔ lɔ. Pɔ kɛnɛ kɛbɛlɛmɛ sɛ bulɔ nahwɛ bu tɛ bayɛkɛ ishuabhaŋa pɔ nɛ Kpaya abha, agɛ yɛ anyɛmɛ betsitsi.

¹⁰ Ebhui lɔ ayɛkɛ denɔ butsi tsutsɔmɔ nɛ di mɛ, klɛ aza be bhui lɔ ayɛkɛ. Nɛ yɛ abha bu yɛ kɔ bulɔɛ dzoenudidi nɛ trɔ sɛ aba za lɛabha aza be bhui lɔ ayɛkɛ,

¹¹ anasɛ gɛ nɔ plɛnɔ lɔ nɛ wunɔ kpayakuklu mɛ. Ɔkɛlɛ be gelee ba be hu ahwɛ nɛ bulɔɛ tɔkpu kɔ tɛpɛplɛnɔ kɛdɔkukɔ gɛ akɔ lɔ nɛ́ ebuiesibubu kɔ be gelee kpayakuklu.

Paulo Yɛ Ebui Tsyitsyina

¹² Ɔtsɔ̃nɛ kɛnɛ kɛlɛ nu bulɔ ishufifeke: Bulɔ tɔkpuimɛ tsre lɔ sɛ bu nyɛna shu nɛ kanɔ nɛ mɛ, klɛ ɔyɛkɔdɛana terikpo bhɛbhɛtɛ nɛ nɔ, nɛ tɛbhubhui anɛ kibui gbɛgbla bhɛbhɛtɛ gɛ kide Kpaya kɔ. Bu bhɛtɛ kibui nɛ ana ganɛ nɛ kanɔmɛ kibuinyinyi shu pɔ nɛ Kpaya kɛdɔkukɔ shu.

¹³ Alasɛ bu dɛ ŋlɔmɛ kɛdɔnyɛdɔ gɛ nɔ tɛ bɔ na kla ɔdɔgɔsɛ onu kɛlɛesi. Klɛ idi kidzoenu sɛ,

¹⁴ anasɛ gɛ nɔ tɛ nu bulɔ esi nɛ kapɛ, nɔ bɔ ba bonu lɛesi petee sɛ nɔ bɔ na ishufeke nɛ bulɔ shu anasɛ gɛ bulɔ tsyɛ bu ba fekeshu nɛ wunɔ tɔkpu nɛ Apalete Yesu kiwui nɛabha.

¹⁵ Alasɛ ɛyɛkɛ kɛnɛ nɛabhaŋa, ɛtrɔ sɛ putɔnɔ ɛba ba wunɔ kɔ sɛ tɛ nɔ bɔ mɔ kedɔ trɔ amɔtabha.

¹⁶ Ɛtrɔ sɛ tɛ ɛba wunɔ kɔ nɛ mɛ kidzogɛga vɛ Makedonia klɛ tɛ ɛtsodzi ba wunɔ kɔ gɛ ide Makadonia, klɛ kɛlɛede tɛ nɔ plɛnɔ mɛ tɛ ɛga kidzo vɛ Yuɖea.

¹⁷ Gɛ ɛtrɔ kibui nɛ, ɛbhɛtɛ lɛ fukaa? Pɔ nɔ bhɛtɛ mɛ tɛtɛtrɔ nɛ kanɔ mɛ kɛdɔbhɛbhɛtɛ sɛ tɛ nɛ tɛfufɔɛ lɛlɛ mɛ ɛɖɔ sɛ, “Ee, ee” klɛ “Oo, oo”?

¹⁸ Pɔ kɛgbɛagba anasɛ gɛ Kpaya tɛyɛyɛkɛŋa lɛ, bulɔ ɔklasɔ kɔ nɔ kɛ dɛ nu sɛ “Ee,” anɛ “Oo.”

¹⁹ Alasɛ Kpaya yɛ Yi, Yesu Kristo, gɛ yɛ bui mɛ nɛ Silas anɛ Timotio bu ɖɔ nɛ wunɔ shi, kɛ dɛ nu “Ee” nɛ “Oo,” pɔ nɛ yɛ mɛ kɛbenyɛbe kɛnu “Ee.”

²⁰ Alasɛ kɛbuinyɛbui dɛ ba dzi ebui tɛtrɔ gelee gɛ Kpaya abhɛtɛ, lɛ nu “Ee” nɛ Kristo mɛ. Kɛlɛ so ganɔ yɛa bha “Tɛkɛbɛlɛm” bu ɖɔ yɛ kɔ Kpaya nɛ tɛkpɛkpɛ nɛa bha.

²¹ Ɔtsɔ̃nɛ Kpaya yɛ abhɛtɛ bulɔ editabha klɛ nɔ lɛ gɛganɛ nɛ́ Kristo mɛ. Yɛ abalɛ bubɔ nɛ bulɔ abha,

²² atsa yɛ kɛna kɔ lɔ sɛ bu nu yɛ ayɛ, klɛ akpɛ yɛ Ɔfufɔɛ Dzyɔgo nɛ bulɔ idzyi mɛ anasɛ kɛdɔ bɛbala, kedezɛza kɔ kɛgɛ ba ba.

²³ Ɛklu Kpaya anasɛ ebuimɔɖɔ sɛ kɛza kɛlɛɔzakɔ sɛ ɛshɛnahwɛ wunɔ shu lu sɛ ɛda tsodzi vɛ Kɔrinto.

²⁴ Ganɛ sɛ bu trɔ wunɔ tɛyɛyɛkɛŋa abha, pɔ bu wɛxwɛ nɛ nɔ kɔ wunɔ same, alasɛ tɛyɛyɛkɛŋa mɛ nɔ lɛ gɛganɛ.