1 Yohanɛsɛ 1 - ONUGBÙ NYƐNYÃ VUVƆ

Ɛkpã Shui Bui

¹ Kɛ gɛ de kesikpɛkpɛ nɛ mɛ, gɛ bu nu, gɛ bu mɔ nɛ bu lɔ awɔ̃hu, gɛ bu di klɛ bulɔ ɛhwɛ nɛ hunɔ—kɛnɛ bu buɖɔ denɔ ɛkpã Ebui shu.

² Ɛkpã ba koeyi, bumɔɛ lɛ klɛ buɖɔaɖɔ nɛ lɛ shu, klɛ bu bu ɛkpãmabeke ebui tsre nɔ, gɛ lɛza Aka nɔ bha klɛ lɛ ba koeyi kɔ lɔ.

³ Bu butsre nɔ kɛdɔ nɛ gɛ bu mɔ klɛ bu nu, sɛ tɛ wũnɔ tsyɛ nɔ za terikpo bhɛbhɛtɛmɛ nɛ lɔ. Klɛ bulɔ terikpo bhɛbhɛtɛ nɛ Aka anɛ̀ yɛ Eyianyɛ Yesu Kristo.

⁴ Bu ŋlɔmɛ kibui nɛ sɛ tɛ bulɔ same nɛ́ ana.

Tɛgɛga Nɛ Obhubhuikɔ

⁵ Kibui ɖɛɖɔɛ nɛ bu nu denɔ yɛ ɔkɔ klɛ bu butsre nɔ: Kpaya yɛ nu kifu, nɛ yɛ mɛ otumu kanyaka ɔma.

⁶ Onugɛ buɖɔ sɛ terikpo bhɛbhɛtɛ alɛ nɛ yɛmɛ pɔ bu ga nɛ otumumɛ, bu hu otro klɛ bu ma nɛ kibui gbɛagba abha.

⁷ Pɔ onugɛ bu ga nɛ obhubhuikɔ, anasɛ gɛ alɛ nɛ obhubhuikɔ, bu yɛkɛ terikpo bhɛbhɛtɛ nɛ ɔhaglɔ, klɛ ye Yianyɛ Yesu dzyosu, eplu buzizi petee bu nɛ bulɔ shu.

⁸ Onugɛ bu ɖɔ sɛ kizizi ma lɔ shu, bu wɔɛ bulɔnahwɛ shu klɛ kibuigbɛagba ma bulɔ ahwɛ.

⁹ Onugɛ bu bu bulɔ kizizi nɛ ɖɔ, yɛ nu ayɛyɛkɛŋa anɛ̀ anɛna, klɛ aba yɛkɔ bulɔ kizizi etsye klɛ ebe plu lɔ shu denɔ buzizi bhɛbhɛtɛ petee mɛ.

¹⁰ Onugɛ bu ɖɔ sɛ kibuizizi ma lɔ shu, bu ɖɔ nɛ ɔtɔ sɛ enu otro lete, klɛ yɛ ebui nɛ dɛ mɔ ɔzakɔ nɛ bulɔ ɛkpãɛ nɛ mɛ.