1 Timotio 6 - ONUGBÙ NYƐNYÃ VUVƆ

¹ Banɔ nɛ petee gɛ ba kpasɛ anɔdzidzi ɔkpakasie si alasɛ tɛ be di balɛ apaletealɛ nɛ ansɛ bana sɛ tɛ ba taa lɛ tɔ, sɛ tɛ Kpayaɛ nyi anɛ bulɔ kɛdɔkɛkasɛ nɛ shu zizi tɛ za.

² Bagɛ balɛ apaletealɛ nɛ nu banɔ gɛ ba yɛkɛ aŋa, kɛ ma sɛ tɛ ba kɔa lɛ bubu bhli, alasɛ be nu badzya. Nɛ kɛlɛ mɛ, kɛlɛ sɛ ba dɛ balɛ axwɛ nɛ mɔmɔ adɛa na, alasɛ bagɛ balɛ amɔ kɛdzyɔgo edenɔ balɛ axwɛdɛdɛ nɛ mɛ nɛ nu banɔ gɛ bayɛkɛaŋa, klɛ ba lɛ balɛ idzyi shu. Ebuia nɛɛdi ala lɛ sɛ tɛ nɔ kasɛ tɛ nɔ yɛkɔ olua lɛ amɛ.

Ehoeyi Ɖuɖɔ

³ Onu gɛ anɔ teli aakasɛ otro ebui klɛ adɛ dɛmɛ atrɔ bulɔ Apalete Yesu Kristo kɛdɔkɛkasɛ nɛ gɛ na anɛ kpayamzɛza kɛdɔkɛkasɛ,

⁴ enu anɔ gɛ eku ishu awɔ̃ klɛ etee nu kibuinyɛbuie si. Tɛpɛpɛ gɛ ma mɔmɔ lɛ yɛahwɛ nɛ ebui wɛ̃wlãnkɛ mɛ klɛ apɛɛ ebla nɛ ebuiɖuɖɔ gɛ kawɔ̃kpɛ ede koeyi nɛ alɛ mɛ, ebla, anɔshuzizia ɖɔ, kɛtɔkpumɛ kpã bhɛbhɛtɛ

⁵ anɛ ebui tsɛtsrakɛ kibenyɛbe nɛ banɔ atɔkpum zizi elete, gɛ ba nyɛna kɛgba nɛ ezuru nɛ balɛ ahwɛ klɛ ba bhɛtɛ kɛtɔkpum sɛ kpayamzɛza nɛ enu kidzoenu kɔ ehoeyi dɔ mumɔ.

⁶ Pɔ kpayamzɛza exui wɔ kinu kɛdɔmumɔ pim.

⁷ Alasɛ bu dɛ mɛna kɛdɔnyɛdɔ nɛ kanɔa nɛ mɛ, klɛ bu tɛ ba na kɛdɔnyɛdɔ yɛkɔ nɛ kalɛ mɛ shɛnɔ.

⁸ Pɔ onu gɛ kɛŋɛŋa anɛ kɛdɔ nyunyumu lɛ bulɔ ahwɛ, kɛ ba xui lɔ.

⁹ Banɔ nɛ gɛ ba pɛa sɛ tɛ be dzi ehoeyielete ba wɔlɛ eku tɛfifeke di mɛ anɛ kɛgbam anɛ bugã gelee mɛ anɛ kɛdɔpɛpɛ gɛ zi dɔ pɛ kɛɛ gbanɔ banɔ da kpɛ butsyrɔ anɛ tɛbibeke mɛ.

¹⁰ Alasɛ ehoeyi ɖuɖɔ alɛ enu ogu kɔ butsutsɔmɔ kanyaka. Banɔ teli, nɛ ehoeyi pɛpɛɛ gɛganɛɛ mɛ, ba ba lɛla ashɛ alɔ tɛyɛyɛkɛŋa klɛ la yɛkɔ ishutsitsi gelee epu ishu vulovulo.

Paolo Ebui Kpɛkpɛahwɛ Kɔ Timotio

¹¹ Pɔ wɔ, Kpayanɔ, siɔshɛ lɔ anɛ nɛɛdi petee, klɛ tɛ ɔpɛɛ tɛnɛnamɛzɛza, kpayamzɛza, tɛyɛyɛkɛŋa, anɔɖuɖɔ, tɛzɛza gɛganɛɛ anɛ tɛdɛdɔfɔ̃.

¹² Gɔnɛ tɛyɛyɛkɛŋa tɛgugɔnɛ dzyɔgo. Nyɛna ɛkpã gɛ tɛ ba beke nɛm ovunɔ, ɛgɛ ɛlɛ mɛ le kulu wɔa kɔ, nɛ kibe lɛ gɛ ɔbhɛtɛ wɔ ishu mɛ dɛdanɛ dzyɔgo nɛ bebuimɔɖɔ gelee amɛ.

¹³ Nɛ Kpaya amɛ, gɛ akɔ kɛdɔnyɛdɔ ɛkpã, klɛ nɛ Kristo Yesu shu, yɛ nɛ kibe lɛ mɛ gɛ ebu ishu nu nɛ Pɔntio Pilatio amɛ pɛ abhɛtɛ ishum dɛdanɛ dzyɔgo, ɛyɛkɔ lu wɔnɔa mɛ sɛ

¹⁴ nɔ nyɛna ɔshã nɛm ovunɔ tɛ kibo ɔdɔgɔsɛ kɛpɔbubu tɛ za kɛlɛ mɛ ɔdɔnanɔ bulɔ Apalete Yesu Kristo tɛwɛ̃wɛ̃,

¹⁵ gɛ Kpaya aba mɛna nɛ yɛnahwɛ ɔɖɔm— Kpaya, agɛ ba yula klɛ agɛ yɛko Abhaŋa, Bekusi nɛ ekusi anɛ Apalete kɔ bakagbla,

¹⁶ gɛ yɛ ko yɛ enu agɛ etee tsi klɛ akpasɛ kifu gɛ ba tɛ ba na hebunɔ mɛ, gɛ anɔnyanɔ aka mɔ edi ɔdɔgɔsɛ aba mɔ. Yɛ tɛkpɛkpɛ nɛa bha nɛ bupu lɛ kɔ ɔyɛkɔ vɛnɔ. Tɛlɛbɛlɛm.

¹⁷ Bu otsre behoeyielete nɛ kanɔa nɛ mɛ sɛ ba tɛ za nɛ butɔm gɛganɛ pɛ ɔdɔgɔsɛ ba yɛkɔ kidzoenudidi atrɔ balɛ kɛnɔmɛdɔ nɛa bha, gɛ ɔtɛ bɔ na awɔ̃ lu nɛ kɛlɛa bha, pɔ ba yɛkɔ balɛ kidzoenudidi nɛ atrɔ Kpaya bha, yɛ akɔlɔ kɛdɔnyɛdɔ gelee kɔ bulɔ same mumɔ.

¹⁸ Bu otsre alɛ sɛ ba bhɛtɛ kɛdzyɔgo, tɛ kibui dzyɔgo ehoeyi aza balɛ ahwɛ, tɛ ba pɛ̃ ɛyam tɛ ba dɛmɛ akɔ kɛdɔ.

¹⁹ Ganɔ kidzoe nɛa bha la ba bala kɛdɔ kɔshu ansɛ kesikpɛkpɛ gɛganɛ kɔ kibe nɛ gɛ ba, sɛ tɛ ɛkpã nɛ gɛ nu ɛkpã gbɛagba nɛ ku balɛ ahwɛ.

²⁰ Timotio, po kɛgɛ ba yɛkɔ akpɛ wɔahwɛ nɛ mɔmɔ. Tsodzi nɛ buɖɔmɛaɖɔɛ nɛ gɛ be tinyi Kpaya nɛ balɛ ebui nɛ gɛ alɔɛ titi gɛ bee hu itro ekulua sɛ kibuititi nɛe de,

²¹ gɛ kɛlɛ beteli atɛ ɖɔelu klɛ nɛ kɛlɛ bhɛbhɛtɛ mɛ ba tɛ lɛla ashɛ alɔ tɛyɛyɛkɛŋa. Eshutukubuididi aza plɛnɔ nɔ.