1 Timotio 5 - ONUGBÙ NYƐNYÃ VUVƆ

Tɛtsitsrenɔ Denɔ Banyɛtsi, Banɔshishe Anɛ Banɔdzidzi Shu

¹ Tɛ tsrenɔ anɔshishe anɛ kanya, pɔ ɖɔ kaɖɔ ɔkpɛ yɛ ɔkɔ ansɛ wɔaka. Yɛkɔ bayɛ̃sɔ ansɛ badzya,

² badzɛshishe ansɛ beni, bubite ansɛ bada, anɛ ishubhubhui gɛ kɛdɔnyɛdɔ dɛ gɔ.

³ Yɛkɔ awɔ̃vuvu mɔmɔ kɔ banyɛtsi nɛ gɛ ba lɛ asɛ ba kɔɛ dɔɛ kɛgbɛagba.

⁴ Pɔ onu gɛ beyi nɛ beshui alɛ anyɛtsi teli ahwɛ, balɛ alasɛ tɛ kpɛ otugba ba kpasɛ kana gɛ ba ba yɛkɔ balɛ busɔlɛ ebui nɛ akpɛ tɛbhɛbhɛtɛm ganɔ balɛ nahwɛ bupa nɛa bha didi mɛ, tɛ kidzi kɛbhɛ bubuya kɔ balɛ eni anɛ aka anɛ balɛ enishe anɛ bakashiealɛ, alasɛ kana mɛ bui kɛlɛ ku Kpaya awɔ̃.

⁵ Adzɛ gɛ etsianyɛ nɔɔ nɛ gɛ alɛ kɔ kɛdɔ kukɔ kɛgbɛagba flogo pɛ ba shɛ̃nahwɛ yɛ terikpo shue lu pɛ ayɛkɔ yɛ kidzoenudidi nɛ atrɔ Kpaya bha klɛ avɛlɛa bha elishi anɛ kemuze anɛ kpayakuklu tɛ ebisi Kpaya tɛpɛplɛnɔ.

⁶ Pɔ anyɛtsi nɔɔ nɛ gɛ alɛ kɔ same mumɔ ko eti tsi flogo pɛ alɛ.

⁷ Yɛkɔ tɛtsitsrenɔɛ nɛ tsyɛ ɔkɔ banɔ, sɛ tɛ anɔnyanɔ eti bu shu elu kɔ le be di yɛ amɛ nɛ buzizi.

⁸ Onu gɛ anɔ teli ataa bhɛtɛ kɛdɔnyɛdɔ akɔ yeletealɛ, klɛ ɔyɛkɔdɛ kɔ yɛ bupamanɛ gɛ be bunɔ yɛ kpɔ̃, enu anɔ gɛ ashɛ̃nahwɛ tɛyɛyɛkɛŋa nɛ shu klɛ atsɔmɔ dɛ anɔ nɛ gɛ adɛ yɛkɛaŋa.

⁹ Ba tɛ ba ŋlɔmɛ anyɛtsi kanyaka nyi akpɛ bagɛ etsianyɛ nɛ shi gɛ odinu sɛ eti she adɛ agɔ afɛtehlo, pɛ aza nɛ ɛkpã dzyɔgo nɛ yɛenyine,

¹⁰ klɛ be nyi yɛ mɔmɔ nɛ yɛ ebui dzyɔgo shu, ansɛ beyi nyunyunɔ, anɔkɔdidi, butsrukpɔ puplu kɔ banɔnɛna, tɛpɛplɛnɔ kukɔ bagɛ be ku butɔ mɛ klɛ ayɛkɔ yɛ shu akpɛ ebui dzyɔgo kanyaka tɛbhɛbhɛtɛ mɛ.

¹¹ Bagɛ tsianyɛ pɛ ke she nɛ xũ, nɔ tɛ yɛkɔ balɛ enyi ɔtrɔ beshishe nɛe plukpa bha. Alasɛ onu gɛ balɛ ishuidzya mɛ tɛpɛpɛ nɛɛ dɛ ishu tɛyɛyɛkɔ kɔ Kristo, ba pɛa sɛ tɛ ba zanɛ anyɛ.

¹² Ganɔ kɛlɛ mɛ be he kebhuikuklu amɛna balɛ nahwɛa bha, alasɛ ba tɛ da nɛ balɛ atabu tutɔpu nɛa bha.

¹³ Kɛɛlɛ nɛe de, be be tsoku ayekpɛkpɛ mɛ, klɛ la ba za nyɔkana nɛ bupaa nɛ mɛ avɛ bunɛ nɛ mɛ. Klɛ ganɛ sɛ be be dzi ba vuvɔ ko, pɔ be be dzi banɔ gɛ ba ɖɔ ɔhayɛ shuibui tsyɛ klɛ la ɖɔ ebui nɛ gɛ ama sɛ tɛ ba ɖɔ.

¹⁴ Kɛlɛ so, ɛɖɔaɖɔ kɔ banyɛtsi gɛ eke she sɛ ba zanɛ anyɛ, tɛ ba mɔ beyi, tɛ be di balɛ bapɛa bha sɛ tɛ ba tɛ kɔ agɛ ataa pɛalɛ bui nɛ kidzo tɛ ebe zi balɛ shu.

¹⁵ Nɛ kɛgba mɛ be teli ti tsyina alɛ Satana ede.

¹⁶ Onu gɛ adzɛ teli enu asɔlɛsɔlɛ pɛ banyɛtsi alɛ yɛ bupa mɛɛ, alasɛ tɛ akɔa lɛ tɛpɛplɛnɔ sɛ tɛ atɛ kɔ be dzi kitukua kɔ busɔlɛɔha, sɛ tɛ ɔha nɛ ba mɔ bagɛ balɛ alɛ kɔ sɛ ba bhɛtɛ kɛdɔ akɔ.

¹⁷ Ɔha Mɛ banɔshishe nɛ ga gbanɔ ɔha nɛ mɔmɔ ba na sɛ tɛ ba trɔ balɛ ɔkɔ didi nɛa bha, ɔyɛkɔdɛ bagɛ balɛ kɛxwɛ nɛ nu kaɖɔ ɖuɖɔ anɛ kɛdɔkɛkasɛ.

¹⁸ Alasɛ Kpayabui nɛ ɖɔ sɛ, “Tɛ nya nɛtsyuinye nɛ gɛ apuɛ amɔ nɛ onugbu,” klɛ “Axwɛwa alasɛ tɛ ayɛkɛ yɛ kɛbhɛ.”

¹⁹ Nɔ tɛ yɛkɛ bunubhubhui kanyaka gɛ ba yɛkɔ nɛ anɔshishe shu odinu sɛ bebuimɔɖɔ tɛabha ɔvɛnɔ tɛata balɛ amɛna kibui.

²⁰ Bagɛ bala bhɛtɛ ezi alasɛ tɛ ba tɛta balɛ batɔ nɛ ɔtɔ, sɛ tɛ bagɔgɔɛ na kpasɛ kibui nɛ kɛlɛ mɛ.

²¹ Ibisi denɔ wɔnɔ ahwɛ mɛ, nɛ Kpaya anɛ Kristo Yesu anɛ kpayaxwɛdɛ nɛ gɛ be bu nɛ amɛ, sɛ nɔ nyɛna ebuia nɛ kɛdɔkɛkasɛ nɛ mɛ ovunɔ anɔamɛ madi madi, klɛ nɔ tɛ bhɛtɛ kibuinyɛbui ganɔ anɔɖuɖɔdɛ mɛ.

²² Nɔ tɛ nawɔ̃ nɛ ahwɛ tutrɔ anɔa bha mɛ, klɛ nɔ tɛ ma banɔnyanɔ buzizi nɛ balɛ. Nɔ za ishu bhubhui mɛ.

²³ Yulɔ buni tite ko wɛ̃, wa bulu bhli shui xwɛ akpa wɔ ɛyam so anɛ wɔ banya ziazia nɛ so.

²⁴ Banɔ nɛ teli buzizi nɛ wɛ̃ wee, gɛ bu ku ɔkɛlɛ gɛ kebhuikuklu alɛ otugba kɔa lɛ; ba gɔgɔɛ nɛ buzizi nɛ lɛ balɛe de.

²⁵ Kana mɛ dzoe lɛ nɛa bha ke, ebui dzyɔgo nɛ tsyɛ awɛ̃ wee, klɛ agɛ ala taa wɛ̃ nɛ tsyɛ ba tɛ ba na alɛ kpu.