1 Timotio 4 - ONUGBÙ NYƐNYÃ VUVƆ

Ebuitɛtrɔ Kɔ Timotio

¹ Ɔfufɔɛ nɛ ɔdanɛ kɛlɛ mɛ ɔɖɔ sɛ nɛ kibe gɔgɔɛ nɛ mɛ banɔ teli aba shɛnahwɛ tɛyɛyɛkɛŋa nɛ shu klɛ ba tɛ za ɛfufɔɛ nɛ gɛ wɛɛ anɔ anɛ ɛfufɔɛkpã kɛdɔkɛkasɛ nɛe de.

² Kɛdɔkɛkasɛ nɛɛ di nɛ de anɛkɛtabha betroni nɛ ɔkɔ, gɛ balɛ idzyi nɛ mɛ edzi ansɛ ba pɔɛ yɛ nɛ ɔɖakpɛkpɛ.

³ Be xe kidzo kɔ banɔ sɛ ba tɛ gbanɔ aglɔ klɛ la kpɛ ɔshã sɛ ba shɛ̃nahwɛ kɛdɔŋɛŋa tili di shu, gɛ Kpaya ebu sɛ bagɛ ba yɛkɛaŋa pɛ be nyi kɛgba nɛ ba yɛkɛ lɛ nɛ ahwɛhuhu.

⁴ Alasɛ kɛdɔnyɛdɔ gɛ Kpaya ebu nɛ bɔ, klɛ kɛkanyaka ma gɛ alasɛ be gbe onu gɛ ba yɛkɛ kɛlɛ nɛ ahwɛhuhu,

⁵ alasɛ ba tɛ danɛ kɛlɛ shu nɛ Kpayɛbui nɛ kpayakuklu.

⁶ Onu gɛ obu ebuianɛ ɔkasɛ badzya nɛɛ, obo dzi axwɛwa dzyɔgo kɔ Kristo Yesu, gɛ ba mɛna edenɔ kɛgba tɛyɛyɛkɛŋa nɛ mɛ anɛ kɛdɔkɛkasɛ dzyɔgo nɛe de gɛ ɔlɛ.

⁷ Kɛdɔnyɛdɔ tɛ za wɔahwɛ gɛ ɔbɔ bhɛtɛ nɛ begu nɛ gɛ ama kpaya kidzoa bha banyɛedzini kuku aɛdzɛdzɛ, nɛ kɛlɛ ɔzakɔ, nɔ gbanɔ wɔnɔ shu sɛ tɛ no dzi banɔ gɛ ba lɛ kpayam.

⁸ Alasɛ ishuidzyam hihe nɛ lɛ kedziŋɛŋa tieli mɛ, pɔ kpayamzɛza kedziŋɛŋa lɛ kɔ kɛlɛ nɛ ebui nɛ petee mɛ, ki vunɔ kidzoenudidi kɔ ɔtsɔ̃ nɛ ɛkpã anɛ ɛkpã nɛ gɛ ba tɛ ba.

⁹ Kɛnɛ nɛ nu kibuiɖuɖɔ gɛ ba ba yɛkɛ kɛlɛa bha ŋa gɛ kɛlɛ sɛ ba dɛmɛ lɛ petee

¹⁰ (klɛ kɛlɛ shu lɔ wɛxwɛ pɛ buu tɔ), bu tɛ yɛkɔ bulɔ kidzoenudidi nɛ kpɛ ɛkpã Kpaya nɛ mɛ, gɛ enu agɛ Ayɛyɛkɛkɔ banɔdzyrame nɛ petee, klɛ ɔyɛkɔdɛ kɔ bagɛ ba yɛkɛaŋa.

¹¹ Kɔ ɔshã tɛ ɔkasɛ ebuia.

¹² Tɛ kɔ anɔnyanɔ ebu wɔnɔa bha agɔ alasɛ no ko she so, pɔ nɔ kɔ kɛ gɛ bagɛ ba yɛkɛaŋa nɛ ebe diabhɛtɛ nɛ kaɖɔ ɖuɖɔ mɛ, anɛ ɛkpã mɛ, anɛ tɛɖuɖɔ mɛ, anɛ tɛyɛyɛkɛŋa mɛ ganɛ nɛ ishu bhubhui mɛ.

¹³ Ɔdɔnanɔ kibe lɛ gɛ ɛba, yɛkɔ ishu ɔkɔ nɛ Kpayɛbui nɛ tɛkɛkla nɛ ɔma na mɛ, kɔ kɛlɛ tɛɖuɖɔ anɛ kɛlɛ tɛkɛkasɛ.

¹⁴ Nɔ tɛ shɛ̃nahwɛ wɔnɔ kɛdɔkukɔ nɛ shu, gɛ ba kɔ nɔ ganɔ kibuiɖuɖɔlu nɛ mɛ nɛ kibe lɛ gɛ banɔɛha shishe nɛ atrɔahwɛ nɛ wɔnɔa bha.

¹⁵ Za kibuititi mɛ nɛ ebuia nɛ mɛ; yɛkɔ wɔnɔ shu petee ɔkɔa lɛ, sɛ tɛ anɔnyanɔ amɔ wɔnɔ otugbavɛvɛ.

¹⁶ Vu anhũ nɛ wɔ ɛkpã anɛ kɛdɔkɛkasɛ nɛ mɔmɔ. Tsianyɛ nɛ alɛ mɛ, alasɛ onu gɛ nɔ bhɛtɛ ana, no bo bu wɔnɔ shu anɛ bagɛ be nu nɔɛ bui.