1 Timotio 2 - ONUGBÙ NYƐNYÃ VUVƆ

Kɛdɔkɛkasɛ Nɛ Kɛtɔkpukpɛkpɛesi Shu

¹ Istre nɔ, kɛlɛ putɔnɔ, sɛ tibibisi, kpayakuklu, ibuevuvu anɛ ahwɛhuhu, ba bhɛtɛ lɛ akɔ anɔnyanɔ—

² alasɛ bekusi anɛ banɔ nɛ petee gɛ kabhaŋɛŋa lɛ balɛ ahwɛ, sɛ bu ba za nɛ ishuyuyɔm anɛ tɛdudɔsɛ̃ɛ ɛkpã anɛ kpayamɛzɛza anɛ ishubhubhui mɛ petee.

³ Kɛɛ nɛ kɛlɛ bɔ, klɛ kɛlɛ ku Kpaya bulɔ Ayɛyɛkɛkɔ nɛ awɔ̃,

⁴ gɛ apɛa sɛ tɛ be bu banɔ nɛ petee klɛ tɛ ba ba kɛgba nɛ tititim.

⁵ Alasɛ Kpaya terikpo yɛa lɛ, enu ebuevu nɛ Kpaya nɛ banɔdzyrame nɛ shi, yɛ enu Kristo Yesu,

⁶ gɛ ayɛkɔ yɛshu etsye ansɛ kɛbhɛ bubuya nɛ banɔdzyrame nɛ petee tɔkpu—gɛ ki dzi kibuimɔɖɔ nɛ kɛlɛ be dzyɔgo mɛ.

⁷ Klɛ kɛɛ nɛ nɛ shu so pɛ be bu mɛ asɛ idzi otugbanɔ anɛ anɔkpɛkpɛ, gɛ ɛɛɖɔ kɛgba, iti hu otro—klɛ mɛ nu kɛgba tɛyɛyɛkɛŋa adɔkasɛ kɔ Bagɛ ba dɛ yɛkɛaŋa.

⁸ Ɛpɛ banɔ nɛ ɔkɔnyɔkɔ sɛ be bu ɛhwɛ gɛ ɛlɛ shu bhui akpɛa bha kɔ kpayakuklu, obulo anɛ kibui wɛ̃wlãnkɛ ma kɛlɛ mɛ.

⁹ Ɛpɛ tsyɛ sɛ badzɛ nɛ baza kɛdɔ nyunyumu dzyɔgo mɛ, gɛ kɛ dɔamɛ klɛ kɛlɛ shu bhui, ganɛ kɛtɔkputɛka pupɔ ɔdɔgɔsɛ sɛkadzɛdzã ɔdɔgɔsɛ ehuikpɛkpã pɛ ɔdɔgɔsɛ kɛdɔ nyunyumu ŋɛŋaedzi,

¹⁰ pɔ nɛ ebui dzyɔgo bhɛbhɛtɛ, gɛ aba kɔ badzɛ gɛ ba yɛkɔ shu asɛ ba ba kpɛ kɛtɔkpuesi kɔ Kpaya.

¹¹ Adzɛ nɛɛ kɛlɛ sɛ tɛ akpasɛdɔ ganɔ tɛdɛdɔsɛ̃ anɛ ishubububɔ mɛ petee.

¹² Ɛdɛ kɔ adzɛ dzo sɛ akasɛ dɔ ɔdɔgɔsɛ aŋa anyɛa bha; alasɛ tɛ ada onugbu.

¹³ Alasɛ Aɖam la bhɛtɛ eputɔnɔ, flogo pɛ Eva.

¹⁴ Klɛ ganɛ Aɖam la wɛɛ; adzɛ nɛ la wɛɛ klɛ edzi buziziabhɛtɛ.

¹⁵ Pɔ ba ba yɛkɛkɔ badzɛ ganɔ eyimumɔ mɛ— onu gɛ ba vɛ kɛlɛa bha nɛ tɛyɛyɛkɛŋa mɛ, tɛɖuɖɔ anɛ ishubhubhui anɛ ɛkpã nɛna zɛza.