1 Timotio 1 - ONUGBÙ NYƐNYÃ VUVƆ

¹ Paolo, Kristo Yesu anɔkpɛkpɛ ganɔ bulɔ Kpaya ɔshã nɛa bha agɛ ebu lɔ nɛ kibuiɖuɖɔ nu anɛ Kristo Yesu gɛ enu bulɔɛ dzoenudidi,

² Kɔ Timotio gɛ enu mɛ eyianyɛ kɛgbɛagba nɛ tɛyɛyɛkɛŋa nɛ mɛ, Ɛyamyuyɔ, eshutukubui didi anɛ ishuyuyɔ denɔ Kpaya gɛ enu Aka anɛ Kristo Yesu bulɔ Apalete nɛ ɔkɔ.

Awɔ̃lulu Nɛ Itro Ɛshãdɔkasɛ

³ Ansɛ gɛ itsre nɔ nɛ kibe lɛ nɛ gɛ ɛvɛ Makedonia, nɔ za ɔkɛlɛ nɛ Efesosɛ sɛ tɛ nɔ kɔ sɛ banɔ teli ba taa kasɛ itroe dɔ ɔtsɔlɛ

⁴ ɔdɔgɔsɛ tɛ ba yɛkɔ balɛ shu akpɛ begu anɛ ɛkɔdzidze ɖuɖɔ mɛ. Ebuia lɛlɛ nɛɛ di na mɛna aglɔ esi manumanu ɔyɛkɔdɛ Kpaya kɛxwɛ, nɛ gɛ lɛ nɛ tɛyɛyɛkɛŋa mɛ.

⁵ Ɔshã nɛ tɛtutrɔ yɛ kɛlɛ nu tɛɖuɖɔ, gɛ kii de idzyi gɛ ebhui mɛ anɛ ishumdɛdanɛ dzyɔgo nɛ tɛyɛyɛkɛŋa gɛganɛ.

⁶ Banɔ teli ba lɛla shɛ alɔ ebuia klɛ be tsyina tɔ kaɖɔɖuɖɔ gɛ kalɛesi ama.

⁷ Ba pɛa sɛ tɛ be dzi ɛshãdɔkasɛ, pɔ be ti nyi kɛdɔnɔ nɛ gɛ baa ɖɔ ɔdɔgɔsɛ kɛgɛ kɛlɛa bha la trɔɛ klagbu gɛganɛɛa ana.

⁸ Bu nyi sɛ ɔshã nɛ ɔbɔ onu gɛ anɔ awa ɔlɛ shuɛxwɛ mɔmɔ.

⁹ Bu ka nyi tsyɛ sɛ ɔshã nɛɛ ba bhɛtɛ ɔlɛ ganɛ kɔ anɔ nɛ gɛ ana, pɔ lɔ lɛ kɔ bagɛ baa da ɔlɛa bha anɛ bagɛ be dzyeagã, bagɛ ba dɛ sɔlɛ klɛ ba bhɛtɛ buzizi, bagɛ balɛ shu dɛ bhui klɛ ba taa bhɛtɛ busɔlɛ bui kanyaka; kɔ bagɛ bee yi balɛ akalɛ ɔdɔgɔsɛ balɛ enialɛ, kɔ bagɛ be yi anɔ,

¹⁰ kɔ bagɛ ba bhɛtɛ aglɔbui anɛ bagɛ baa ga anɔesi, kɔ bagɛ baa ga anɔdzidzi kedzi anɛ betroni anɛ bagɛ baka atabu pɛ bee hu otro—nɛ kɔ kɛdɔnyɛdɔɛ di gɛ lɛ ɔtɔ kɔ kɛdɔkɛkasɛ dzyɔgo

¹¹ nɛ kɛgɛ ga plɛnɔ kibui dzyɔgo gɛ kɛlɛ shu bhui gɛ nu anɔyuyula Kpaya, nɛ gɛ ayɛkɔ akpɛ mɛ ahwɛ.

Apalete Nɛ Ɛyamyuyɔ Kɔ Paolo

¹² Ihu bulɔ Apalete Kristo Yesu ahwɛ, gɛ akɔ mɛ bugɛganɛ, gɛ edi mɛ asɛ anɔ gɛ tɛyɛyɛkɛŋa lɛ mɛahwɛ, klɛ eebu mɛ akɔ yɛ kɛxwɛ.

¹³ Kɛnya lɛ kɛlɛm sɛ iti dzi anɔ gɛ abhɛtɛ ebusobui di anɛ anɔ gɛ akpatɔnɔ anɔ klɛ idzi anɔ gɛ aza kanya, be di mɛ eshutukubui alasɛ ɛbhɛtɛ ebuia nɛ matimati mɛ anɛ mayɛkɛ mayɛkɛŋa.

¹⁴ Ba yɛkɔ bulɔ Apalete nɛ ɛyamyuyɔ nɛ abalɛ mɛa bha gelee, ɔyɛkɔ plɛnɔ tɛyɛyɛkɛŋa nɛ tɛɖuɖɔ nɛ gɛ kpasɛ Kristo Yesu mɛ.

¹⁵ Kibuiɖuɖɔ gɛ kɛlɛ sɛ ba yɛkɛ kɛlɛa bha ŋa nɛ nɛɛ: Kristo Yesu aba kanɔ nɛm sɛ tɛ aba yɛkɛ kɔ bezizi—gɛ mɛ inu ezizi nɛ dɛ nɛ balɛm.

¹⁶ Pɔ kibui lɛ nɛ shu so pɛ be di mɛ eshutukubui sɛ tɛ nɛ mɛ mɛɛ, ansɛ eziziadɛ nɛ be zizi nɛ shi, tɛ Kristo Yesu ebe bu yɛ tɛdudɔfɔɔ̃ nɛ gɛ obekekɔ ma kɔɛ lɛ nɛ akasɛ ansɛ kibui gɛ bagɛ ba ba yɛkɛ yɛa bha aŋa nɛ be di abhɛtɛ pɛ la ba mɔ ɛkpã mabeke mabeke.

¹⁷ Ɔtsɔ̃, kɔ ɔfufɔɛ mɛ Ekusi, gɛ eti tsi, gɛ ataa wɛ̃, yɛ ko yɛ enu Kpaya, gɛ kabhakpɛkpɛ nɛ ishubhubhui lɛ kɔ ɔyɛkɔ vɛnɔ mabeke mabeke mɛ. Tɛlɛbɛlɛm.

¹⁸ Meyianyɛ, Timotio, itsre wɔ kibui nɛ kɛnyɛna nɛ gɛ ɔbɔ nyɛna ebui nɛ gɛ ba ɖɔelu nɛ wɔ shu nɛm ovunɔ, sɛ tɛ ganɔ alɛede zɛza tɛ ɔbɔ gɔnɛ tɛgugɔnɛ dzyɔgo,

¹⁹ tɛ ɔnyɛna tɛyɛyɛkɛŋa nɛ mɛ vunɔ anɛ idzyim dzyɔgo. Beteli adɛ yɛkɛ ebuia klɛ ba yɛ balɛ tɛyɛyɛkɛŋa.

²⁰ Balɛm banɔ teli balɛ nu Himenaɛusɛ anɛ Alɛxanda, gɛ ɛtɛ yɛkɔ kpɛ ahwɛ kɔ Satana sɛ tɛ akasɛ balɛ asɛ ba taa ɖɔ ebusobui.