1 Tɛsolonianɛ 5 - ONUGBÙ NYƐNYÃ VUVƆ

¹ Ɔtsɔ̃, badzya mɔ, nɛ kibe anɛ ewia pɛ mɛ, kɛ dɛ bisi sɛ bu ŋlɔmɛ kɔ nɔ,

² alasɛ no nyi mɔmɔ sɛ Apalete nɛ kiwi nɛ baa ba ansɛ ezi nɛ elishi mɛ.

³ Nɛ kibe lɛ mɛ gɛ banɔa ɖɔ sɛ, “Ishuyuyɔ anɛ tɛzɛzamɔmɔ,” butsyrɔ ba ba balɛa bha kɛba tili, ansɛ gɛ eya tã ayamunɔ, klɛ be ti be si nɛ kɛlɛ nu.

⁴ Pɔ wɔnɔ, badzya mɔ, nɔ ma otumu mɛ sɛ tɛ kiwi nɛ ba yinɔ nɔ ansɛ ezi.

⁵ Wɔnɔ petee no nu kelizɛza mɛ anɛ kiwi mɛ beyi. Bulɔ bu dɛ nu elishi mɛ pɛ ɔdɔgɔsɛ otumu mɛ banɔ.

⁶ Kɛlɛ so, nɔ tɛ kɔ lɔ za ansɛ banɔ gɔgɔɛ, gɛ bedzi adɔ tra, pɔ nɔ kɔ lɔ za nɛ awɔ̃ nɛ ishuabhaŋɛŋa.

⁷ Alasɛ bagɛ adɔ tra, naa dɔ tra nɛ elishi mɛ, klɛ bagɛ baa dɔ lu, na dɔ lu nɛ elishi mɛ.

⁸ Pɔ gɛ bulɔ bu nu kelizɛza mɛ banɔ, nɔ kɔ lɔ ŋa ishuabha, tɛ bu yɛkɔ tɛyɛyɛkɛŋa anɛ tɛɖuɖɔ kpla ansɛ kitemɛnyadɔ, anɛ tɛbubu kidzoenu didi ansɛ ɔɖa kikutu.

⁹ Alasɛ Kpaya edi bu lɔ sɛ bu ba tɔ nɛ yɛ obuloe si, pɔ tɛ bu yɛkɛ tɛbubu ganɔ bulɔ Apalete Yesu Kristoa bha.

¹⁰ Etsi nɛ bulɔɛ tɔkpu sɛ tɛ, onu gɛ bulɛnawɔ̃ o bu dɔ tra o, bu ba za ketsu mɛ nɛ yɛ.

¹¹ Kɛlɛ so, nɔ kpɛ aglɔ kemi tɛ nɔ bhɔ aglɔ trɔ, ansɛ gɛ nɔ bhɛtɛ nɛ kɛgba mɛ.

Kɛdɔkɛkasɛ Gɔgɔɛ

¹² Ɔtsɔ̃, badzya mɔ, bu bisi denɔ wɔnɔ kɔ sɛ nɔ tatɔ nɛ bagɛ ba wa kɛxwɛ gɛganɛɛ nɛ wɔnɔɛ shi, gɛ balɛ kabha kɔ nɔ nɛ Apalete nɛ mɛ pɛ ba kasɛ nɔ ɔtsrɛ odzukɔ.

¹³ Nɔ nyɛna balɛ ovunɔ nɛ tɛɖuɖɔ ɖɛɖama mɛ nɛ balɛ kɛxwɛ nɛ shu so. Nɔ za ishuyuyɔ mɛ nɛ ɔhaglɔ.

¹⁴ Klɛ bu tsre nɔ, badzya mɔ, bagɛ baa kpɛ aye be dii mɔ, nɔ kpɛ bagɛ be sifu nɛ kemi, nɔ plɛnɔ bagɛ ba dɛ gɛganɛ, nɔ dɔfɔɔ̃ nɛ anɔnyanɔ.

¹⁵ No di kɛlɛ ɔkɔ sɛ anɔnyanɔ adɛ buya butsutsɔmɔ kɛbhɛ akɔ butsutsɔmɔ, pɔ nɔ yɛkɔ ɔtrɔ shu tɛ nɔ pɛ̃ ɛyam nɛ ɔhaglɔ anɛ anɔnyanɔɛ di.

¹⁶ Nɔ mɔ same kibenyɛbe;

¹⁷ za kpayakuklua bha;

¹⁸ hu ahwɛ nɛ tɛzɛza kanyakaɛ di mɛ, alasɛ kɛɛ nɛ kɛlɛ nu Kpaya tɛpɛpɛɛ kɔ nɔ nɛ Kristo Yesu mɛ.

¹⁹ No ti ni Ɔfufɔɛ nɛ fu,

²⁰ nɔ tɛ yɛkɔ ebuia nɛ ɔkpɛ ansɛ atsɛ.

²¹ No feke kɛdɔnyɛdɔ odi. Nɔ nyɛna kɛdzyɔgo mɛ ovunɔ.

²² Butsutsɔmɔ kanyakaɛ di tɛ tsobunɔ nɔ.

²³ Kɔ Kpaya nahwɛ, ishuyuyɔ Kpaya, adanɛ nɔ shu avɛnɔ etsodzini avɛnɔ. Kɔ wɔnɔ ɔfuɔɛ nɛ petee, kɛtɔwi anɛ ishuidzya nɛ za kɛpɔ maŋa maŋa mɛ nɛ bulɔ Apalete Yesu Kristo tɛbɛba mɛ.

²⁴ Anɔ nɛ gɛ eekulu nɔ, tɛyɛyɛkɛŋa lɛ yɛ ahwɛ klɛ aba bhɛtɛ kɛlɛ.

²⁵ Badzya mɔ, no klukpaya ɔkɔ lɔ.

²⁶ Nɔ sɛnɔ badzya nɛ petee nɛ ahwɛyɛyɛkɛ gɛ alɛ shu bhui.

²⁷ Itsre nɔ nɛ Apalete nɛ amɛ sɛ tɛ nɔ kɔ la kla keplukpɛa nɛ akɔ badzya nɛ petee.

²⁸ Bulɔ Apalete Yesu Kristo eshutukubui didi aza plɛnɔ nɔ.