1 Tɛsolonianɛ 4 - ONUGBÙ NYƐNYÃ VUVƆ

Tɛzɛza Tɛ Oku Kpaya Awɔ̃

¹ Gɔgɔɛ nɛɛ, badzya mɔ, bu kasɛ nɔ kana gɛ nɔ bɔ za sɛ tɛ no ku Kpaya awɔ̃, ansɛ gɛ nɔ lɛ nɛ kɛgbɛagba mɛ. Ɔtsɔ̃ nɛɛ bu bisi denɔ nɔ kɔ klɛ bu tsre nɔ nɛ Apalete Yesu mɛ sɛ nɔ bhɛtɛ ana otsodzini ɔzɔ bhɛtɛ.

² Alasɛ no nyi kɛdɔ nɛ gɛ bu kasɛ nɔ ganɔ Apalete Yesu kabhaŋɛŋa nɛa bha.

³ Kinu Kpaya tɛpɛpɛɛ sɛ tɛ ba danɛ wɔnɔ shu, sɛ tɛ no shɛ̃nahwɛ azhuzhɔlɛbui shu,

⁴ tɛ wɔnɔmɛayɛ kanyaka akpasɛ yɛnahwɛ ishua bha ŋɛŋa nɛ kidzo gɛ kɛlɛ shu bhui klɛ kɛ ba kpɛ anɔ nɛa bha,

⁵ ganɛ azhuzhɔlɛbui pɛpɛ mɛ ansɛ bagɛ ba dɛ sɔlɛ, pɛ be ti nyi Kpaya,

⁶ klɛ nɛ kibui nɛ mɛ anɔnyanɔ atɛ bhɛtɛ buzizi avɛnɔ yɛadzya ɔkɔ ɔdɔgɔsɛ amɔ kidzo nɛ yɛ shu. Apalete aba tɛta banɔ nɛ petee gɛ ba ba bhɛtɛ ebuizizi alɛlɛ nɛ di nɛ atɔ, ansɛ gɛ bu tɛ tsre nɔ klɛ bu kpɛ nɔ ɔshã.

⁷ Alasɛ Kpaya adɛ bhɛtɛ lɔ sɛ tɛ bulɔ shu tɛ bhui, pɔ bu za nɛ ɛkpã gɛ ɛlɛ shu bhui.

⁸ Kɛlɛ so, anɔ nɛ gɛ adɛ yɛkɛ kɛdɔkɛkasɛ ganɛ anɔ yɛ adɛ yɛkɛ, pɔ Kpaya, nɛ gɛ aakɔ nɔ yɛ Ɔfufɔɛ Dzyɔgo.

⁹ Ɔtsɔ̃ nɛ kɛdzya mɛ tɛɖuɖɔ shu kɛ dɛ zhã sɛ bu ŋlɔmɛ kɔ nɔ, alasɛ wɔnɔ nahwɛ Kpaya atɛ kasɛ nɔɛ dɔ sɛ nɔ ɖɔ aglɔ.

¹⁰ Klɛ nɛ kɛgba mɛ, nɔ ɖɔ badzya nɛ petee nɛ Makedonia. Tsyɛ bu tsre nɔ, badzya mɔ, sɛ nɔ bhɛtɛ ana otsodzini ɔbhɛtɛ.

¹¹ Nɔ bhɛtɛ lɛ wɔnɔ tɛpɛpɛɛ sɛ tɛ nɔ za nɛ ɛkpã kɛdzyɛɛ, no di wɔnɔ nahwɛ kɛxwɛ amɛ, klɛ nɔ wa kɛxwɛ nɛ wɔnɔ ahwɛ, ansɛ gɛ butsre nɔ,

¹² sɛ tɛ wɔnɔ kiwinyɛwi ɛkpã zɛza nɛ kɔ ɔdzɔgelete nɛ ba mɔ nɔ akpɛ kibui tili mɛ, sɛ tɛ nɔ tɛ dɔ za anɔnyanɔa bha.

Akagbla Nɛ Tɛbɛba

¹³ Badzya mɔ, bu dɛ pɛɛ sɛ tɛ no titi kibuinyɛbui odenɔ bagɛ be ti tsi nɛ shu, ɔdɔgɔsɛ tɛ no tsishu ansɛ banɔ gɔgɔɛ, gɛ kidzoenudidi ma kɔa lɛ.

¹⁴ Buyɛkɛŋa sɛ Yesu etsi klɛ aza nyɛmɛ, kɛlɛ so bu yɛkɛŋa sɛ Kpaya aba mɛna Yesu anɛ bagɛ be ti tsi nɛ yɛ mɛ.

¹⁵ Nɛ Apalete nɛ kibui ɖuɖɔ nɛ nu, bu tsre nɔ sɛ bulɔa gɛ ka lɛ nɛ ɛkpã, pɛ bu gɔ ɔdɔ nanɔ Apalete nɛ tɛbɛba, kɛgbɛagba mɛ nɛɛ bu tɛ ba putɔ kɔ bagɛ ti tsi.

¹⁶ Alasɛ Apalete nɛ nahwɛ ebe zhi ede owũsise aba, nɛ tɛxũxlɔ̃nɔ gɛganɛ, nɛ axwɛdɛgbla ogugu anɛ Kpaya kɛdɔkuklua xũlɛ̃, klɛ bagɛ be tsi nɛ Kristo mɛ be be bhuso lɔ.

¹⁷ Kɛlɛe de, bulɔ bagɛ aka lɛ nɛ ɛkpã pɛ ba gɔ be be vua lɛ aplɛnɔa lɛ nɛ ɔmunɔ nɛ mɛ ada tsyanɔ Apalete nɛ kɛlɛm. Klɛ kana lɔ ba za plɛnɔ Apalete nɛ ɔyɛkɔ vɛnɔ.

¹⁸ Kɛlɛ so, nɔ yɛkɔ ebuianɛ ɔkpɛ ɔhaglɔ kemi nɔ.