1 Tɛsolonianɛ 3 - ONUGBÙ NYƐNYÃ VUVƆ

¹ So gɛɛ butɛa na klɛ nu za, bu bhɛtɛ tɔkpum sɛ kɛ pɛ̃ dɛ sɛ tɛ bu wɔ Atɛnsɛ bulɔnahwɛ.

² Bu kpɛ Timotio, gɛ enu bulɔadzya nɛ Kpaya axwɛwa bhla nɛ Kristoebui nɛ tɛkɛkɛka mɛ, tɛ abhɛtɛ nɔ tɛ nɔ gɛganɛ tɛ akpɛ nɔ kemi nɛ nɔ tɛyɛyɛkɛŋa nɛ mɛ,

³ sɛ tɛ be ti be bu anɔnyanɔ ebho ganɔ tɛfifekedi nɛ mɛ. No nyi mɔmɔ sɛ ba bhɛtɛ lɔ akɔa lɛ.

⁴ Nɛ kɛgba mɛ, gɛ bu za plɛnɔ nɔ, bu za kɛlɛa bha tsre nɔ sɛ ba ba kpatɔnɔ lɔ. Klɛ kɛ ba za na, ansɛ gɛ no nyi mɔmɔ.

⁵ Kibui nɛ so, gɛ ɛtɛa na kɛlɛ nu za, ɛkpɛ odu sɛsɛ sɛ tɛ iti kibui denɔ wɔnɔ tɛyɛyɛkɛŋa nɛ shu. Ɛganɔ awɔ̃ sɛ nɛ kidzo tilia bha Satana eti be feke nɔ edi klɛ bulɔ tɛ tɛbhɛbhɛtɛ nɛ tɛa ba za kibuinyɛbui mɛ.

Timotio Kemikpɛkpɛ Kaɖɔ

⁶ Pɔ otsiko Timotio ede nɔ bha ebe ku bulɔ bha klɛ amɛna kibui dzyɔgo edenɔ wɔnɔ tɛyɛyɛkɛŋa anɛ tɛɖuɖɔ shu. Eti tsre lɔ asɛ nɔɔ baka lɔ bui mɔmɔ kibenyɛbe klɛ nɔ pɛ sɛ tɛ nɔ mɔ lɔ, ansɛ gɛ bulɔ tsyɛ pɛ sɛ tɛ bu mɔ nɔ.

⁷ Kɛlɛ so, badzya mɔ, nɛ bulɔ batɔ anɛ tɛkpɛkpatɔnɔ nɛ mɛɛ ba kpɛ lɔ kemi nɛ wɔnɔ shu akpɛ wɔnɔ tɛyɛyɛkɛŋa nɛ so.

⁸ Nɛ ɔtsɔ̃ nɛ mɛ bu lɛ, nɛ kibe lɛ gɛ no li kititi gɛganɛɛ nɛ Apalete nɛ mɛ.

⁹ Kɛlɛ lɔ ba na Kpaya ahwɛ hu pɛ aba na kɔ nɔ ansɛ kɛbhɛ bubuya nɛ bulɔ same nɛ gɛ bu mɔ nɛ bulɔ Kpaya nɛ amɛ akpɛ wɔnɔ so?

¹⁰ Elishi anɛ kemuze bu kulukpaya gɛganɛɛ sɛ tɛ bu fla ba mɔ nɔ tɛ bu pɛɛ agɛ ala ma wɔnɔ tɛyɛyɛkɛŋa nɛ mɛ kpɛ kɔ nɔ.

¹¹ Ɔtsɔ̃ kɔ bulɔ Aka anɛ Kpaya nahwɛ anɛ bulɔ Apalete Yesu adanɛ kidzo kɔ lɔ sɛ tɛ bu ba wɔnɔ ɔbha.

¹² Kɔ Apalete nɛ abhɛtɛ wɔnɔ tɛɖuɖɔ tɛ lɛ vɛa bha tɛ ki yuku gbɛgba kɔ wɔnɔmayɛ kanyaka nɛ kɔ anɔnyanɔ tsyɛ, ansɛ gɛ bulɔayɛ nɛ abhɛtɛ kɔ nɔ.

¹³ Kɔ yɛ agɛganɛ wɔnɔ idzyi sɛ tɛ kɛpɔ tɛ za nɔ shu tɛ wɔnɔ shu bhui nɛ bulɔ Kpaya anɛ Aka nɛ amɛ kibe lɛ gɛ bulɔ Apalete Yesu aba ba nɛ yɛ banɔ gɛ balɛ shu bhui nɛ petee.