1 Tɛsolonianɛ 2 - ONUGBÙ NYƐNYÃ VUVƆ

Paolo Kɛxwɛwɛwa Nɛ Tɛsalonika

¹ Badzya mɔ, no nyi ɔsɛ, bulɔ wɔnɔ bha bɛba nɛ odi dzi kibui gɛ kɛdɔnyɛdɔ dɛ de kɛlɛ mɛ koeyi.

² Bu tɛ tɔ bafla klɛ ba tɛ kula lɔ nɛ Filipi, ansɛ gɛ no nyi, pɔ nɛ bulɔ Kpaya nɛ tɛpɛplɛnɔ so bu dzu amɛ nɛ yɛ kibuidzyɔgo sɛ tɛ bu ɖɔɛ lɛ tsre nɔ nɛ kititilulɔ gɛganɛ mɛ tysɛ.

³ Alasɛ bulɔ tɛbibisi nɛ gɛ bu bhɛtɛ nɛ di de kito mɛ pɛ ɔdɔgɔsɛ kɛtɔkpum kpã mɛ, pɛ kɛ ba dzi sɛ bu bhɛtɛ sɛ tɛ bu wɛɛ nɔ nu.

⁴ Kɛɛlɛ nɛ mazɛ lɛ mɛ, bu ɖɔaɖɔ anasɛ banɔ gɛ Kpaya atrɔahwɛ bulɔa bha pɛ ba ba yɛkɔ kibuidzyɔgo nɛ akpɛ bulɔ ahwɛ. Bu tɛ bhɛtɛ sɛ tɛ bu ku banɔ awɔ̃ pɔ Kpaya, gɛ eefeke bulɔ idzyi nɛ mɛ edi.

⁵ No nyi ɔsɛ bulɔ bu tɛɛ wɛɛ anɔ amɛ, pɛ ɔdɔgɔsɛ bu yɛkɔɛdɔ kumu amɛ sɛ tɛ bu kpu bulɔɛdɔ gbla pɛpɛ kɔ ishu—Kpaya yɛ enu bulɔ ebuimɔɖɔ.

⁶ Bu tɛɛ pɛɛ bulɔ kabhakpɛkpɛ denɔ banɔ ɔkɔ, ganɛ denɔ wɔnɔ kɔ ɔdɔgɔsɛ anɔnyanɔ ɔkɔ. Ansɛ Kristo banɔkpɛkpɛ ana bu ta dzi kituku kɔ nɔ,

⁷ pɔ bu nyɛna ishu nɛ wɔnɔɛ shi, ansɛ gɛ eyieni eedi yeyialɛ bhli ɔkɔ.

⁸ Bu pɛɛ wɔnɔɛ bui gelee gɛ kɛ kɔ sɛ bu mɔ same ganɛ sɛ tɛ bu ma Kpaya kibuidzyɔgo nɛ wɔnɔ ko, pɔ bulɔ ɛkpã nɛ tsyɛ ta, alasɛ no bo dzi banɔ gɛ wɔnɔɛ bui nyɛna bulɔ idzyi.

⁹ Badzya mɔ, ɛyɛkɛŋa sɛ nɔɔ baka, bulɔ baatɔ nɛ ebuigɛganɛ nɛ mɛ; bu wa kɛxwɛ elishi anɛ kemuze sɛ tɛ bu tɛ dzi kituku kɔ nɔ nɛ kibe lɛ gɛ bu ɖɔ Kpaya kibuidzyɔgo nɛ tsre nɔ.

¹⁰ No nu bebuimɔɖɔ, klɛ kana Kpaya tsyɛ alɛ, nɛ kana gɛ bulɔ ishubhui, tɛnɛnamɛzɛza anɛ kɛpɔ maza lɔ shu nɛ mɛ gɛ bu yɛkɔ za wɔnɔa gɛ ɔyɛkɛɔŋa nɛ shi.

¹¹ Alasɛ no nyi ɔsɛ bu za nɛ wɔnɔmɛayɛ kanyaka ansɛ gɛ aka aabhɛtɛ nɛ yɛnahwɛ yɛeyialɛ,

¹² balɛ kemikpɛkpɛ, ishumyuyɔ klɛ etsre nɔ asɛ tɛ nɔ za nɛ ɛkpã gɛ ku Kpaya awɔ̃, gɛ eekulu nɔ akpɛ yɛ bukusiɔŋakɔ nɛ ishubhubhui nɛ mɛ.

¹³ Klɛ bu tsri lɛa bha tsyɛ hu Kpaya ahwɛ alasɛ, onu gɛ nɔ yɛkɛ Kpaya kibui, gɛ no nu denɔ bulɔ kɔ, nɔ yɛkɛ lɛ ganɛ ansɛ banɔdzyrame kibui ɖuɖɔ, pɔ ansɛ gɛ kɛ lɛ, pɛ ki nu Kpaya bui, nɛ gɛ kɛwa kɛxwɛ nɛ wɔnɔa gɛ ɔyɛkɛ ɔŋa nɛ mɛ.

¹⁴ Wɔnɔ, madzyalɛ mɔ, no bo dzi banɔ gɛ no di Kpaya basɔlɛha nɛ Yuɖia, gɛ ba kpasɛ Kristo Yesu mɛ: Nɔ tɔ denɔ wɔnɔ nahwɛ ɔkɔayɛ nɛ ahwɛ mɛ, ebuianɛ nɛ di mɛ basɔlɛha nɛ tsyɛ ba mɔ nɛ Yuɖanɛ nɛ ahwɛ mɛ,

¹⁵ gɛ be yi Apalete Yesu anɛ batɔnu klɛ ba kɛka lɔ tsyɛ ebu eyinɔ. Be di ku Kpaya awɔ̃ klɛ ba yɛkɔ ebla nɛ anɔnyanɔ

¹⁶ sɛ tɛ be xe lɔɛ dzo tɛ bu tɛ mɔ kaɖɔɛ ɖɔ nɛ bagɛ be di nu Yuɖanɛ sɛ tɛ ba ba mɔ tɛbubu. Ganɔ kidzoe nɛa bha be xogo balɛ ebuizizi nɛ ɔdɔ tɔnɔ alɛ ɔwɔkɔ. Kpaya obulo nɛ ɔtɛ ba balɛa bha nɛ kidegba.

Paolo Tɛpɛpɛɛ Sɛ Tɛ Amɔ Tɛsalonianɛ

¹⁷ Pɔ, badzya mɔ, gɛ ba pɔ lɔ nɛ wɔnɔ shu nɛ kibe bhli mɛ (ansɛ anɔana, ganɛ nɛ kɛtɔkpum bhɛbhɛtɛ), nɛ bulɔ tɛpɛpɛ gɛganɛɛ shu bu bhɛtɛ kɛkanyakaɛ di sɛ tɛ bu mɔ nɔ.

¹⁸ Alasɛ bu pɛɛ sɛ tɛ bu ba wɔnɔ bha—nɛ tɛtɛtrɔ nu, mɛ Paolo, ɛbhɛtɛ itsodzini bhɛtɛ—pɔ Satana adzrɔ lɔ.

¹⁹ Alasɛ kɛgɛ nu bulɔ kidzoenu didi, bulɔ same, ɔdɔgɔsɛ bukusikutu nɛm gɛ bu ba za nɛ ishubhubhui anɛ bulɔ Apalete Yesu nɛ amɛ onu gɛ aaba? Ganɛ wɔnɔ?

²⁰ Kɛgbɛagba, wɔnɔ nu bulɔ ishubhubhui nɛ same.