1 Tɛsolonianɛ 1 - ONUGBÙ NYƐNYÃ VUVƆ

Tasolonikanɛ Ɛkpã Anɛ Balɛ Tɛyɛyɛkɛŋa

¹ Paolo, Silasɛ anɛ Timotio, kɔ Tɛsalonianɛ busɔlɛɔha nɛ Kpaya gɛ enu Aka anɛ Apalete Yesu Kristo: Eshutukubui didi anɛ ishuyuyɔ kɔ nɔ.

Ahwɛhuhu kɔ Tɛsalonianɛ Tɛyɛyɛkɛŋa

² Kibenyɛbe bu hu Kpaya ahwɛ kɔ nɔ petee, bu kulu nɔɛ nyi nɛ Kpaya kuklum.

³ Bu lɛ kɛlɛa bha baka nɔ nɛ bulɔ Kpaya anɛ Aka nɛ amɛ wɔnɔ kɛxwɛwɛwa nɛ gɛ tɛyɛyɛkɛŋa bhɛtɛ, wɔnɔ kɛxwɛwɛwa nɛ gɛ tɛɖuɖɔ mɛna, anɛ wɔnɔ kanyɛtsitsi nɛ gɛ ka ba denɔ kidzoenudidi mɛ anɛ bulɔ Apalete Yesu Kristo mɛ.

⁴ Alasɛ bu nyi, badzya mɔ gɛ Kpaya aɖɔ, so pɛ ekulu nɔ,

⁵ alasɛ bulɔ kibuidzyɔgo nɛ dɛ ba kɔ nɔ bubɔɛbɔɛ ganɔ kaɖɔɖuɖɔm, pɔ ganɔ kemi mɛ tsyɛ, anɛ Ɔfufɔɛ Dzyɔgo nɛ awɔ̃kuku dzudzu mɛ. No nyi kana gɛ bu za wɔnɔɛ shi nɛ wɔnɔɛ tɔkpu so.

⁶ No bo dzi banɔ gɛ no di bulɔ anɛ Apalete nɛ pɛ nɔɔ bhɛtɛ; nɛ butɔ gɛganɛɛ mɛ tsyɛ, nɔ yɛkɛ kibui nɛ gɛ ba mɛna nɔ nɛ same ganɔ Ɔfufɔɛ Dzyɔgo nɛ ɔkɔ.

⁷ Kɛlɛ so no bo dzi banɔ gɛ be be di abhɛtɛ kɔ bagɛ ba yɛkɛaŋa nɛ petee nɛ Makedonia anɛ Atsyaia.

⁸ Apalete nɛ kibui nɛ yi denɔ wɔnɔ mɛ ganɛ nɛ Makedonia anɛ Atsyaia titee—wɔnɔ tɛyɛyɛkɛŋa nɛ Kpaya bha nɛ ba ku tɛtiti mɛ nɛ ɔkɔnyɔkɔ. Kɛlɛ so kɛ ka za sɛ bu ɖɔ kibuinyɛbui denɔ kɛlɛ shu,

⁹ alasɛ balɛ nahwɛ nɛ aɖɔ tɛyɛyɛkɛ nɛɛ di gɛ nɔ kɔ lɔ. Ba ɖɔ kana gɛ no tsyina tɔ Kpaya pɛ no tsodzi nɛ kɛdɔbhubhɔ nɛede sɛ tɛ nɔ bɔ wa kɛxwɛ ɔkɔ ɛkpã anɛ kɛgba Kpaya,

¹⁰ tɛ no po Yɛeyi nɛ gɛ ede owũsise, gɛ anyɛmɛ edenɔ bekpu mɛ—Yesu, nɛ gɛ ebe bu lɔ edenɔ obulo nɛ gɛ ɔba nɛ mɛ.