1 Petro 4 - ONUGBÙ NYƐNYÃ VUVƆ

Ɛkpãzɛza Kɔ Kpaya

¹ Kɛlɛso, kibelɛlɛ gɛ Kristo amɔ butɔ nɛ yɛ shuidzya mɛ, nɔ bala wũnɔ shu tsyɛ nɛ kidzo lɛlɛ nɛabha, alasɛ anɔ gɛ amɔ butɔ nɛ yɛ shuidzya mɛ aŋa buzizi abha.

² Nɛ kɛlɛso, ata za nɛ ɛkpã gugɔɛ nɛ kesukpaɛ abha ɛkpã kɔ anɔdzyrame buzizi tɛpɛpɛɛ, pɔ nɛ kɛlɛ ɔzakɔ yɛkɔ kɔ Kpaya tɛpɛpɛɛ.

³ Alasɛ no ti zi be gelee bafla ba bhɛtɛ kɛgɛ ibuidielete ba pɛɛ sɛ tɛ ba bhɛtɛ—ɛkpãzizi zɛza, ishu mɛ zɛzandzyɛ, bulububuku, ɔhakpɛkpɛ kɛdɔ gbɛgbla ŋɛŋa, anɛ tɛtsutsɔmɔ obudi busɔlɛ.

⁴ Ba yɛkɔɛ lɛ sɛ kɛbhɛtɛ alɛ bi sɛ nɔ dɛ za kɛlɛe de tsoku nalɛ kpɛ ɛkpãzizi gɛganɛ lɛlɛ nɛɛ di, klɛ ba yɛkɔ tɛkukla atrɔ wɔnɔ abha.

⁵ Pɔ ba be tɛ bushunu kɔ agɛ yɛ abala sɛ tɛ ɛklu kebhui nɛ belulu anɛ betsitsi.

⁶ Alasɛ kɛnɛ so gɛ baɖɔ Kibui Dzyɔgo na kɔ bagɛ etsi ɔtsɔ nɛ tsyɛ, se tɛ be klu kebhui na lɛ nɛ́ banɔ tɛzɛza mɛ nu nɛ kɔ ishuidzya, pɔ nɔ za nɛ Kpaya tɛzɛzaɛ mɛ anɛ́ ɔfufɔɛ tɛ pɛpɛɛ mɛ.

⁷ Ebui nɛ petee obekekɔ lɛ tsobunɔ. Kɛlɛso kɔ wɔɛ tɔkpu mɛ bhui anɛ̀ ishu-nyɛnyɛna sɛ tɛ nɔ na kpayaklu.

⁸ Nɛ alɛlɛ petee ede, dɛmɛnɔ nɛ ɔhaglɔ mɔmɔ, alasɛ tɛdɛdɛmɛnɔ la dɛ ebuizizi gelee.

⁹ Yɛkɛ ɔhaglɔ ɔkpɛ bupa mɛ nɛ ishu matsimatsi.

¹⁰ anɔnyanɔ awa kɛdɔnɔ gɛ ayɛkɛ shu kɛxwɛ kɔ ɛhaglɔ, nɛ tɛyɛyɛkɛŋa mɛ gɛ kɛ nu Kpaya ɛyamyuyɔ edidedi

¹¹ Onugɛ anɔnyanɔ aba ɖɔ, abhɛtɛ lɛ anasɛ aɖɔ Kpaya ebui alɛlɛ, Onugɛ anɔnyanɔ adɛ axwɛ, abhɛtɛ lɛ nɛ̀ tɛgɛganɛ gɛ Kpaya akɔ yɛ, sɛ tɛ nɛ ebuinɛ petee mɛ ba bakpɛ Kpaya nyi nɛabha aganɔ Yesu Kristo abha. Kɔ yɛ kɛlɛ nu ishubhubhui anɛ̀ kemi denɔ mabeke ɔvɛnɔ mabeke. Tɛlɛbɛlɛm.

Butɔ Mumɔ Kɔ Kristoayɛ Dzidzi

¹² Ɛbhɛa mumɔa, kɛtɛ bhɛtɛ nɔɛ bi, butɔ kɛtɛkɛtɛ nɛ mɛ gɛ nɔɔ ga, anasɛ efui bui tili kɛlɛ bhɛtɛ nɔ.

¹³ Pɔ nɔ mɔ same sɛ nɔ bhɛtɛ tili nɛ Kristo butɔ mumɔ nɛ mɛ, sɛ tɛ nɔ bɔ mɔ same ɔflanɔ kibenɔ nɛ gɛ be bu yɛ ishubhubhui nɛ akasɛ.

¹⁴ Onugɛ ba kula nɔ nɛ Kristo kinyi nɛ shu, ba yula nɔ, alasɛ Ɔfufɔɛ shu bhubhui anɛ̀ Kpaya kitsri wɔnɔ abha.

¹⁵ Onugɛ nɔ mɔ butɔ, kɛtidzi anasɛ agɛ eyianɔ pɛnɔ ezi pɛnɔ ebuikpã bhlatɔ bhɛbhɛtɛ pɛnɔ ɔdɛsɛ anɔ gɛ akpɛ onugbu nɛ anɔ bhlatɔ kibuimɛ.

¹⁶ Pɔ, onugɛ nɔ mɔ butɔ anasɛ Kristoayɛ, nɔ tɛ kɔ kɛwɔɛ̃ ku nɔ, pɔ nɔ kpɛ Kpaya kinyi nɛabha sɛ nɔ dɛmɛ kinyi lɛlɛ.

¹⁷ Alasɛ kibe na kɔ kebhuikuklu tɛ kakpɛesi nɛ Kpaya yɛ beshopo nɛabha, klɛ onugɛ kɛkpɛesi nɛ́ bulɔ abha, kide lɛ ba dzi kɔ ba gɛ ba dɛ tatɔ nɛ̀ Kpaya kibui dzyɔgo?

¹⁸ Klɛ “Onugɛ kɛ gɛganɛ kɔ kɛdzyɔgo bhɛbhɛtɛ elete sɛ tɛ bebhuialɛ ayɛkɛ, kide kɛ ba dzi kɔ bagɛ ba kpɛ kɛtɔkpuesi kɔ bakpaya anɛ̀ bezizi?

¹⁹ Kɛlɛso ɔtsɔ̃nɛ, bagɛ ba mɔ butɔ nɛ Kpaya yɛ tɛpɛpɛɛ ba yɛkɔ balɛnahwɛ shu akpɛ balɛ tɛyɛyɛkɛŋa Abhɛbhɛtɛ abha klɛ bavɛ lɛabha tɛ ba za bhɛtɛ kɛdzyɔgo.