1 Petro 3 - ONUGBÙ NYƐNYÃ VUVƆ

Banyɛdzini Anɛ Badzɛenyine

¹ Banyɛdzini, nɛ kidzo lɛlɛ nɛabha nɔ zhinɔ ishuesi kɔ wɔnɔ nyine alɛ sɛ tɛ, onugɛ balɛ ma yɛ teli adɛ yɛkɛ kibui nɛabhaŋa tsyɛ, ba ba ŋa nɔabha gɛ kibui tɛ ba zɛ lɛ mɛ nɛ balɛ badzɛ nɛ ɛkpã zɛza nɛabha,

² kɛbe lɛlɛ gɛ ba mɔ wũnɔ ebui dzyɔgo bhɛbhɛtɛ nɛ ɛkpã dzyɔgo zɛza.

³ Wɔnɔ tɛpupudi kɛ ti de ɔtɔ ɛshu wũwũse, anasɛ kɛtɔkpu bhɛbhɛtɛ anɛ̀ sɛkadzɛdzã yɛ dɔ kpɛkpɛ anɛ̀ apɔtɛ dzyɔgo nyunyumu.

⁴ Kɛlɛmaza, kɛbadzi kɛ gɛ de wunɔ nahwɛ mɛ, bubite gɛ butɛ xule ishunyɛnyɛna anɛ̀ ishuvuvu ɔfufɔɛ, gɛ kɛ nu kedziŋɛŋa gbɛgbla nɛ Kpaya amɛ.

⁵ Alasɛ kɛnɛ kɛlɛ nu kidzo nɛabha badzɛ ishu bhubhui nɛ kibe lɛlɛ gɛ ba yɛkɔ balɛ kidzoenudidi akpɛ Kpaya mɛ ba ganɔ abhɛtɛ balɛ shu lɛ pundi. Be zhinɔ shu kɔ ba lɛ nyine,

⁶ anasɛ Sara, gɛ ata Abraham atɔ klɛ eklu yɛ asɛ yɛ apalete. Wũnɔ nu yɛ beyiadzɛ onugɛ nɔ bhɛtɛ kɛgɛ nu kɛdzyɔgo klɛ nɔ dɛ kɔɛdzo kifusisi.

⁷ Badzɛenyine, nɛ kidzoɛ lɛlɛ nɛabha nɔ za nɛ wɔnɔe dzini alɛ nɛ́ aglɔesi nunu nɛ̀ tɛ nɔ nyɛnalɛ nɛ bubu anasɛ bagɛ ba dɛ gɛganɛ anasɛ wɔnɔ klɛ alasɛ wɔnɔ editabha nɔ yɛkɛ ɛkpã ɛyɛmɛyuyɔ, sɛ tɛ kɛdɔnyɛdɔ tɛ ba xedzo kɔ nɔ kpayakuklu.

Butɔ Kɔ Kɛdzyɔgo Bhɛbhɛtɛmɛ

⁸ Gugɔɛ, wũnɔ petee nɔ za nɛ aglɔbha nɛ terikpo bhɛbhɛtɛ mɛ anɛ aglɔ pɛplɛnɔɛ mɛ, nɔ dɛmɛnɔ aglɔ anasɛ badzya, nɔ di aglɔ eshutukubui nɛ ishunyɛnyɛna.

⁹ Nɔ tɛ yɛkɔ kibui kpã ɔbuya kɛbhɛ kɔ kibui kpã bhɛbhɛtɛ pɛnɔ tɛkukla kɔ tɛkukla, pɔ nɛ̀ tɛ yuyula, alasɛ kɔ kɛnɛ be klu nɔ sɛ tɛ nɔ bɔ yɛkɛ tɛyuyula kededɔ.

¹⁰ Alasɛ, “Anɔ nɛ gɛ aba dɛmɛnɔ ɛkpã klɛ amɔ ewui dzyɔgo azɛkɔlɔ ebuikpã ɖɛɖɔ nɛ yɛ nɛkɛ klɛ tɛ ada onugbu akpɛ yɛ kɛnɛkɛ nɛ ebuizizi kaɖɔ ɖɛɖɔ shu.

¹¹ Alasɛ tɛ etsodzi nɛ kiziziede klɛ tɛ abhɛtɛ kɛdzyɔgo, alasɛ tɛ apɛɛ ishuyuyɔ klɛ tɛ abhɛtɛ atrɔ kɛlɛ abha.

¹² Alasɛ Apalete nɛ awɔ̃hu etsri bagɛ ba bhɛtɛ kɛdzyɔgo nɛabha klɛ yɛ batɔ alɛ yɛ kpayakuklu shu, pɔ Apalete amɛ alɔɛ titi nɛ bagɛ ba bhɛtɛ kizizi shu.”

¹³ Ane gɛ ebe zi nɔ onugɛ nɔ trɔ sɛ tɛ nɔ bhɛtɛ kibui dzyɔgo?

¹⁴ Pɔ tsyɛ onugɛ nɔ bɔ mɔ butɔ kɔ kɛgɛ nu kɛdzyɔgo, ba yula nɔ. “Nɔ tɛ sifu kɔ kɛgɛ be si, kifu tɛ ku nɔ.”

¹⁵ Pɔ nɛɛ wɔnɔ idzyi mɛ nɔ kpɛ Kristo ɔtɔ́ anasɛ Apalete. Kibenyɛbe nɔ bala tɛ nɔ kɔ kibuiesibubu anɔnyanɔ gɛ ebe bisi sɛ nɔ kɔ kesinunu kɔ kidzoenudidi gɛ lɛ wũnɔ ahwɛ. Pɔ nɔ bhɛtɛ lɛ nɛ ishunyɛnyɛna nɛ̀ yɛ kpɛkpɛ abha,

¹⁶ wɔnɔ idzyi mɛ ebhui, sɛ tɛ bagɛ ba ɖɔ ebuikpã nɛ wũnɔ ɛkpã kɛdzyɔgo zɛza nɛ Kristo mɛ kɛwɔ̃ɛ ba kualɛ nɛ́ balɛ ebui ɖuɖɔ nɛ shu.

¹⁷ Kɛ pɛ̃ndɛ, onugɛ ki nu Kpaya tɛpɛpɛɛ, sɛ nɔ mɔ butɔ kɔ kɛdzyɔgo bhɛbhɛtɛ dɛ sɛ kizizi bhɛbhɛtɛ.

¹⁸ Alasɛ Kristo etsi kɔ kizizi butsi tirikpo ko, kɔ banɔ dzyɔgo anɛ be zizi tɛ agbanɛ nɔ avɛnɔ Kpaya kɔ. Be yii yɛ nɛ ishuidzya mɛ pɔ ba bhɛtɛ yɛ alɛ nɛ ɛkpã ganɔ ɔfufɔɛ abha,

¹⁹ ɔganɔ agɛ yɛ tsyɛ avɛ klɛ ada ɖɔ kibui dzyɔgo etsre ɔfufɔɛ nɛ buvu

²⁰ agɛ adɛ tatɔ kibe dzidze bafla gɛ Kpaya epo nɛ ishunyɛnyɛna mɛ nɛ Noah ewui nɛabha gɛ àfatɛ yɛ otsyokpo. Nɛ ɔlɛ mɛ banɔ bhliyi ko, banɔ petee balɛ tɛɔsɔɛ, balɛ be bhuiayɛkɛ ɔganɔ buni mɛ,

²¹ klɛ buni nɛ bu ba dzi bunikpɛkpɛ gɛ ɔtsɔnɛ bubhui nɔ tsyɛ ɔyɛkɛ—ganɛ kibo bubu nɛ ishuidzya shu pɔ tɛtɛtrɔ ɛkpã dzyɔgo zɛza kɔ Kpaya. Kɛ yɛkɛ kɔ nɔ ganɔ Yesu Kristo yɛ tɛnyɛnyɛmɛ denɔ bekpuimɛ,

²² gɛ avɛ owũsise klɛ ada za Kpaya yɛ ŋamɛ—nɛ baxwɛdɛ, kabhaŋɛŋa anɛ kɛmi anɛ ishuzhizhinɔ kesi kɔ yɛ.