1 Petro 2 - ONUGBÙ NYƐNYÃ VUVƆ

¹ Kɛlɛso, nɔ bu wɔnɔshu denɔ ebuikpã petee mɛ, anɔwuwɔɛ, otro petee, awɔ̃dzɛdzã anɛ anɔshuzizi kanyakaɛ di.

² Anasɛ beyi mumɔvuvɔ, bu ku alɛ li kɔ ɔfufɔɛ mɛ bumɔni dzyɔgo, sɛ tɛ ganɔ bu lɛ abha nɔ bɔna she nɛ wunɔ tɛyɛyɛkɛkɔ,

³ ɔtsɔnɛ gɛ ɔmɔ sɛ Apalete nɛ apɛ̃.

Ɛkpã Kɛklãgbu Anɛ Banɔ Kuklu

⁴ Gɛ ɔba yɛ ɔkɔ, ɛkpã kɛklãgbu—banɔ ba shɛnahwɛ lɛ shu pɔ kɛlɛ Kpaya ebu klɛ kɛ ŋaedzi kɔ yɛ—

⁵ wũnɔ tsyɛ anasɛ ɛkpã aklaŋgbu, ba yɛ kɔ nɔ edzu akpɛ ɔfufɔɛ buvu sɛ tɛ bu dzi kpayazakɔanɔ kɛxwɛwɛwa, ɔfufɔɛmɛ dɔ gɛ bakɔ kɔ bugu gɛ kɛku Kpaya aŋɔ ɔganɔ Yesu Kristo abha.

⁶ Alasɛ nɛ Kpaya keplukpa nɛ mɛ ba ɖɔ sɛ: “Di, idzu kɛklãgbu nɛ Zion, gɛ be bu ansɛ ɔxãkɔɛklãgbu ŋɛŋɛedzi, klɛ agɛ ayɛkɛ yɛ abhaŋa ba tɛba kpɛ yɛ wɔ̃ɛ.”

⁷ Ɔtsɔ̃ nɛ kɔ wɔnɔagɛ ɔyɛkɛŋa, sɛ kɛklãgbui nɛ ŋɛedzi. Pɔ kɔ bagɛ ba dɛ yɛkɛŋa, “kɛklãgbu nɛ gɛ bevudzu na dɛ yɛkɛ kɛ badzi ɔxãkɔɛ kɛklãgbu,”

⁸ klɛ, “Kɛklãgbu gɛ kɛkɔ banɔ ba bakpatanɔ klɛ kɛklãgbu gɛ kɛ ba kɔ alɛ doboe.” Badɔ oboe alasɛ ba dɛ bhɛtɛ atrɔ kibui ɖɛɖɔ nɛabha—kɛlɛ tsyɛ kɛnu kɛ gɛ ba pɛɛ kɔ alɛ.

⁹ Pɔ wũnɔ nu banɔ kuklu, bukusiupa kpayazakɔanɔ, amɛbhubhui madi, anɔ gɛ enu Kpaya ayɛ, gɛ nɔ bɔ buɖɔ yɛ tɛkpɛkpɛ abha gɛ eklu nɔ denɔ otumu mɛ akpɛ yɛ kibui yinanɔ obhubhuikɔ.

¹⁰ Kibe tili bafla nɔ di dzi anɔ, pɔ ɔtsɔnɛ nɔ nu Kpaya banɔ, kibe bafla nɔ dɛ yɛkɛ eshutukubuididi, pɔ ɔtsɔnɛ nɔ yɛkɛ eshutukubuididi.

¹¹ Ɛbhɛya mumɔa, ɛpɛɛ denɔ wũnɔ kɔ anasɛ befu nɛ ɛma bhlatɔɛ mɛ elete nɛ kanɔ nɛ mɛ, tɛ nɔ zukɔlɔ ebuikpã bhɛbhɛtɛ, gɛ la ta keyu nɛ wɔnɔ atɔwui.

¹² Nɔ za ɛkpã dzyɔgoe nɛdi nɛ ibuidielete, sɛ kɛlɛlɛmɛ ba be bu nɔɛ pɔ sɛ nɔ bhɛtɛ kizizi, ba ba ba mɔ ɛnɔ ebui dzyɔgo bhɛbhɛtɛ klɛ ba ba kpɛ Kpaya nɛabha nɛ kiwui nɛ gɛ aba ba bulɔ kɔ.

Ishuzhizhinɔesi Kɔ Bagɛ Baŋɛabha Anɛ Bapalete

¹³ Apalete nɛ so nɔ zhinɔ ishuesi kɔ kabhaŋɛŋa kanyaka gɛ be lu nɛ banɔɛ shi, kɛbadzi sɛ kɔ ekusi anasɛ kabhaŋɛŋa lete gbɛgbla,

¹⁴ pɛnɔ kɔ ɔma bekusi gbɛgbla, gɛ asɛsɛ sɛ atɛta batɔ kɔ bagɛ ba bhɛtɛ kizizi klɛ tɛ akpɛ alɛ nɛabha bagɛ ba bhɛtɛ kibui dzyɔgo.

¹⁵ Alasɛ kɛ nu Kpaya tɛ pɛpɛɛ sɛ nɔ bhɛtɛ kɛdzyɔgo nɔ bɔ zukɔlɔ bugã matimati banɔ kaɖɔ ɖɛɖɔ.

¹⁶ Nɔ za anasɛ banɔ gɛ balɛ ɛshuahwɛ, pɔ nɔ tɛ yɛkɔ ishuahwɛzɛza kɔ kidzo kɔ kizizi, nɔ za anasɛ Kpaya baxwɛdɛ.

¹⁷ Tɛ dzuamɛ nɛ anɔkanyaka: Nɔ dɛmɛ badzya busɔlɛsɔlɛ, si Kpaya fu, kpɛ ekusi nɛ tɔkpu nɛabha.

¹⁸ Baxwɛdɛ, nɔ si wũnɔ bapalete nɛ̀ fu anɛ ishu zhizhinɔ mɛ petee, ganɛ kɔ ba gɛ bapɛ̃ gɛ ba dɛmɛ kɛ kanyaka, pɔ kɔ bagɛ ba lɛ kanya nɛ tsyɛ.

¹⁹ Alasɛ ki nu tɛyɛyɛkɛ kpɛ lɛ mɛ sɛ onugɛ anɔ amɔ butɔ gɛ bu ma kidzo abha alasɛ Kpaya so abhɛtɛ lɛ.

²⁰ Pɔ kɛ dzyɔgo ɖuweɖu lɛ ba dzi kɔ wɔ onugɛ ɔbhɛtɛ kɛdɔzizi klɛ be tu wɔ pɛ ɔza kɛlɛ nu? Pɔ onugɛ ɔmɔ butɔ nɛ kibui dzyɔgo bhɛbhɛtɛ mɛ klɛ ɔza kɛlɛ nu, Kpaya tɛdɛdɛmɛ lɛ nu.

²¹ Kɛnɛ nɛ so gɛ be klu nɔ, alasɛ Kristo amɔ butɔ nɛ wũnɔɛ tɔkpu, klɛ abhɛtɛ dɔ akasɛ elu kɔ nɔ sɛ tɛ nɔ za yɛ ɛtsrɛ bubuede.

²² “Kristo adɛ bhɛtɛ kizizi, klɛ otro huhu odi koeyi nɛ yɛ onugbui mɛ.”

²³ Gɛ ba sɛsɛ balɛ akulatu nɛ yɛ abha, adɛ tsodzi akula lɛ, onugbu gɛ amɔ butɔ, adɛ kpɛ anɔɛ fu. Nɛlɛɔzakɔ, ayɛ kɔ ishu atrɔ agɛ yɛ kluebhui dzyudzyɔ nɛabha.

²⁴ Kristo nahwɛ ayɛkɔ bulɔ ebuizizi nɛ akpɛ ishuidzya mɛ nɛ osi nɛ shu, sɛ tɛ bu ba tsi kɔ kizizi klɛ bu za nɛ ɛkpã kɔ kɛdzyɔgo bhɛbhɛtɛ, yɛ apɔ la kɔ sɛ bunya koeyi nɛ bulɔ shuimɛ.

²⁵ Alasɛ nɔ dzi anasɛ Ibhoshi gɛ lɛ lɛlaɛdzo, pɔ ɔtsɔ̃nɛ nɔ tsodziɔba Agbɛgbanɛ nɔ kɔ Kpayaɔzakɔanɔ gɛ edi wɔnɔ atɔwui abha,