1 Petro 1 - ONUGBÙ NYƐNYÃ VUVƆ

¹ Mɛ Petro, Yesu Kristo anɔkpɛkpɛ, Ɛŋlɔmɛ kɔ Kpaya yɛ ekuklu, befu nɛ kanɔ nɛ mɛ, gɛ bakɛkaku Ponto, Galatia, Kapadokia, Asia anɛ Bitinia,

² gɛ be klu nɛ́ Kpaya Aka yɛ dɔdidi kpɛ otugba, ganɔ Ɔfufɔɛ nɛ kɛxwɛwɛwa nɛ shu dɛdanɛ kɔ batɔ tɛta Yesu Kristo klɛ nɛ yɛ dzyosu tɛtɛta balɛ: Kɛdɔkukɔ anɛ ishuyuyɔ dzi wɔnɔɛ yɛ nɛ tɛkpikpe mɛ.

Kpaya Kabhakpɛkpɛ Kɔ Ɛkpã Kidzoenudidi

³ Kabhakpɛkpɛ kɔ Kpaya anɛ Aka bulɔ Apalete Yesu Kristo! Nɛ yɛ eshutukubuididi gbɛgbla mɛ akɔ lɔ tɛmumɔ vuvɔ akpɛ nɛ ɛkpã kɛdzoenudidi mɛ ganɔ Yesu Kristo tɛnyɛnyɛmɛ denɔ bekpui mɛ,

⁴ klɛ bu di otugba kɔ kededɔŋɛŋa gɛ kɛtɛ ba tsi, kɛtɛbazi, pɛnɔ kɛbakpã—gɛ babala lu kɔ nɔ nɛ owũsise,

⁵ ganɔ agɛ tɛyɛyɛkɛŋaɛ abha Kpaya kemi kakpɛ buka kpɛ ɔdɔtɔnɔ kibe nɛ gɛ tɛbhubhuiyɛkɛ kɔ ba kɛlɛ nu tɛbubukasɛ nɛ kibe gugɔɛ nɛabha.

⁶ Nɛ kɛnɛ nɛ mɛ nɔ mɔ same gbɛgbla, nɛlɛmɛ ɔtsɔ̃nɛ kɔ kibe bhliyi nɔ tɛ mɔ butɔ gelee edidedi nɛ̀ tɛfifekedi mɛ.

⁷ Anɛ na ba sɛ tɛ wũnɔ tɛyɛyɛkɛŋa—kɛŋaɛdzi gbɛgbladɛ kɔba dzɛdzã, gɛ etsi nɛlɛmɛ sɛ ba yɛ kɔ kifu eŋuse lɛ nɔ—gɛ kɛbakasɛ sɛ kɛnu kɛdzyɔgo klɛ kɛbakɔ tɛkpɛkpɛabha, samɛ kpɛkpɛ anɛ tɛfifeke kabhakpɛkpɛ kɛbelɛlɛ gɛ Yesu Kristo aba ba.

⁸ Nɛlɛmɛ sɛ nɔ kɔ mɔɛ yɛ odi, nɔ dɛmɛ yɛ bui, klɛ ɛlɛmɛ tsyɛ nɔ tɔ mɔ yɛ ɔtsɔnɛ, nɔ yɛkɛ yɛabhaŋa klɛ nɔ yuku nɛ maɖɔmaɖɔ nɛ kabhakpɛkpɛ same,

⁹ alasɛ nɔ yɛkɛ wũnɔ tɛyɛyɛkɛŋa bhɛ, wũnɔ atɔwui tɛbhubhuiyɛkɛ.

¹⁰ Nɛ tɛbhubhuiyɛkɛ nɛ shu, batɔnu, gɛ ba ɖɔaɖɔ denɔ ɛyɛmɛyuyɔ gɛ kɛ ta ba kɔ nɔ, be tsuɛ lɛ mɛ mɔmɔ klɛ nɛ tɛnyɛnyɛna gbɛgbladɛ,

¹¹ ba wlãnkɛ sɛ tɛ beti kibe klɛ nɛ la gɛ lalɛ alɛshu kɔ Kristo Ɔfufɔɛ nɛ́ balɛ mɛ akasɛ kibe nɛ gɛ aɖɔ Kristo butɔ anɛ yɛ shu bhubhui gɛ kɛ ba za lɛede.

¹² Bebu akasɛ alɛ sɛ anɛ balɛ nahwɛ ba dɛ axwɛ kɔ pɔ wũnɔ, kibelɛlɛ gɛ ba ɖɔ ebuianɛ gɛ ɔtsɔnɛ be tsre nɔ bagɛ balɛ ɖɔ Kibui Dzyɔgo kɔ nɔ nɛ Ɔfufɔɛ Dzyɔgo ba sɛsɛ denɔ owũsise. Baxwɛdɛ kuratsyɛ ba pɛɛ kukuku sɛ tɛ be di ebuia nɛ mɛ.

Kɔ Wɔnɔshu Bhui

¹³ Kɛlɛso nɔ kpɛ kɛtɔkpu mɛ kɔ tɛbhɛbhɛtɛ, nɔ nyɛna shu, nɔ za kidzodidi abha mɔmɔ kɔ kɛdɔkukɔ kɔ tɛ ba kɔ nɔ kibelɛlɛ nɛ gɛ be be bu Yesu Kristo akasɛ.

¹⁴ Anasɛ banuvɔ gɛ ba tatɔ, nɔ tɛ kɔ ebuizizi pɛpɛɛ laza wũnɔ ahwɛ kibelɛlɛ nɛ gɛ nɔ za matimati mɛ.

¹⁵ Pɔ anasɛ agɛ eklu nɔ yɛ shu bhui, kɛlɛso nɔ kɔ wũnɔ shu bhui nɛ́ alɛ petee gɛ nɔ bhɛtɛ,

¹⁶ alasɛ ba ŋlɔmɛ elu asɛ: “Nɔ kɔ wɔnɔ shu bhui alasɛ Mɛ shu bhui.”

¹⁷ Kɛbɛlɛmɛ gɛ nɔ klu Aka gɛ eklubhui nɛ̀ anɔnyanɔ yɛ kɛxwɛwɛwa amɛ madimadi, nɔ za nɛ kpã anasɛ befu nɛ ɔkɛnɛ nɛ́ kifusisi mɛ.

¹⁸ Alasɛ nɔ nyi sɛ ganɛ nɛ́ kɛdɔzizi anasɛ sɛkafrɛrɛ pɛnɔ sɛkadzɛdzã gɛ ba yɛkɔ ayɛkɛ nɔ nɛ́ kɛdzo kpɛkpa ɛkpã gɛ ba shɛnahwɛ elu kɔ nɔ denɔ wũnɔ bakashishe be.

¹⁹ Pɔ nɛ Kristo dzyosu ŋɛŋaɛdzi, obhoshieyi gɛ kɛpɔ ɔdɔgɔsɛ ozizikɔ ma ɔlɛ shu.

²⁰ Be klu yɛ flogo gɛ ba bhɛtɛ kanɔ, pɔ be bui yɛ akasɛ nɛ ewia gugɔɛa nɛ mɛ nɛ́ wũnɔɛ tɔkpu.

²¹ Ganɔ yɛabha nɔ yɛ kɛ Kpaya abhaŋa, agɛ anyɛmɛ yɛ edenɔ bekpui mɛ klɛ akpɛ yɛ nyi nɛabha klɛ so wũnɔ tɛyɛyɛkɛŋa nɛ yɛ kidzo abha didi lɛ Kpaya mɛ.

²² Ɔtsɔnɛ gɛ nɔ tɛ plu shu ɔganɔ batɔ tɛta kɔ kibui gbɛagba sɛ tɛ nɔ yɛkɛ tɛdɛdɛmɛnɔ mumɔ kɔ wũnɔ adzyalɛ, tɛdɛdɛmɛnɔ nɛ ɔhaglɔ globoo, denɔ idzyi nɛ mɛ.

²³ Alasɛ betsodzi nɔ amɔ, anɛ kiyi zizi, pɔ nɛ́ mazimazi, ɔganɔ Kpaya ɛkpã zɛza nɛ ebui bhɛbhɛtɛ.

²⁴ Alasɛ, “Banɔ petee bedzi anasɛ tɛwa, klɛ balɛ ishukpɛkpɛ abha petee edzi anasɛ osifufu nɛ́ ayakpamɛ, tɛwa nɛ yɛrɔ klɛ efufu na wɔlɛ,

²⁵ pɔ Apalete nɛ bui nɛ lɛ kibenyɛbe.” Klɛ kɛnɛ kɛlɛ nu kibui gɛ ba ɖɔaɖɔ tsre nɔ.