1 Kɔrintioanɛ 7 - ONUGBÙ NYƐNYÃ VUVƆ

Kaɖɔɖuɖɔ Nɛ Tɛgbɛgbanɔ Shu

¹ Ɔtsɔnɛ denɔ kibui gɛ nɔ ŋlɔmɛ nɛ shu: Kɛ pɛɛ kɔ anyɛ sɛ tɛ atɛ gbanɔ adzɛ.

² Pɔ gɛ aglɔbui bhɛbhɛtɛ ekpe so nɛɛ, anyɛnyanyɛ adzɛnyadzɛ aza yɛ nahwɛ ahwɛ, klɛ adzɛnyadzɛ anyɛ aza yɛ nahwɛ ahwɛ.

³ Anyɛ abhɛtɛ atrɔ adzɛ gbɛgbanɔ xwɛ kɔ yɛedzini, klɛ kanakɛ adzɛ tsyɛ abhɛtɛ kɔ yɛenyine.

⁴ Adzɛ nɛ shuidzya dɛ nu yɛ tite yɛ́ ko pɔ le nu anyɛ nɛ tsyɛ yɛ. Nɛ kidzo lɛlɛ nɛabha, anyɛ nɛ tsyɛ shuidzya dɛ nu yɛ tite yɛ ko pɔ lɛ nu adzɛ nɛ yɛ́.

⁵ Nɔti gbe ishu kukɔ ɔhaglɔ odi nu sɛ wunɔ tɛabha nɛ tɛtɛtrɔ klɛ kɔ kibe, sɛ tɛ nɔ kɔ kpayakuklu. Nɔ tsodzi ɔba aglɔbha zia sɛ tɛ Satana eti be feke nɔ edi alasɛ nɔ̀ dɛ ŋa ɛshuabha.

⁶ Itsre nɔ kibui nɛ anasɛ kidzo kukɔ, ganɛ anasɛ ɔshã.

⁷ Ɛpɛɛ sɛ tɛ banɔ petee ba za anasɛ mɛ. Pɔ anɔnyanɔ gɛ ayɛkɛ yɛ nahwɛ ɛyɛmɛyuyɔ denɔ Kpaya kɔ, anɔ teli ayɛkɛ ɛyɛmɛyuyɔ ɛnɛ, klɛ abhlatɔ ayɛkɛ kɛ lɛlɛ.

⁸ Ɔtsɔnɛ kɔ bagɛ ba dɛ gbanɔ aglɔ anɛ̀ banyɛtsi ɛɖɔ sɛ: Kɛbɔ kɔ alɛ sɛ tɛ ba za kɛgba, anasɛ mɛ.

⁹ Pɔ onugɛ ba ta na ishu nyɛna, kɛlalɛ ba ba gbanɛ aglɔ, alasɛ kɛ pɛɛ sɛ tɛ ba gbanɔ aglɔ dɛ sɛ ba za tɛ ishu zɛ wɔ̃sɛ alɛ.

¹⁰ Kɔ bagɛ ba gbanɛ aglɔ ɛkpɛ ɔshã nɛ (anɛ mɛ, pɔ Apalete): Adzɛ ama sɛ tɛ egbe yɛenyine.

¹¹ Pɔ onugɛ gɛ egbe anyɛ, alasɛ tɛ aza kɛgba kɛlɛ mazɛlɛ mɛ tsodzi ɔdɔ ɔbhɛtɛ tɛrikpo nɛ anyɛ kuku. Klɛ anyɛ tsyɛ adɛ mɔ kidzo sɛ tɛ egbe yɛ edzini.

¹² Ɛɖɔ kibui nɛ kɔ wunɔ banɔ gugɔɛ (Mɛ, ganɛ Apalete): Onugɛ adzya teli agbanɔ adzɛ gɛ edɛ nu ayɛyɛkɛŋa klɛ apɛɛ asɛ tɛ aza nɛ yɛ, ama sɛ tɛ anyɛ nɛ ashɛ̃nahwɛ yɛ shu.

¹³ Kana ke onugɛ adzɛ edzi nɔ anyɛ gɛ edi nu ayɛyɛkɛŋa klɛ apɛɛ asɛ tɛ azanɔ yɛ, ama sɛ tɛ adzɛ ashɛ̃nahwɛ anyɛ nɛ shu.

¹⁴ Alasɛ anyɛ mayɛkɛŋa ba kɔ yɛ shubhui aganɔ adzɛ nɛabha, klɛ adzɛ mayɛkɛŋa ba kɔ yɛ shubhui ganɔ anyɛ nɛabha. Odi nu kana wɔnɔ yialɛ balɛ shu tɛ ba bhui, pɔ anasɛ gɛ kɛ lɛ, balɛ shu bhui.

¹⁵ Pɔ onugɛ agɛ adɛ yɛkɛŋa ashɛ, kɔ yɛ ashɛ. Anyɛ ɔdɔgɔsɛ adzɛ nɔɔ nɛ gɛ ayɛkɛaŋa ba dɛ nya yɛ akpɛ tɛzɛzɛlɛ nɛ di mɛ, Kpaya eklu lɔ se bu za ishu yuyɔ mɛ.

¹⁶ Kɛlɛ wɔ onyi, adzɛ, sɛ obo bhui wɔenyinɛ ɔyɛkɛ? Pɛnɔ, kɛlɛ wɔ onyi, anyɛ, sɛ obo bhui wɔedzini ɔyɛkɛ?

¹⁷ Anɔnyanɔ aza ɔkɛlɛ gɛ alɛ nɛ ɛkpã mɛ sɛ kɛgɛ Apalete nɛ akɔ yɛ klɛ kɔ kɛgɛ Kpaya eklu yɛ. Kɛnɛ kɛlɛ nu ɔshã nɛ gɛ ɛlu nɛ busɔlɛha petee mɛ.

¹⁸ Bɛ ti bhui bunyɛnyɛ kɔ anyɛ nɛ kibe lɛlɛ nɛ gɛ be klu yɛ? Atɛ be dzi anyɛ gɛ edi bhui bunyɛnyɛ. Bɛ di bhui bunyɛnyɛ kɔ anyɛ kibe lɛlɛ nɛ gɛ be klu yɛ? Eti dzi anɔ gɛ be bhui bunyɛnyɛ kɔ.

¹⁹ Bunyɛnyɛ bhubhui dɛ nu kɛdɔnyɛdɔ klɛ bunyɛnyɛ mabhuimabhui dɛ nu kɛdɔnyɛdɔ. Kpaya ɛshã bha bhɛbhɛtɛ alɛ nu ebui.

²⁰ Anɔnyanɔ àwɔ tɛzɛza nɛ mɛ gɛ aza flogo gɛ Kpaya eklu yɛ.

²¹ Anɔ dzidzi wɔ dzi flogo gɛ be klu wɔ? Tɛ kɔɛ lɛ kpɛ wɔ bunuhu—kɛlɛlɛmɛ onugɛ ɔbɔ na kidzo mɔ sɛ tɛ ɔza ishuahwɛ, bhɛtɛ lɛ.

²² Alasɛ anɔ nɛ gɛ edzi anɔdzidzi kibelɛ nɛ gɛ Apalete nɛ eklu yɛ enu Apalete anɔ gɛ kibunyɛbui dɛ nyɛna yɛ; kanake, anɔ nɛ gɛ alɛ ishuahwɛ flogo gɛ be klu yɛ enu Kristo anɔdzidzi.

²³ Bɛ dzi nɔ nɛ̀ kɛdzi ŋɛŋa, nɔ tɔ dzi banɔ anɔdzidzi.

²⁴ Mɛayalɛ, anɔnyanɔ aza plɛnɔ Kpaya, aza tɛzɛza nɛ mɛ gɛ aza flogo gɛ Kpaya eklu yɛ.

²⁵ Ɔtsɔ̃nɛ nɛ badzɛ gɛ be ke ti anyɛa pɛ mɛ: Kabhaŋɛŋa ka ma mɛ ahwɛ denɔ Apalete nɛ ɔkɔ, pɔ ikulu kebhui ansɛ anɔ gɛ ganɔ Apalete nɛ eshutukubui didi mɛ ana gɛ ba ba yɛkɛ yɛa bha ŋa.

²⁶ Alasɛ nɛ ɔtsɔ̃ nɛ batɔ nɛ shu so, ɛyɛkɛŋa sɛ kɛ nu kibui dzyɔgo kɔ nɔ sɛ tɛ nɔ za anasɛ gɛ nɔ lɛ.

²⁷ Ɔgbanɔ adzɛ? Tɛ pɛɛ sɛ tɛ ɔshɛnahwɛ adzɛ nɛ shu. Agbalɛgba wɔ nu? Tɛ dɔ pɛɛ adzɛ sɛ tɛ ɔgbanɔ.

²⁸ Pɔ onugɛ ɔgbanɔ adzɛ, ɔdɛ bhɛtɛ kibui zizi, klɛ adzɛ gɛ eti nyi anyɛ azanɔ anyɛ, adɛ bhɛtɛ kibui zizi. Pɔ bagɛ ba gbanɛ aglɔ ba ba tsyanɛ butɔ gelee nɛ ɛkpã ɛnɛ mɛ, klɛ ɛba pɛɛ sɛ tɛ ɛbu nɔ nɛ kɛnɛ nɛ mɛ.

²⁹ Kibui nɔ nɛ gɛ ɛɖɔ, badzya mɔ, kɛ nu sɛ kibe dɛ dze. Denɔ ɔtsɔnɛ bagɛ bagbanɔ adzɛ ba za anasɛ sɛ adzɛ ama balɛ ahwɛ,

³⁰ bagɛ be biyo, anasɛ onugɛ be di biyo, ba gɛ ba mɔ same, anasɛ ba dɛ mɔ same, bagɛ be dzi dɔ tili, anasɛ kɛ dɛ nu balɛ yɛ tɛ ba bala,

³¹ bagɛ ba wa kanɔmɛ dɔ shui xwɛ, ansɛ onugɛ kɛ ma lɛ li. Alasɛ kanɔ anɛ, kalɛ tɛzɛzamɛ ɔtsɔ̃ nɛ ka ga fla.

³² Ɛba pɛɛ kɔ nɔ sɛ nɔ tɔ vɛ kɛtɔkpu mɛ fãã nɛ kanɔmɛ ebui shu. Anyɛ agbalɛgba yɛ tɔkpu mɛ lɛ Apalete nɛ kibui shu—kana gɛ aba kɔ yɛ bui za Apalete nu li.

³³ Pɔ anyɛ gɛ agbanɔ adzɛ yɛ bui nyɛbui lɛ kanɔɛmɛ dɔ shu—kana gɛ aba bhɛtɛ gɛ yɛ kibui ba za adzɛ nu li—

³⁴ klɛ yɛ agɛ apɛɛ nɛ ama terikpo. Adzɛ agbalɛgba ɔdɔgɔsɛ agɛ eti nyi anyɛ ayɛkɔ nɛ Apalete nɛ ebui mɛ: Yɛ bui kɛlɛ nu sɛ tɛ ayɛkɔ ishu akɔ Apalete nɛ ishuidzya anɛ ɔfufɔɛ mɛ. Pɔ adzɛ gɛ edzinɔ anyɛ yɛ buinyɛbui lɛ kanɔa nɛ mɛ ebui shu—kɛgɛ aba bhɛtɛ gɛ yɛenyine bui ba za yɛ li.

³⁵ Ɛɖɔ kibui nɛ kɔ wɔnɔ tɛpɛpɛ̃, ganɛ sɛ tɛ ɛtrɔ wunɔ abha, pɔ sɛ tɛ nɔ za kidzo dzyɔgo abha nɛ terikpo mɛ zɛza kɔ Apalete.

³⁶ Onu gɛ anɔ teli amɔ sɛ ata bhɛtɛ mɔmɔ avɛnɔ adzɛ gɛ eti nyi anyɛ gɛ akpɛ bunuwã kɔ, klɛ onugɛ aganɛ yɛ nɛ agɔ gelee mɛ klɛ amɔ nɛ ishui mɛ sɛ alasɛ tɛ agbanɔ adzɛ, abhɛtɛ anasɛ gɛ apɛɛ. Ataa bhɛtɛ buzizi. Alasɛ tɛ ba gbanɔ aglɔ.

³⁷ Pɔ anyɛ nɔ gɛ atɛ nyɛna kibui nɛ yɛnahwɛ kɛtɔkpu mɛ, gɛ ama tɛtɛtrɔ kanyakaesi pɔ aŋa ishua bha nɛ yɛ nahwɛ tɛpɛpɛɛ nu, klɛ atɛ bhɛtɛ yɛ kɛtɔkpu mɛ asɛ atɛ ba gbanɔ adzɛ nɛ gɛ eti nyi anyɛ, anyɛa nɛ tsyɛ abhɛtɛ kɛdzyɔgo.

³⁸ So nɛlɛmɛ, agɛ yɛ agbanɔ adzɛ gɛ eti nyi anyɛ abhɛtɛ kɛdzyɔgo, pɔ anyɛ nɔ gɛ adɛ pɛɛ sɛ tɛ agbanɔ yɛ abhɛtɛ kɛdzyɔgo dɛ.

³⁹ Adzɛ alasɛ tɛ ezhinɔ shu kɔ yɛ nyinɛ nɛ yɛ ɛkpã mɛ. Pɔ onugɛ anyɛ nɛ tsi, kidzo lɛ sɛ azanɔ anyɛnyanyɛ gɛ apɛɛ, pɔ anyɛ aza Apalete nɛ mɛ.

⁴⁰ Nɛ mɛ kibui mɛ bhubhui mɛ, same be ku adzɛ nɛ dɛ onugɛ alɛ anasɛ gɛ alɛ, klɛ mɛ mɔ sɛ mɛ tsyɛ Kpaya Ɔfufɔɛ ɔlɛ mɛ ahwɛ.