1 Kɔrintioanɛ 5 - ONUGBÙ NYƐNYÃ VUVƆ

Nɔ Shɛnahwɛ Adzya Gɛ Yɛshu Di Bhui

¹ B ɖɔɛ lɛ kɛgbɛagba sɛ aglɔbui bhɛbhɛtɛ akpasɛ wunɔ mɛ, klɛ anɛnɛdi kuratsyɛ lama bagɛ badɛyɛkɛŋa nɛ mɛ: Anɔ eklu yɛ akaedzini.

² Klɛ nɔ feke shu! Kide pɛ kɛ taa trɔ wɔnɔa bha pɛ no bo bu anɔa lɛ nɛɛdi nɛ ɔkasɛ?

³ Kɛlɛlɛmɛ tsyɛ sɛ ɛma wunɔ shi nɛ ishuidzya, ɛlɛ wunɔ bha nɛ ɔfufɔɛ mɛ. Klɛ ɛtɛ bu anɔ nɛ gɛ abhɛtɛ kibui nɛ di nɛɛ pɔ, anasɛ onugɛ ɛza wunɔ shi.

⁴ Kibe nɔ gɛ nɔ xogo nɛ Apalete Yesu nyi mɛ klɛ ɛlɛ wunɔɛ shi nɛ ɔfufɔɛ mɛ, klɛ bulɔ Apalete Yesu alɛ bulɔ shi,

⁵ nɔ yɛ kɔ anɔa nɛ ɔkpɛ ahwɛ kɔ Satana, tɛ ezi yɛ ebui zizi bhɛbhɛtɛ, se tɛ be bhui yɛ ɔfufɔɛ nɛ ayɛkɛ nɛ Apalete nɛ kiwui nɛabha.

⁶ Wunɔ ishufifeke nɛ mɛtã. Nɔ tɛ nyi sɛ bunayekedɔ bhliyi ba kpɛ nɛ ko bakpɛ nɛ mawɛ gelee mɛ?

⁷ Nɔ bu bunayekedɔ kuku sɛ tɛ nɔ dzi kɛtsu vuvɔ gɛ bunayekedɔ ma—anasɛ kɛlɛ nɛ gɛ nɔ lɛ. Alasɛ Kristo, bulɔ Tɛfɛflawui obhoshiyi, ba yɛkɔ lɔegu bugu.

⁸ Kɛlɛso nɔ kɔ lɔ ŋa Kiwui, ganɛ nɛ̀ bunaɛyekedɔ kuku, anɔshuzizi anɛ kɛtɔkpum gɛganɛ, pɔ nɛ gbɛ̃gbɛvu gɛ ba dɛ kpɛ bunaɛyekedɔ, tɛɖuɖɔ anɛ kɛgba gbɛ̃gbɛvu.

⁹ Ɛtɛ ŋlɔmɛ kpɛ keplukpa nɛ gɛ ɛkɔ wɔ nɛ mɛ sɛ ɔtɛ kpɛɔha nɛ bagɛ ba bhɛtɛ azhuzhɔlɛbui—

¹⁰ kanɔa nɛ mɛ banɔ gɛ amɛtsitsi ebui, ɔdɔgɔsɛ badɔŋa gbɛgbla anɛ bagɛ ba wɛa nɔ, ɔdɔgɔsɛ bagɛ ba kpɛtɔkpuesi kɔ kɛdɔbhubhɔ. Nɛ kɛɛ nɛ nɛ di mɛ alasɛ tɛ nɔ shɛ nɛ kanɔa nɛ mɛ.

¹¹ Pɔ ɔtsɔnɛ ɛŋlɔmɛ sɛsɛ nɔ sɛ nɔ tɔ ganɔ nɛ anɔnyanɔ gɛ ɛklu yɛ shu sɛ adzya pɔ abhɛtɛ aglɔbui pɛnɔ kɛdɔ gbɛgbla pɛpɛɛ, obudielete, anɔshu zizi, eluwɔ̃ɛ pɛnɔ ezi. Anɔa nɛdi tɔ ŋa ɛdɔ kura tsyɛ nɛ yɛ.

¹² Kɛxwɛ ɖuweɖu lɛ nu kɔ mɛ sɛ tɛ ɛkluebhui nɛ bagɛ ba ma busɔlɛ ɔha nɛ mɛ? Kɛ masɛ tɛ bu klu kebhui nɔ bagɛ ba lɛ busɔlɛɔha nɛ mɛ?

¹³ Kpaya ebe klu kebhui nɛ bagɛ ba ma bulɔɛ shi. “Nɔ bu banɔ kɛtɔkpu mɛ gɛganɛ elete nɛ wunɔɛ shi.”