1 Kɔrintioanɛ 4 - ONUGBÙ NYƐNYÃ VUVƆ

Kristo Yɛ Banɔkpɛkpɛ

¹ Kɛlɛ so, alasɛ banɔ ba yɛkɔ lɔ anasɛ Kristo baxwɛdɛ klɛ sɛ tɛ ba yɛkɔ Kpaya ebui kpukpu akpɛ alɛ ahwɛ.

² Ɔtsɔ̃nɛ kɛ bisi sɛ bagɛ ba tɛ yɛkɔ tɛkɛka nɛ anɔa bha akɔa lɛ alasɛ tɛ kɛkasɛ tɛyɛyɛkɛŋa.

³ Kɛ nu kibui bhliyi kɔ mɛ onugɛ wunɔ pɛnɔ Anɔdzyrame kebhui kanyaka, nɛlɛmɛ, ɛtɛ klu kebhui nɛ mɛnahwɛ kuratsyɛ.

⁴ Mɛ ebui mɛ ebhui, pɔ kɛdɛ kasɛ sɛ ɛma lɛ mɛ. Apalete yɛ klu kebhui nɛ mɛ.

⁵ Kɛlɛso tɛ klu kebhui nɛ kɛdɔnyɛdɔ flogo gɛ kibe nɛ ba na, za po ɔdɔtɔnɔ kibe gɛ Apalete aba ba. Ebe bu amɛna ɔtɔ kɛgɛ be kpu nɛ otumui mɛ klɛ abe bu eyinɔ kɛgɛ kpasɛ Anɔdzyrame idzyi mɛ. Kibe lɛlɛ anɔnyanɔ aba yɛkɛ yɛ kabhakpɛkpɛ denɔ Kpaya kɔ.

⁶ Ɔtsyɔnɛ badzya mɔ, ɛbhɛtɛ ebuianɛ kɔ mɛ shu kɔ wunɔ tɛpɛpɛ̃, sɛ tɛ nɔ kpasɛ dɔ denɔ bulɔ kɔ kesibubu kɔ kibui ɖɛɖɔɛ nɛ, gɛ kɛɖɔsɛ, “Tɛ̀ gafla kɛgɛ ba ŋlɔmɛ nɛ ede,” Ɔkɛlɛ nɔ tɛ bɔ yɛkɔ ishufifeke nɛ́ anɔ teli adɛ yɛ ɔhaglɔ.

⁷ So ane yɛ abhɛtɛ wɔ ɔgatɔ nɛ anɔ teli shu? Kide gɛ lɛ wɔ ahwɛ gɛ ɔdɛ yɛkɛ lɛ? Klɛ onugɛ ɔyɛkɛ lɛ, kɛdeso gɛ ɔfekeshu anasɛ kɛlɛlɛmɛ ɔdɛ na yɛkɛ?

⁸ Kɛdɔnyɛdɔ gɛ nɔ pɛɛ kɛtɛ ka wunɔ ahwɛ! Ehoeyielete nɔ tɛ dzi! Nɔ tɛ dzi bekusi—klɛ nɛ bulɔ mazɛlɛmɛ! Kana gɛ ɛpɛɛ sɛ tɛ kɛgbɛagba tɛ nɔ bɔ dzi bekusi sɛ tɛ bu badzi bekusi plɛnɔ wunɔ!

⁹ Alasɛ kɛkasɛ mɛ sɛ Kpaya atrɔ lɔ bakpɛkpɛ nɛ tɛbubukasɛ nɛ tɛzɛza nɛ́ obekekɔ, anasɛ banɔ gɛ bebhui butsipɔ kɔ sɛ tɛ be tsi nɛ bawɔfu ɔwɔkɔ. Babhɛtɛ lɔ kɛdɔmumɔ kɔ kanɔ petee, kɔ baxwɛdɛ ɔyɛkɔ plɛnɔ banɔ.

¹⁰ Nɛ Kristo so bu nu bagã, pɔ nɔ nyi bui alasɛ nɔ nu Kristo ayɛ! Bu dɛ gɛganɛ, pɔ nɔ gɛganɛ! Bakpɛ wunɔ tɔkpu nɛabha, klɛ be zhinɔ bulɔ yɛ akpɛesi!

¹¹ Ɔdɔ tɔnɔ ɔɖɔ nɛ mɛ bubhɛ nɛ oniwɛ ɔbɔ ta lɔ, bu lɛ apɔtɛ tsɛtsa mɛ, be tu lɔ klɛ bupa ma bulɔ ahwɛ.

¹² Bu wa axwɛ gɛganɛ nɛ bulɔ nahwɛ ahwɛ. Kibe nɔ nɛ gɛ ba ɖɔɛbui akpɛ lɔ, bulɔ bu yula; kibe lɛ gɛ bakpatɔnɔ lɔ, bu za kɛlɛ nu;

¹³ kibenɔ gɛ ba kula lɔ, bulɔ bu builɛ nu nɛ ishuyuyɔ. Denɔ ɔtsɔnɛ bu dzi kɛtɔ anɛ kesukpa, tɛwũlɔ nɛ kanɔ nɛ mɛ.

¹⁴ Ɛtɛɛ ŋlɔmɛ kɛ dɔɛnɛ tɛ ɛyɛkɔ kpɛ nɔɛwɔɛ nɔ, pɔ tɛ ɛyɛkɔ tsrenɛ nɔ anasɛ me yialɛ.

¹⁵ Kɛlɛlɛmɛ tsyɛ sɛ edzokasɛ kɛkpã tirikpo lɛ wɔ ahwɛ nɛ Kristo mɛ, baka gelee ba ma wɔnɔ ahwɛ, alasɛ nɛ Kristo Yesu mɛ ɛba dzi wunɔ aka ganɔ kibui dzyɔgo nɛabha.

¹⁶ Kɛlɛ so ɛ̀pɛɛ sɛ tɛ nɔ kpasɛ mɛ.

¹⁷ Nɛ kibui nɛ so ɛsɛsɛ nɔ Timotio, mɛ yi gɛ ɛdɛmɛnɔ, gɛ enu ayɛyɛkɛŋa nɛ Apalete mɛ. Aba baka nɔ mɛ kpã dzo gɛ ɛyɛ kɔ za Kristo Yesu ede, gɛ kɛsɔnɔ kɛdɔ gɛ ɛkasɛ nɛ ɔkɔnyɔkɔ nɛ busɔlɛ kanyaka mɛ.

¹⁸ Wunɔ eteli nɔ bɔ dzi ishufifeke lete, anasɛ agɛ ɛtɛ ka ba wunɔ bha.

¹⁹ Pɔ ɛba ba wunɔ bha kpata, onugɛ Apalete nɛ adɛmɛ, klɛ ɔkɛlɛ ɛba ba pɛɛ anɛ kana gɛ ba gɛ be fekeshu nɛ kaɖɔɖuɖɔ tite ko, pɔ sɛ tɛ ba pɛɛ bupu nɛ gɛ bulɛ balɛ ahwɛ.

²⁰ Alasɛ Kpaya Kusiŋakɔ budɛ nu kaɖɔ ɖɛɖɔ tite, pɔ bupu bui.

²¹ Kɛ ɖuweɖu nɔ pɛɛ? Ɛbá nɔ bha nɛ kishi, pɛnɔ nɛ tɛdɛdɛmɛnɔ ɖɛɖɔ nɛ ɔfufɔɛ shu nyɛnyɛna?