1 Kɔrintioanɛ 3 - ONUGBÙ NYƐNYÃ VUVƆ

Busɔlɛ Tɛyɛyɛ Shu

¹ Madzya lɛ, ɛtɛ ɖɔaɖɔ kɔ nɔ anasɛ ba gɛ ba lɛ ɔfufɔɛ mɛ pɔ ɛbaɖɔaɖɔ kɔ nɔ anasɛ kanɔe mɛ banɔ—bunuvɔɛ ko nɛ Kristo mɛ.

² Ɛkɔ nɔ bumɔni, anɛ kɛ ŋɛŋa gɛganɛ, alasɛ nɔ kɔ za tɛbɛbala mɛ kɔɛ lɛ. Kɛ lɛ lɛmɛ ɔtsɔnɛ tsyɛ nɔ kɔ za tɛbɛbala mɛ

³ Nɔ kɔ lɛ anasɛ kanɔ mɛ banɔ. Gɛ kawɔ̃kpɛ nɛ ebla pɛpɛɛ la lɛ wunɔɛ mɛ, anɛ kanɔɛmɛ banɔ nɔ nu? Sɛ nɔ bhɛtɛ ebui anasɛ banɔ tite ko?

⁴ Alasɛ kibe nɔ gɛ anɔ terikpo aɖɔ sɛ, “Paolo ya yɛ mɛ nu,” klɛ abhlatɔ asɛ, “Apolo ya yɛ mɛ nu,” anɛ banɔ tite ko nɔ nu?

⁵ Nɛ kɛlɛ mɛ, ane yɛ nu Apolo? Klɛ ane ye nu Paolo? Baxwɛdɛ ko bu nu, ganɔ balɛabha nɔ ba sɛ tɛ nɔ yɛkɛŋa—anasɛ gɛ Apalete nɛ akɔ anɔnyanɔ yɛ xwɛ.

⁶ Mɛ ɖa kiyi, Apolo akpɛ buni nɛ kɛlɛ shu, pɔ Kpaya ya kɔ lɔ she.

⁷ So ganɛ agɛ aɖa pɛnɔ agɛ akpɛ ɔlɛ ni kɛlɛ nu kibuinyɛbui, pɔ Kpaya tite yɛ nu, agɛ yɛ akɔ kɛdɔ she.

⁸ Anɔ nɛ gɛ aɖa klɛ nɛ agɛ akpɛ ɔlɛ ni kibui tirikpo kɛlɛ lɛ balɛ ahwɛ, klɛ ba ba buya kɛbhɛ kɔ akanyaka nɛ yɛ xwɛ wuwa nɛ nu.

⁹ Alasɛ bu nu Kpaya axwɛwa nɛ; wɔnɔ nu Kpaya yɛ ayakpa, Kpaya buvu.

¹⁰ Nɛ Kpaya kɛdɔkukɔ gɛ akɔ mɛ, idzu buvu nɛ kesi kpɛkpɛ dzyɔgo anasɛ evudzu gɛ avɛ otugba, klɛ anɔ teli tsyɛ èdzu atrɔ bulɛabha. Pɔ akanyaka nɔ edishuabha nɛ bulɛ tɛdzudzu.

¹¹ Alasɛ anɔnyanɔ atɛakpɛ buvu dzudzu nɛesi dɛ bu gɛ ba tɛ kpɛ, gɛ bu nu Yesu Kristo.

¹² Onugɛ anɔ teli edzu buvu attrɔ kesikpɛkpɛ nɛ gɛ ayɛkɔ sɛkadzɛdzã, sɛkafufu, aklãngbu gɛ aŋaedzi, isi, ekle ɔdɔgɔsɛ ekleshi,

¹³ yɛ kɛxwɛ nɛ ba kasɛ kɛdɔnɔ gɛ kɛ nu, alasɛ Kiwui nɛ ba bui lɛ yinɔ. Be be bui lɛ akasɛ nɛ kifu, klɛ kifu ba feke anɔnyanɔ kɛxwɛ nɛ tɛpɛpɛ̃ mɛ edi.

¹⁴ Onugɛ bu gɛ edzu atrɔ bu za, aba yɛkɛ yɛ bhɛ.

¹⁵ Onugɛ bu tã petee atɛ ba mɔ kɛdɔnyɛdɔ, yɛ nahwɛ aba za nɛ kpã, pɔ aba za anasɛ anɔ gɛ akpanɛsi aga kifui tɛtã mɛ ekoeyi.

¹⁶ Nɔ ti nyi sɛ wunɔ nahwɛ no nu Kpaya buvu klɛ Kpaya Ɔfufɔɛ lɔ lɛ wunɔɛ mɛ?

¹⁷ Onugɛ anɔ teli ayɛ Kpaya buvu, Kpaya ebe zi yɛ, alasɛ Kpaya buvu bu nu ɔkɛlɛ gɛ lɔ bhui klɛ no nu kpayavu lɛlɛ.

¹⁸ Nɔ tɔ wɔɛ wunɔ nahwɛshu. Onugɛ wunɔ mayɛ teli ayɛ kɔɛ lɛ asɛ enyi bui nɛ kanɔa nɛ tɛ zɛza nɛ mɛ, yɛ ebe dzi “agã” sɛ tɛ ebe dzi ebuiti.

¹⁹ Alasɛ kanɔa nɛ mɛ buititi ke nu bugã dɛdɔ nɛ́ Kpaya amɛ. Anasɛ gɛ ba ŋlɔmɛ elu: “Evu bebuiti nɛ balɛ ebui bhɛbhɛtɛ mɛ”

²⁰ klɛ bubhla, “Apalete enyi asɛ ebuiti kɛtɔkpu mɛ bhɛbhɛtɛ dɛ vɛ abha.”

²¹ Kɛlɛso ishu fifeke ta za nɛ banɔ shu! Kɛdɔnyɛdɔ kɛ nu wɔɛ yɛ,

²² kɛ nu Paolo pɛnɔ Apolo pɛnɔ Kefas pɛnɔ kanɔ nɛ pɛnɔ ɛkpã pɛnɔ butsi pɛnɔ ɔtsɔtsyɔ̃ pɛnɔ kibe gɛ tɛ ba— alɛ petee le nu wunɔ ayɛ,

²³ kle wunɔ nu Kristo ayɛ, klɛ Kristo enu Kpaya ayɛ.