1 Kɔrintioanɛ 16 - ONUGBÙ NYƐNYÃ VUVƆ

Kɛdɔ Yɛyɛkɛ Kɔ Kpaya Banɔ

¹ Ɔtsɔ̃nɛ denɔ kɛdɔ yɛyɛkɛ kɔ Kpaya banɔ shu: Nɔ bhɛtɛ ɔtrɔ kibui nɛ gɛ itsre Galatianɛ busɔlɛha sɛ babhɛtɛ.

² Nɛ kiwui tɛtɔpu nɛ ɔgɔnɛ kanyaka abha, anɔnyanɔ ebu kɔba tele elu nɛ yɛ bhɛ ŋɛŋa nu, tɛ aza bala, sɛ tɛ kibenɔ nɛ gɛ ɛba kɛdɔ kukɔ yɛyɛkɛ ta za.

³ Kɛlɛede onugɛ ɛba ku, ɛba ŋlɔmɛ keplukpa kɔ banɔ nɛ gɛ nɔ bu klɛ tɛ nɔ kpɛ alɛ nɛ wunɔ dɔkukɔ avɛ nɔ Yerusalem.

⁴ Onugɛ kɛbɔ sɛ tɛ mɛnahwɛ tsyɛ ɛvɛ, ba ba vɛ plɛnɔ mɛ.

Yɛnahwɛ Dɔ Bibisi

⁵ Ɛda nyɔ Makedonia beke, ɛba ba wunɔ kɔ—alasɛ ɛba tɛ ga koeyi nɛ Makedonia.

⁶ Obhi ɛba za wɔnɔ bha kɛbɔɛ, ɔdɔgɔsɛ ɛza ɔkɛlɛ nɛ bulɔɛ be nɛ tsyɛ, sɛ tɛ bɔ plɛnɔ mɛ nɛ mɛ kidzogɛga nɛa bha, nɛ ɔkɔnyɔkɔ gɛ ɛba vɛ.

⁷ Ɛdɛ pɛɛ sɛ tɛ ɛmɔ nɔ ɔtsɔ̃nɛ klɛ tɛ ɛga wunɔ bha fla ko. Ɛtrɔ sɛ tɛ ɛza kibe gelee nɛ wunɔ bha, onugɛ Apalete akɔɛ dzo.

⁸ Pɔ ɛba za Efeso ɔdɔtɔnɔ Kɛdɔtsitsu kiwuiŋɛŋa nɛ tɛbɛba,

⁹ alasɛ kedunu gbɛgbla xwɛ tili danɛ kɔ mɛ, klɛ ɔkɛlɛ banɔ gelee alɔ kititi nɛ mɛ shu.

¹⁰ Onugɛ Timotio aba, nɔ di lɛ kɔ sɛ etisifu nɛ kibuinyɛbui shu nɛ kibe gɛ alɛ wɔnɔ bha, alasɛ Apalete nɛ xwɛ yɛ awa anasɛ mɛ ana.

¹¹ Anɔnyanɔ, nɛlɛmɛ, atɛ ɖɔ sɛ ata yɛkɛ yɛ. Nɔ kpɛ yɛ dzo nɛ ishu yuyɔ mɛ sɛ tɛ ebe tsodzi aba mɛ ɔbha. Idi yɛ anɛ badzya nɛ́ dzoenu.

¹² Ɔtsɔ̃nɛ nɛ bulɔ adzya Apolo shu: Ɛyɛkɔɛ lɛ kɔ yɛ gɛganɛ sɛ avɛ plɛnɔ badzya. Adɛ pɛɛ asɛ tɛ avɛ ɔtsɔ̃, pɔ aba vɛ nɛ kibe nɔ nɛ gɛ amɔɛ dzo.

¹³ Nɔ za wunɔ tɛpupo abha, nɔ za gɛganɛɛ nɛ tɛyɛɛkɛŋaɛ mɛ, nɔ dzi banɔ gɛ ba kpɛ kemi, nɔ za gɛganɛ.

¹⁴ Nɔ bhɛtɛ kɛkanyaka nɛ tɛdɛdɛmɛ mɛ.

¹⁵ Nɔ nyi sɛ Stefanas nɛ yɛ bupa balɛ dzi banɔ tɛtɔpu gɛ be tsyinaɛtemɛ nɛ Akaya, klɛ ba yɛkɔ balɛshu akɔ gɛ ba wa axwɛ kɔ kpayabanɔ. Ɛpɛɛ denɔ wunɔ ahwɛmɛ, badzya mɔ,

¹⁶ tɛ nɔ zhi nɔ shu kɔ ebui anɛ di klɛ kɔ anɔnyanɔ gɛ eku wunɔɛ shi nɛ kɛxwɛ nɛ mɛ, klɛ tɛ awaɛlɛ.

¹⁷ Same kumɛ kɛbe lɛlɛ gɛ Stefanas, Fɔtunatus nɛ Akaikusɛ ba be ku, alasɛ ba ba kɔ alɛ kɛdɔ nɛ gɛ kɛ ma balɛ ahwɛ.

¹⁸ Alasɛ be tsodzi anyɛmɛ mɛ ɔfufɔɛ nɛ wunɔ yɛ. Banɔa nɛdi nɔ zɔ kpɛ alɛ susu.

Tɛsɛsɛnɔ Gugɔɛ

¹⁹ Basɔlɛha gɛ lɛ lɛ Asia ekpo nɛ mɛ ba sɛnɛ nɔ asɛsɛ. Akwila anɛ Prisila ba sɛnɛ nɔ mɔmɔ nɛ Apalete nɛ nyi mɛ, klɛ kana busɔlɛɔha gɛ lɛ tsa nɛ balɛ bupanɛ mɛ balɛ tayɛ abhɛtɛ.

²⁰ Badzya nɛ petee ba sɛnɛ nɔ. Nɔ sɛnɛ ɔhaglɔ nɛ onugbu mimini bhubhui.

²¹ Mɛ, Paulo, ɛŋlɔmɛ tɛsɛsɛnɔɛ nɛ mɛnahwɛ ahwɛ.

²² Onugɛ anɔteli adɛ dɛmɛnɛ Apalete—ba ba ɖɔɛbui akpɛ yɛ. Ba, O Apalete!

²³ Apalete Yesu yɛ ɛyɛmɛyuyɔ za plɛnɛ nɔ.

²⁴ Mɛ tɛdɛdɛmɛ nɛ wɔnɔ petee nɛ Kristo Yesu nyi mɛ. Tɛlɛbɛlɛmɛ.