1 Kɔrintioanɛ 14 - ONUGBÙ NYƐNYÃ VUVƆ

Kibuiɖɔlu Kɛdɔkukɔ Anɛ Ɔfufɔɛmɛaɖɔ

¹ Za tɛdɛdɛmɛ dzoa bha klɛ tɛ ɔpɛɛ gɛganɛ ɔfufɔɛ mɛ dɔkukɔ, kɛ dzyɔgo kibuiɖɔlu kukɔ.

² Alasɛ anɔnyanɔ gɛ aɖɔ ɔfufɔɛmɛaɖɔ ata ɖɔaɖɔ kɔ banɔ pɔ kɔ Kpaya. Kɛgbɛagba, anɔnyanɔ ete nu yɛ esi, aɖɔ ebui kpukpu nɛ yɛ ɔfufɔɛ.

³ Pɔ anɔnyanɔ gɛ aɖɔɛbuielu aɖɔaɖɔ kɔ banɔ kɔ balɛ tɛshishe atrɔ, kemikpɛkpɛ nɛ ɛyamyuyɔ.

⁴ Aanɔ nɛ gɛ aɖɔ ɔfufɔɛmɛaɖɔ akpɛ yɛshu nɛa bha, pɔ agɛ aɖɔbuielu aplɛnɔ busɔlɛɔha.

⁵ Ɛta pɛɛ sɛ tɛ anɔnyanɔ aɖɔ ɔfufɔɛmɛaɖɔ, pɔ ɛpɛɛ dɛ sɛ tɛ nɔ ɖɔɛbuiolu. Anɔ nɛ gɛ aɖɔɛbuielu aŋaedzi dɛ agɛ aɖɔ ɔfufɔɛmɛaɖɔ, odinu sɛ ebuialɛ esi, sɛ tɛ busɔlɛɔha nɛ ɔmɔ otugba vɛvɛ.

⁶ Ɔtsɔ̃nɛ, badzya mɔ, onugɛ ɛba wɔnɔ kɔ klɛ ɛɖɔ ɔfufɔɛmɛaɖɔ gɛ no di nu kalɛe si, kɛdɔ dzyɔgo ɖuweɖu kɛ lɛ mɛ nu kɔ nɔ, kɛlɛmaza ɛmɛna nɔ kɛdɔbubukasɛ, ɔdɔgɔsɛ kibuititi, kibuiɖɔlu ɔdɔgɔsɛ ebui kɛkasɛ?

⁷ Nɛ kidzo lɛlɛ nɛabha kɛdɔ nɛ gɛ ɛkpã ma kɛlɛ mɛ gɛ kɛ kpɛ ogugu, anasɛ kizhoe ɔdɔgɔsɛ saŋgu, kɛlɛ anɔ ebe ti oli nɛ mɛ gɛ ebho odi nu sɛ ili nɛ mɛ danɛ mɔmɔ?

⁸ Bubhla, sɛ onugɛ kaxũlɛ̃ bubɔ ne dɛ yi mɔmɔ, ane yɛ aba bala kɔ keyu tɛta?

⁹ So kana kɛ lɛ kɔ nɔ. Odi nu sɛ nɔ ɖɔ kibuititi kaɖɔ nɛ wɔ kɛnɛkɛ, kɛlɛ anɔ ebe ti kibui nɛ gɛ nɔ ɖɔ? Kɛlɛmɛ ko nɔ zɔ ɖɔaɖɔ kpɛ.

¹⁰ Tɛwuwlãkɛ ma kɛlɛ shu benuhu gelee edidedi la lɛ kanɔ nɛ mɛ, pɔ bukanyaka ma gɛ bulɛesi nunu ma.

¹¹ Ɔtsɔnɛ nɛlɛmɛ onugɛ ɛdɛ nu kibui tiliesi gɛ anɔ tɛli aɖɔ, enu efu kɔ agɛ yɛ aɖɔaɖɔ klɛ yɛ enu efu kɔ mɛ.

¹² So kana kɛ lɛ kɔ nɔ. Gɛ nɔ pɛɛ gɛganɛ sɛ tɛ nɔ yɛkɛ ɔfufɔɛ mɛ dɔkukɔ, nɔ wlãnkɛ tɛ ɔdɛ kɛdɔkuku nɛ gɛ bhɔ busɔlɛɔha nɛ owunɔ.

¹³ Alasɛ kibui nɛ so anɔnyanɔ gɛ aɖɔ ɔfufɔɛmɛaɖɔ akpla ekuisitɔkpu sɛ tɛ ebe bu kibui nɛesi gɛ aɖɔ.

¹⁴ Alasɛ onugɛ iklukpaya nɛ ɔfufɔɛmɛaɖɔ mɛ, ɔfufɔɛ ɔlɛ oklukpaya, pɔ mɛ tɔkpuimɛ dɛ yu eyuyu.

¹⁵ So kɛde mɛ ɛba bhɛtɛ? Ɛba klukpaya nɛ mɛ ɔfufɔɛ, pɔ mɛ tsyɛ ɛba klukpaya nɛ́ mɛ tɔkpuimɛ, ɛba zha ɔdzɛ nɛ mɛ ɔfufɔɛ, pɔ mɛ tsyɛ ɛba zha ɔdzɛ nɛ́ mɛ tɔkpuimɛ.

¹⁶ Onugɛ ɔkpɛ Kpaya kinyi nɛabha nɛ wɔ ɔfufɔɛ, kɛlɛ anɔ nɛ gɛ amɔ yɛ nahwɛ shu nɛ bagɛ be te nu kɛlɛesi nɛ shi baɖɔ sɛ “Kɛbɛlɛmɛ” kɔ wunɔ ahwɛhuhu, nɛ kibelɛlɛ gɛ etinyi kibui nɛ gɛ nɔ ɖɔ?

¹⁷ Nɔ zɔ hu ahwɛ la bana mɔmɔ, pɔ kɛ tɛ plɛnɔ anɔ bhla.

¹⁸ Ihu Kpaya ahwɛ sɛ ɛɖɔ ɔfufɔɛmɛaɖɔ dɛ wɔnɔ petee.

¹⁹ Pɔ nɛ busɔlɛɔha nɛ mɛ ɛba ɖɔ ebui teti gɛ alɛ mɛ ebhui tɛ ɛyɛkɔ kasɛ banɔ bhlatɔ kɛdɔ nɔ ɔyɛkɔ dɛ ɔfufɔɛmɛaɖɔ ebui akpã lɔfɔ.

²⁰ Badzya mɔ, nɔ zukɔlɔ ebui bhɛtɛ anasɛ banuvɔ. Nɔ dzi anuvɔ nɛ ebui zizi bhɛbhɛtɛ mɛ, pɔ nɛ wunɔ kibuesi nunu nɔ dzi banɔ shishe.

²¹ Nɛ Ɔshã nɛ mɛ baŋlɔmɛ akpɛ ɔlɛmɛ sɛ: “Ganɔ banɔ nɛ gɛ be hu benuhu bhlatɔ nɛabha klɛ ganɔ befu onugbu bui ɖɛɖɔ Ɛba ɖɔ kaɖɔ kɔ banɔ anɛ, pɔ kɛlɛ nɛ tsyɛ ba tɛ ba ta mɛ batɔ,” Apalete nɛ yɛ aɖɔ.

²² Ɔfufɔɛmɛaɖɔ, ke dɛ nu kɛdɔmumɔ kɔ ba gɛ ba yɛkɛŋa pɔ kɔ bagɛ ba dɛyɛkɛŋa, kibuiɖɔlu, pɔ kinu bui kɔ bayɛyɛkɛŋa, ganɛ kɔ bagɛ ba dɛyɛkɛŋa.

²³ Kɛlɛso onugɛ busɔlɛha petee bexogo klɛ anɔnyanɔ aɖɔ ɔfufɔɛmɛaɖɔ, klɛ beteli be tee nu kɛlɛesi ɔdɔgɔsɛ bagɛ ba dɛyɛkɛŋa nɛ aba, ba ta ɖɔ sɛ wunɔɛ tɔkpu ma?

²⁴ Pɔ onugɛ ba gɛ ba dɛ yɛkɛŋa ɔdɔgɔsɛ bagɛ be tenu lɛesi ba ba kibelɛlɛ anɔnyanɔ aɖɔbuielu, kɛ ba ku yɛ awɔ̃ nɛ alɛlɛ petee mɛ sɛ enu kizizi bhɛbhɛtɛ elete klɛ alɛ petee labe klu kebhui nɛ yɛ,

²⁵ klɛ ebui kpukpu gɛ lalɛ yɛ idzyi nɛ mɛ la be bu egelee akasɛ. Kɛlɛso aba ezhi akpla klɛ asɔlɛ kɔ Kpaya, gɛ aɖɔ sɛ, “Kɛgbɛagba Kpaya alɛ bulɔɛ shi!”

Tɛtrɔ Kɔ Busɔlɛ

²⁶ Kide kɛlɛ bu baɖɔ ɔtsɔ̃ nɛ, badzya mɔ? Kibenɔ nɔ bɔ xogo, anɔnyanɔ evunɔ ɛdzɛ zhɛzha, ɔdɔgɔsɛ kibui gɛ ba kasɛ kɛdɔ, tɛbubukasɛ, ɔfufɔɛmɛaɖɔ ɔdɔgɔsɛ kibuiesibubu. Anɛ nɛɛ di petee alasɛ sɛ tɛ ba bhɛtɛ kɔ busɔlɛɔha nɛ tɛgɛganɛ.

²⁷ Onugɛ anɔ teli aba ɖɔ ɔfufɔɛmɛaɖɔ, tɛabha—ɔdɔgɔsɛ be kpe fanɔ tɛata—balɛ alasɛ tɛ ba ɖɔaɖɔ, terikpo nɛ kibe tirikpo mɛ, klɛ alasɛ tɛ anɔ teli ebuia lɛ kesi.

²⁸ Onugɛ agɛ eebu kibuiesi ama, klɛ agɛ aɖɔaɖɔ eklenu nɛ busɔlɛɔha nɛ mɛ tɛ aɖɔaɖɔ etsre yɛnahwɛshu anɛ̀ Kpaya.

²⁹ Batɔnu tɛabha ɔdɔgɔsɛ tɛata balɛ alasɛ tɛ ba ɖɔaɖɔ, klɛ tɛ bagɔgɔɛ nɛ be feke ebui nɛ gɛ ba ɖɔ nɛ edi mɔmɔ.

³⁰ Klɛ onugɛ tɛbubukasɛ kɛɛ ba kɔ anɔ teli gɛ edzi kesi, agɛ eputɔ aɖɔaɖɔ alasɛ tɛ azukɔlɔ.

³¹ Alasɛ wɔnɔ petee nɔ bɔ na kibuiɖɔlu terikpo terikpo sɛ tɛ anɔnyanɔ ayɛkɛ kɛdɔkɛkasɛ anɛ kemikpɛkpɛ .

³² Batɔnu ɔfufɔɛ lɔ kpasɛ batɔnu nɛesi.

³³ Alasɛ Kpaya edi nu agadzyidzye Kpaya pɔ alɛ kɔ ishuyuyɔ. Anasɛ gɛ kɛlɛ nɛ banɔnɛna oxogokɔ,

³⁴ badzɛ alasɛ tɛ ba da inugbu busɔlɛɔha nɛ mɛ. Ba dɛ kɔ alɛ kidzo sɛ tɛ ba ɖɔaɖɔ, pɔ be zhinɔ shu, anasɛ gɛ Ɔshã nɛ ɔɖɔ.

³⁵ Onugɛ ba pɛɛ asɛ tɛ bebisi kibui tiliesi enu, ba vɛ tɛ be debisi balɛ nahwɛ bale nyine alɛ nɛ bupɛ mɛ, alasɛ kɛnu kɛwɔɛ̃ bui lɛ nu kɔ adzyɛ tɛ aɖɔaɖɔ nɛ busɔlɛ kɛtɔkpu ɔtsakɔ.

³⁶ Kpaya bui wunɔ nɛ lɛ kɛlɛ kpɛesi? Pɛnɔɔ wunɔ tite wunɔ nu banɔ gɛ kɛ ba na nɔ?

³⁷ Onugɛ anɔ teli ayɛkɔ sɛ enu atɔnu, ɔdɔgɔsɛ ɔfufɔɛmɛ kɛdɔkukɔ tili lɛ yɛahwɛ, nɔ kɔ yɛ adɛmɛ lɛ asɛ ebui nɛ gɛ ɛŋlɔmɛ kɔ nɔ lɛ nu Apalete nɛ eshã.

³⁸ Onugɛ adɛ dɛmɛ kibui nɛ, yɛ nahwɛ ba tɛ ba dɛmɛ yɛ bui.

³⁹ Kɛlɛso, mɛ badzya mɔ, nɔ yɛkɔ lɛ gɛganɛ tɛ nɔ ɖɔɛbuilu, klɛ nɔ tɛ dzuahwɛ ɔfufɔɛmɛaɖɔ ɖuɖɔa bha.

⁴⁰ Pɔ ba bhɛtɛ kɛdɔnyɛdɔ nɛ tɛtɛtrɔ nɛ kidzo dzyɔgo abha.