1 Kɔrintioanɛ 13 - ONUGBÙ NYƐNYÃ VUVƆ

Tɛdɛdɛmɛnɔ

¹ Onugɛ ɛɖɔ banɔ anɛ kpayaxwɛdɛ ɔfufɔɛmɛaɖɔ, pɔ ɛdɛ dɛmɛ anɔɛbui, inu ɔɖawuro ɔdɔgɔsɛ ɔɖa gɛ oyi .

² Onugɛ atɔnu kɛdɔkukɔ lɛ mahwɛ klɛ ɛba na ebuikpukpu petee anɛ ebuititi petee kesi nu, klɛ onugɛ tɛyɛyɛkɛŋa lɛ mahwɛ gɛ kɛba kpa betu, pɔ pɛ ɛdɛdɛmɛ nɛ anɔ, ɛdɛ nu kɛdɔnyɛdɔ.

³ Onugɛ gɛ ɛyɛkɔ mɛ dɔnyɛdɔ kɔ etsyutsyuini klɛ ɛyɛkɔ mɛshuidzya kɔ sɛ tɛ ba puɛ, pɔ tɛdɛdɛmɛnɔ ma mahwɛ, ɛdɛ nu kɛdɔnyɛdɔ.

⁴ Tɛdɛdɛmɛnɔ nu idzyiyuyɔ, tɛ dɛdɛmɛnɔ nu ɛyɛmɛyɛyɔ. Kɛ dɛ nu kabhawɛwlãkɛ, klɛ kɛ dɛ nu ishu fifeke.

⁵ Kɛ dɛ nu ebuikpã bhɛbhɛtɛ, kɛ dɛ nu ishu tɛpɛpɛ̃ ko, kɛ dɛ nu oblo kpɛkpɛ ziazia anɛ kɛbui vuvu kpɛ ɛyɛmɛ.

⁶ Tɛdɛdɛmɛnɔ kɛdɛ mɔ same nɛ ebuizizi pɔ kɛ mɔ same nɛ kibui gbɛagba.

⁷ Akpɛ buka akpɛ lɔ kibenyɛbe, tɛyɛyɛkɛŋa kibenyɛbe, kidzoenudidi kibenyɛbe, anyɛna lɔ evunɔ kibenyɛbe.

⁸ Tɛdɛdɛmɛnɔ tɛ ba wɔlɛ. Pɔ ɔkɛlɛ gɛ ebuiɖɔlu alɛ, alɛ nu ba fla, ɔkɛlɛ gɛ ɔfufɔɛmɛaɖɔ ka lɛ, ba ba dzrɔ nɛ alɛ; ɔkɛlɛ gɛ kibuititi lɛ, kɛ ba koeyi fla.

⁹ Alasɛ bu nyi bui kapɛ klɛ bu ɖɔ ebuilu nɛ kapɛ,

¹⁰ pɔ kibenɔ nɛ gɛ kɛdzyɔgo ba, kizizi nɛ nu ba fla.

¹¹ Kibelɛlɛ gɛ idzi anuvɔ, ɛɖɔaɖɔ anasɛ anuvɔ, ɛvɛ kɛtɔkpu mɛ anasɛ anuvɔ, ɛdi ebuimɛ anasɛ anuvɔ. Ɔtsɔ̃nɛ ɛba dzi anɔ, ɛhɛnahwɛ bunuvɔ shu lu.

¹² Ɔtsɔ̃nɛ bu mɔ pɔ tɛ mumɔ mabhui mabhui anasɛ azhuzhwɛ̃ mɛ dɔ, kɛlɛede bu ba mɔ amɛ nɛ amɛ. Ɔtsɔ̃nɛ ɛnyi kegunu, nɛ kɛlɛede ɛba ti mɔmɔ, anasɛ gɛ ɛtɛ ti tsyɛ.

¹³ Klɛ ɔtsɔ̃nɛ ebui tata ala gɔ: tɛyɛyɛkɛŋa, kidzoenudidi anɛ tɛdɛdɛmɛnɔ. Pɔ kɛ gɛ tridɛ nɛ alɛ mɛ kɛlɛ nu tɛdɛdɛmɛnɔ.