1 Kɔrintioanɛ 12 - ONUGBÙ NYƐNYÃ VUVƆ

Ɔfufɔɛ Mɛ Kɛdɔkukɔ

¹ Ɔtsɔ̃nɛ, denɔ ɔfufɔɛ mɛ kɛdɔkukɔ shu, badzya mɔ, ɛdɛ pɛɛ sɛ tɛ nɔ za otumui mɛ.

² Nɔ nyi sɛ kɛlɛbe gɛ nɔ kpɛ kɛtɔkpuesi kɔ ibuidi, nɛ kidzo tiliabha pɛnɔ kɛbhlatɔ ba wɔɛ nɔ alɛla klɛ ba gbanɛ nɔ avɛnɔ ibuidielete kɔ klɛ nɔ kpɛ kɛtɔkpuesi kɔ banɔ bhubhɔ gɛ bata ɖɔaɖɔ.

³ Kɛlɛ so itsre nɔ sɛ anɔnyanɔ ama gɛ aɖɔaɖɔ ganɔ Kpaya Ɔfufɔɛ abha gɛ aba ɖɔ asɛ, “ba ɖɔɛ bui akpɛ Yesu” klɛ anɔnyanɔ atɛ ba na ɖɔ sɛ, “Yesu enu Apalete, gɛ odu nu sɛ ganɔ Ɔfufɔɛ nɛa bha.”

⁴ Kɛdɔ kukɔ edidedi la lɛ, pɔ Ɔfufɔɛ ɔlɛlɛ nɛ ɔlɔ lɛ.

⁵ Axwɛ edidedi la lɛ, pɔ Apalete alɛlɛ yɛ alɛ.

⁶ Axwɛwuwa edidedi la lɛ, pɔ Kpaya alɛlɛ nɛ yɛ wa alɛ petee nɛ banɔ petee mɛ.

⁷ Ɔtsyɔnɛ kɔ anɔ kanyaka Ɔfufɔɛ nɛ xwɛwuwa kɔ bulɔ petee tɛ pɛpɛ̃.

⁸ Ganɔ Ɔfufɔɛ nɛabha ba kɔ anɔ teli kibuinyinyi ɔsɔ, kɔ anɔ bhlatɔ kɛbuititi ɔsɔ ganɔ Ɔfufɔɛ ɔlɛlɛ nɛabha,

⁹ kɔ anɔ bhlatɔ tɛyɛyɛkɛŋa nɛ Ɔfufɔɛ ɔlɛlɛ nɛabha, kɔ anɔ bhlatɔ bunya bɛbeke nɔ Ɔfufɔɛ ɔlɛlɛ nɛabha,

¹⁰ kɔ anɔ bhlatɔ ebuiyinɔanɔ kemi, kɔ abhlatɔ kibuiɖɔlu, kɔ abhlatɔ ɔtɔgɛga titi nɛ ɛfufɔɛ mɛ, kɔ abhlatɔ kaɖɔɖuɖɔ nɛ benuhu gelee mɛ klɛ kɔ anɔ bhlatɔ tsyɛ bunuhu kesibubu.

¹¹ Anɛɛ petee lɛ nu anɔ terikpo nɛ Ɔfufɔɛ ɔlɛlɛ, klɛ akɔ alɛ akanyaka anasɛ gɛ apɛɛ.

¹² Ishuidzya lɛ nu kɛdɔ tirikpo, kɛlɛlɛmɛsɛ bu nu bupɛpɛpɛ gelee klɛ kɛlɛlɛmɛsɛ bulɛ bupɛpɛpɛ bu kpe, bu bhɛtɛ ishuidzya tirikpo. So kana tsyɛ kɛ lɛ nɛ Kristo.

¹³ Alasɛ bulɔ petee ba kpɛ bini kɔ lɔ ganɔ Ɔfufɔɛ torikpo abha ɔkpɛ ishuidzya terikpo—kɛba kɛlɛmɛ sɛ onu Yuɖiaeyi, ɔdɔgɔsɛ Grikieyi, anɔdzidzi ɔdɔgɔsɛ ɔlɛ ishuahwɛ--klɛ ba kɔ bulɔ petee Ɔfufɔɛ torikpo ɔlɛ nɛ bu wɔɛ.

¹⁴ Ɔtsɔ̃nɛ ishuidzya nɛ kapɛ tierikpo lɔ nu pɔ lɛ kpe.

¹⁵ Onugɛ ɔtsrɛ lɔ bɔ ɖɔ sɛ, “Alasɛ ɛdɛ nu ɔhwɛ, ɛdɛ nu ishuidzya,” kɛ tɛ ba dzi sɛ kɛlɛso ɛtɛa dzi ishuidzya nɛ kapɛ.

¹⁶ Klɛ onugɛ batɔ tsyɛ asɛ, “Alasɛ ɛdɛ nu kɛwɔ̃hu, ɛdɛ nu ishuidzya,” kɛ tɛ ba dzi sɛ ɛtɛadzi ishuidzya kapɛ.

¹⁷ Onugɛ ishuidzya nɛ petee nu kɛwɔ̃hũ, fakɔ tɛnunu tɛtiti ba za? Onugɛ ishuidzya nɛ petee nu batɔ, fakɔ kɛdɔ lulɔ̃ tɛtiti ba za?

¹⁸ Pɔ Kpaya elu bupɛpɛpɛ nɛ ishuidzya nɛ shu, kapɛ kanyaka anasɛ gɛ apɛ sɛ tɛ kɛdzi.

¹⁹ Onugɛ bupɛ petee bunu kɛdɔ tirikpo, fakɔ ishuidzya nɛ ba za?

²⁰ Anasɛ gɛ kɛlɛ, bupɛ gelee lɛ, pɔ ishuidzya tirikpo.

²¹ Kɛwɔ̃hu kɛ tɛ ba ɖɔ tsre ɔhwɛ sɛ, “Ɛtɛ pɛɛ wɔ!” Klɛ kɛtɔkpu tɛ ba tsre ɔtsrɛ sɛ, “Ɛtɛ pɛɛ wɔ!”

²² Nɛ kɛɛ lɛ nɛede, ishuidzya nɛ bupɛ nɛ gɛ wɛ̃ ansɛ bu dɛ gɛganɛ bu ma gɛ ba ba shɛnahwɛ bulɛ shu elu,

²³ klɛ bupɛ gɛ bu yɛkɔ sɛ bulɛ kabhakpɛkpɛ ke zhiesi bu bhpɛtɛ bulɛ bui nɛ kabhakpɛkpɛ tieli di. Klɛ bupɛ nɛ gɛ ma gɛ ba ba yɛkɔ akasɛ ba bhɛtɛ bulɛ bui nɛ tɛdudɔfɔ̃ɔ,

²⁴ nɛ kibelɛ mɛ gɛ bulɔ bupɛ nɛ gɛ bulɛ kibui tili mɛ bu dɛ bisi tɛnyɛnyɛna tili di. Pɔ Kpaya ayɛkɔ ishu bupɛpɛpɛ nɛ akpɛ turukpo klɛ ayɛkɔ kabhakpɛkpɛ gbɛgbla akɔ bupɛ nɛ gɛ ama kɔ bulɛ ana,

²⁵ sɛ tɛ ɔtɔgɛga ɔtɛ za ishuidzya nɛ mɛ, pɔ tɛ ishuidzya nɛ bupɛ nɛ mɔ terikpo mɛ zɛza kɔ ɔhaglɔ.

²⁶ Onugɛ kapɛ tierikpo amɔ butɔ, bupɛ petee mɔ butɔ nɛ kalɛ, onugɛ kapɛ tierikpo amɔ otugba vɛvɛ, kapɛnyɛapɛ ka mɔ samɛ nɛ kalɛ.

²⁷ Ɔtsɔ̃ no nu ishuidzya kɔ Kristo, klɛ anɔnyanɔ enu yɛ kapɛ.

²⁸ Klɛ nɛ busɔlɛɔha nɛ mɛ Kpaya eputɔ eklu banɔkpɛkpɛ, bubhla batɔnu, butramɛ badɔkasɛ, kɛlɛede bagɛ babhɛtɛ ebuiyinɔanɔ, bagɛ balɛ tsyɛ bakɔ bunyabubu nɛ anɔ ishu mɛ, nɛ bagɛ ba plɛnɔ anɔ bhlatɔ, nɛbagɛ ba kɔ ebuiabha didi, nɛ bagɛ bɛ hu ɔfufɔɛmɛ bunuhu bhlatɔ.

²⁹ Balɛ petee nu banɔkpɛkpɛ? Balɛ petee be nu batɔnu? Balɛ petee nu badɔkasɛ? Balɛ petee babhɛtɛ ebui gɛ eyinɔ anɔ?

³⁰ Balɛ petee ba yɛkɛ bunyabubu nɛ anɔ shu mɛ? Balɛ petee be hu ɔfufɔɛmɛ benuhu bhlatɔ? Balɛ petee benu ɔfufɔɛmɛ benuhu bhlatɔ nɛesi?

³¹ Pɔ nɔ pɛɛ gɛganɛ ɛyɛmɛyuyɔ gbɛgbla dɛ. Klɛ ɔtsyɔ nɛ eba kasɛ nɔ kidzo dzyɔgo dɛ.