1 Kɔrintioanɛ 11 - ONUGBÙ NYƐNYÃ VUVƆ

¹ Nɔ za mɛ dɔ bhɛbhɛtɛkasɛ nɛede, anasɛ gɛ ɛlɛ Kristo kɛdɔ bhɛbhɛtɛkasɛ nɛede.

Tɛzɛza Dzyɔgo Nɛ Busɔlɛ Mɛ

² Ɛkpɛ nɔ nyinɛabha gɛ nɔ baka mɛ bui nɛ kɛkanyaka mɛ klɛ mɛ nyɛna kɛdɔkɛkasɛ nɛ mɛ vunɔ, anasɛ gɛ ɛyɛkɔ kpɛ nɔ ahwɛ.

³ Ɔtsɔ̃nɛ ɛpɛɛ sɛ nɔ ti sɛ tɔkpu kɔ anyɛnyanyɛ yɛ enu Kristo, klɛ tɔkpu kɔ adzɛ yɛ enu anyɛ, klɛ kɛtɔkpu kɔ Kristo yɛ enu Kpaya.

⁴ Anyɛ nyanyɛ gɛ eklukpaya ɔdɔgɔsɛ gɛ aɖɔɛbuielu gɛ ayɛkɔ kɛdɔ ekumu yɛ kɛtɔkpu, akpɛ yɛ tɔkpu nɛ aputɔ mɛ.

⁵ Klɛ adzɛnyadzɛ gɛ eklukpaya ɔdɔgɔsɛ aɖɔɛbuielu gɛ adɛ yɛkɔ kɛdɔ ada yɛ kɛtɔkpu, akpɛ yɛ tɔkpu nɛ aputɔ mɛ—kɛ dzi anasɛ agɛ ba xlɔ yɛ kɛtɔkpu.

⁶ Onugɛ adzɛ adɛ yɛkɔ kɛdɔ ada yɛ kɛtɔkpu, alasɛ tɛ axlɔ yɛ tɔkpu, klɛ onugɛ kɛnu kɛwɔɛ̃ kɔ adzɛ sɛ tɛ atsɛ ɔdɔgɔsɛ axlɔ̃ yɛ tɔkpu, kɛlɛalɛ alasɛ tɛ ayɛkɔ kɛdɔ atrɔ yɛ tɔkpu nɛabha.

⁷ Anyɛ̃ ama sɛ tɛ ayɛkɔ kɛdɔ ada yɛ tɔkpu, alasɛ yɛ la bhɛtɛ nɛ Kpaya tɛzɛzɛmɛ klɛ nɛ yɛ kabhaŋɛŋa, pɔ adzɛ yɛ kabhaŋɛŋa lɛ kɔ anyɛ.

⁸ Alasɛ anyɛ edide adzɛ mɛ, pɔ adzɛ ede anyɛ mɛ,

⁹ ba dɛ bhɛtɛ anyɛ kɔ adzɛ, pɔ babhɛtɛ adzɛ kɔ anyɛ.

¹⁰ Nɛ kibui nɛ shu, klɛ alasɛ baxwɛdɛ so, adzɛ alasɛ tɛ ayɛkɔ kɛdɔ ada kɛtɔkpu tɛ kɛkasɛ kabhaŋɛŋa nɛ yɛ tɔkpu shu.

¹¹ Apalete nɛ mɛ, adzɛ ama ishuahwɛ nɛ anyɛ ɔkɔ ɔdɔgɔsɛ anyɛ ama ishuahwɛ nɛ anyɛ ɔkɔ.

¹² Alasɛ anasɛ gɛ adzɛ ede anyɛ mɛ, kanake anyɛ tsyɛ adzɛ yɛ amɔ yɛ. Pɔ kɛkanyaka de Kpaya kɔ.

¹³ Wunɔnahwɛ nɔ builɛ shu odi sɛ: Abɔ sɛ tɛ adzɛ atɛ yɛkɔ kɛdɔ atrɔ kɛtɔkpu flogo tɛ eklukpaya?

¹⁴ Anɛ sɛ kanɔɛ mɛ bui kasɛ sɛ onugɛ anyɛ elu kɛtɔkputɛka dzidze ke nu kɛwɔɛ̃ kɔɛ yɛ,

¹⁵ pɔ kide onugɛ adzɛ elu kɛtɔkputɛka dzidze kɛnu yɛ kabhaŋɛŋa? Alasɛ ba kɔ adzɛ kɛtɔkputɛka dzidze sɛ tɛ kɛda yɛ tɔkpu.

¹⁶ Onugɛ anɔ teli apɛɛ asɛ tɛ awlãnkɛ bui nɛ kibui nɛ shu, bulɔ kɛbhlatɔ kanyaka ma lɔ bhɛtɛtɛ—pɛnɔ Kpaya busɔlɛha ba ba bhɛtɛ.

Apalete Nɛ Ɔwulago Kɛdɔŋɛŋa

¹⁷ Nɛ ebui kukɔanɛ mɛ ɛtɛ kpɛ wunɔ nyi nɛabha, alasɛ wunɔ tɛtsyɛtsya nɛ abhɛtɛ ezizi gelee dɛ adzyɔgo.

¹⁸ Nɛ ɔzakɔ tutɔpu, ɛnu sɛ kibenɔ gɛ nɔ xogo anasɛ basɔlɛɔha, tɛmɛma za wɔnɔɛ shi, klɛ nɛ kapɛ tieli mɛ ɛyɛkɛ kɛlɛa bha ŋa.

¹⁹ Otro ɔma kɛlɛ mɛ alasɛ tɛ ɔtɔgɛga ɔza wɔnɔɛ shi, tɛ kɛ kasɛ anɔ nɛ gɛ yɛ abha Kpaya atrɔ ahwɛ.

²⁰ Kibenɔ gɛ no bo xogo, ganɛ Apalete nɛ Ɔwulagoe dɔŋɛŋa nɛ nɔ ŋa,

²¹ alasɛ anasɛ gɛ nɔ ŋaɛdɔ, anɔnyanɔ avɛ lɛabha gɛ eti po anɔ kanyaka. Terikpo aza bubhɛ, abhlatɔ ebuku lu.

²² Bupa ma wɔnɔ ahwɛ gɛ nɔ bɔ ŋaɛdɔ gɛ nɔ bɔ wɔɛ̃ dɔ nɛ bulɛ mɛ? Pɛnɔ no to di Kpaya busɔlɛɔha nɛ ɔkpɛ kɛbuinyɛbui mɛ klɛ nɔ pɛɛ sɛ tɛ nɔ kpɛ banɔ nɛ gɛ kɛdɔnyɛdɔ ma balɛ ahwɛ nɛ wɔ̃ɛ? Kɛbui ɖuweɖu ɛba tsiɖe nɔ? Ɛkpɛ nɔɛ nyi nɛabha nɛ kibui nɛ shu Ao kɛ mɛlɛmɛ!

²³ Alasɛ kɛdɔ nɛ gɛ ɛyɛkɛ denɔ Apalete nɔ kɔ klɛ mɛ tsyɛ ɛyɛkɔ kɔ nɔ: Apalete Yesu nɛ elishi ba yɛkɔ yɛ akpahwɛ, ayɛkɔ gbɛ̃gbɛvu,

²⁴ klɛ kibelɛlɛ gɛ ehu ahwɛ, aya yɛ klɛ aɖɔ sɛ, “Yɛ nu mɛ ishuidzya, gɛ kɛnu wunɔɛ yɛ, nɔ bhɛtɛ ana tɛ nɔ zɔ yɛkɔ baka mɛ bui.”

²⁵ Kana ke, nɛ ɔwulago dɔ ŋaŋa nɛede, ayɛkɔ kantsye, aɖɔ sɛ, “Kantse anɛ kale nu onugbu nyɛnya vuvɔ nɛ mɛ dzyosu mɛ, nɔ bhɛtɛ kedɔɛ nɛ, kibenɔ gɛ nɔ wɔɛ̃ lɛ, kɔ mɛ tɛbɛbaka.”

²⁶ Kibenyɛbe gɛ nɔ tã gbɛ̃gbɛvu klɛ nɔ wɔɛ̃ kãtse anɛ, nɔ ɖɔ Apalete nɛ butsi ɔdɔtɔnɔ kibe lɛ gɛ ebe tsodzi aba.

²⁷ Kɛlɛso, anɔ nɛ gɛ atã gbɛ̃gbɛvu ɔdɔgɔsɛ awɔɛ̃ Apalete nɛ kãntse, nɛ kidzo zizi abha aba ŋa kɛpɔ nɛ Apalete nɛ ishuidzya anɛ yɛ dzyosu nɛ shu.

²⁸ Anɔ alasɛ tɛ avɛ ishui mɛ flogo tɛ atã gbɛ̃gbɛvu nɛ tɛ awɔɛ̃ yɛ kãntse.

²⁹ Alasɛ anɔnyanɔ atã klɛ awɔɛ̃ gɛ adɛ vɛ ishu mɛ dzyɔgo nɛ́ Apalete shu, atã klɛ awɔɛ̃ kebhui kuklu kɔ shu.

³⁰ Kɛlɛso gɛ wunɔ banɔ gelee nɔ botso klɛ nɔ nya, klɛ wunɔ banɔ tekɛkla teli no tsi.

³¹ Pɔ onugɛ bɔ vɛ shuimɛ mɔmɔ, be tibeklu kebhui nɛ bulɔ.

³² Kibenɔ Apalete nɛ klu kebhui nɛ lɔ gɛ atɛta bulɔ batɔ, sɛ tɛ ba tɛ be bu lɔ kɛpɔ aplɛnɔ kanɔ.

³³ Kɛlɛso badzya mɔ, kibenɔ gɛ nɔ bɔ xogo sɛ tɛ nɔ ŋaɛdɔ, nɔ po ɔhaglɔ.

³⁴ Onugɛ bubhɛ yi anɔ teli, aŋaɛdɔ nɛ bupɛ mɛ, sɛ tɛ kɛ tɛ badzi kebhui kuklu kɔ nɔ onugɛ nɔ xogo. Klɛ kibe nɔ gɛ ɛba ɛba kɔ ɛshã gugɔɛ.