1 Kɔrintioanɛ 1 - ONUGBÙ NYƐNYÃ VUVƆ

¹ Paolo, gɛ beklu sɛ tɛ ɛdzi Yesu Kristo akpɛkpɛ nɛ Kpaya tɛpɛpɛɛ nɛ blɔ adzya Sotɛnis.

² Kɔ Kpaya busɔlɛɔha nɛ Kɔrint, kɔ bagɛ balɛ petee ba bhɛtɛ alɛ shu bhui nɛ Kristo Yesu mɛ klɛ be klu tɛ balɛ shu bhui, ɔyɛkɔ plɛnɔ nɛ balɛ petee nɛ ɔkɔnyɔkɔ gɛ be klu aganɔ bulɔ Apalete Yesu Kristo yɛ nyi nɛabha—balɛ Apalete nɛ bulɔ ayɛ nɛ shu bhubhui gɛ be nu yɛ ayɛ anɛ Kristo Yesu, ɔplɛnɔ bagɛ be de ɔkɔnyɔkɔ gɛ be klu Apalete Yesu Kristo yɛ nyi mɛ— balɛ Apalete nɛ bulɔ ayɛ:

³ Kɛdɔkukɔ anɛ ishuyuyɔ denɔ blɔ Aka Kpaya anɛ Apalete Yesu Kristo ɔkɔ kɔ nɔ.

Ahwɛhuhu

⁴ Ɛhu Kpaya ahwɛ kibenyɛbe nɛ wunɔɛ tɔkpu alasɛ yɛ ɛyɛmɛyuyɔ gɛ akɔ nɔ ganɔ Kristo Yesu abha.

⁵ Alasɛ nɛ yɛ mɛ nɔ bɔ dzi ehoeyielete nɛ kidzonyɛdzo abha—nɛ kɛlɛ petee mɛ wunɔ kaɖɔɖuɖɔ nɛ kɛlɛmɛ petee nɛ kibuititi—

⁶ alasɛ blɔ kɛbuimɔɖɔ denɔ Kristo shu kɛ wɛ̃ nɛ wɔnɔ mɛ.

⁷ Kɛlɛso ɔfufɔɛmɛ dɔkukɔ kanyakama gɛ kɛma wɔnɔ ahwɛ anasɛ gɛ nɔ po gɛganɛ bulɔ Apalete Yesu Kristo sɛ tɛ be buakasɛ.

⁸ Aba kɔ nɔ za gɛganɛ ɔdɔtɔnɔ tɛbibeke mɛ, sɛ tɛ batɛ mɔ kizizi nɛ wunɔ shu anɛ bulɔ Apalete Yesu Kristo tɛbɛba wui nɛabha.

⁹ Kpaya, gɛ eklu nɔ abhɛtɛ terikpo nɛ ye Yi Yesu Kristo bulɔ Apalete, enu anɔ yɛyɛkɛŋa.

Busɔlɛɔha Tɛpupɔɛhle

¹⁰ Nɛ bulɔ Apalete Yesu Kristo nyi mɛ, madzyalɛ mɔ ɛkpɛ lɛ nɛ wunɔ ɔkɔ sɛ, wunɔ petee nɔ za terikpo nɛ aglɔ sɛ tɛ tɛpupɔɛhle kɛta za wunɔɛ shi klɛ sɛ tɛ nɔ bhɛtɛ terikpo mɔmɔ nɛ́ wunɔ atɔkpu mɛ anɛ alɛmɛ tɛbhɛbhɛtɛ.

¹¹ Madzyalɛ, banɔ tɛli gɛ be de Kloe bupa mɛ ba kɔ mɛ ti sɛ ebla kpasɛ wunɔɛ shi.

¹² Kibui nɛ gɛ ɛɖɔ klɛ nu sɛ: wunɔ mayɛ teli aɖɔ sɛ, “Ɛlɛ Paolo ede”, anɔbhlatɔ, “Ɛlɛ Apolo ede”, abhlatɔ, “Ɛlɛ Kefas ede”; abhlatɔ tsyɛ asɛ “Ɛlɛ Kristo ede.”

¹³ Bayɛ Kristo nɛ akpɛ bupɛpupɛ mɛ? Paolo la kplaɛsɔ kɔ nɔ? Paolo yɛ nyimɛ la kpɛ buni kɔ nɔ?

¹⁴ Ɛhu ahwɛ sɛ ɛdɛ kpɛ buni kɔ wunɔmɛayɛ kanyakadɛ sɛ Krispuse anɛ Gayose,

¹⁵ kɛlɛso anɔnyanɔ atɛ baɖɔ sɛ bakpɛ buni kɔ nɔ nɛ mɛ nyimɛ.

¹⁶ (Ee, mɛ tsyɛ ɛkpɛ buni kɔ Stefano yɛ bupa mɛ ganɛ, nɛ kɛlede, ɛdɛ baka sɛ ɛzɛ kpɛ buni kɔ anɔnyanɔ.)

¹⁷ Alasɛ Kristo adɛ kpɛ mɛ sɛ tɛ ɛkpɛ buni, pɔ tɛ aɖɔ kibui dzyɔgo—ganɛ Anɔdzyrame kibuinyinyi nu, nɛ sɛ tɛ bupu tɛza Kristo yɛ butsi nɛ butsiosi nɛ shu.

Kristo Kibuinyinyi Anɛ́ Kpaya Kemi

¹⁸ Butsiosi shuibui nɛ nu kɛgãbui kɔ bagɛ baa wɔlɛeku, pɔ kɔ bulɔagɛ be bu ki nu Kpaya Kemi.

¹⁹ Alase ba ŋlɔmɛ elu asɛ: “Ɛba zi bebuiti balɛ kibuinyinyi, klɛ ɛba futsu kibuiesinunu kɔ bebuiesinunu,”

²⁰ Fakɔ ebuiti nɛ alɛ? Fakɔ keplukpalete na lɛ? Fakɔ banɔ nɛ gɛ benyi denɔ kanɔ nɛ shu alɛ? Anɛ Kpaya yɛ abhɛtɛ agã edzi ebuiti nɛ kanɔ nɛ mɛ?

²¹ Alasɛ nɛ Kpaya buititi mɛ kanɔ gabɔ kalɛ kibuinyinyi mɛ ke di ti yɛ, kɛku Kpaya awɔ̃ ganɔ matimati kɛdɔ kɛkasɛ busɔlɛ buiɖɛɖɔ tɛ bayɛkɛkɔ bagɛ bayɛkɛ aŋa.

²² Yuɖanɛ ba pɛɛ ebuiyinɔanɔ kɛdɔmumɔ klɛ Grikianɛ ba pɛɛ kibuinyinyi,

²³ pɔ bulɔ buɖɔ Kristo tɛkpɛkplasɔɛ bui: kɛ nu kɛdɔ kpɛkpatanɔ kɔ Yuɖanɛ klɛ kɛ nu kɛgãbui kɔ bagɛ edi nu Yuɖanɛ,

²⁴ pɔ kɔ bagɛ Kpaya ekulu, editabha Yuɖanɛ anɛ Grikianɛ, Kristo enu Kpaya kemi anɛ Kpaya kibuinyinyi.

²⁵ Alasɛ Kpaya bugã dudɔ kibuititi lɛ kɛlɛmɛ dɛ Anɔdzyrame kibuinyinyi, klɛ Kpaya tɛmagɛganɛ kɛgɛganɛ dɛ anɔdzyrame bugɛganɛ.

²⁶ Badzya, nɔ di lɛmɛ kɛde nɔ dzi kibelɛlɛ gɛ be klu nɔ. Anɛ wunɔ gelee wunɔ tibui nɛ Anɔdzyrame buititi nu, be gelee dunu banɔ gɛ bavɛ otugba nɛ tɛ mumɔɛ mɛ.

²⁷ Pɔ Kpaya ebu ebuikpã nɛ kanɔmɛ tɛ la kpɛ kibuititi nɛ wɔ̃ɛ nɔ, Kpaya abhɛtɛ ebui nɛgɛ la dɛ gɛganɛ nɛ kanɔnɛ mɛ tɛ la kpɛ ebui gɛganɛ nɛ wɔɛ nɔ.

²⁸ Ebuidɔ zhizhiesi nɛ́ kanɔ nɛ mɛ anɛ agɛ la ma kibuinyɛbui mɛ—anɛ́ agɛ la ma—tɛ le zi ebui nɛ gɛ alɛ,

²⁹ se tɛ anɔnyanɔ eti be fekeshu nɛ yɛ ɔbha.

³⁰ Alasɛ yɛ so gɛ nɔ lɛ Kristo Yesu mɛ, gɛ ebedzi kibuinyinyi gɛ de Kpaya ɔkɔ kɔlɔ—kɛlɛ nu, bulɔ tɛnɛna, ishubhubhui anɛ tɛbhubhuiyɛkɛ.

³¹ Kɛlɛ so anasɛ gɛ ba ŋlɔmɛelu: “Kɔ agɛ efekeshu èfekeshu nɛ Apalete nɛ mɛ.”