Yox 8 - Tupanaarü Ore

Biridá rü Yoxü̃ nangãxü̃

¹ Rü nüma ga Biridá ga Chúaanecüã̱x rü Yoxü̃ nangãxü̃ rü ñanagürü:

² —Ñomarüta Pa Yox, rü quidexachigüama. ¿Rü ñuxguratáta nüxü̃ curüchauxü̃ nax ñoma wüxi ya buanecü ya tacürüxü̃ yixĩxü̃ i curü dexa?

³ Rü Tupana ya Guxãétüwa Ngẽxmacü rü taguma ínayatoxẽxẽ i ngẽma aixcüma ixĩxü̃ rü guxü̃guma tüxna nanaxã i ngẽma tamaxã naxueguxü̃.

⁴ Rü guma cunegü rü bexmana Tupanape̱xewa chixexü̃ naxüe, rü yemaca̱x nüma ga Tupana rü nüxna nanaxã ga yema poxcu ga nüxna üxü̃ naxca̱x ga yema chixexü̃ ga naxügüxü̃.

⁵ ¡Rü namaxã idexa ya yimá Tupana ya Guxãétüwa Ngẽxmacü, rü nüxna naxca̱x naca nax nüxü̃́ cungechaü̃tümüxü̃ca̱x!

⁶ Rü ngẽxguma aixcüma mea cumaxü̃gu rü mea yawe̱xgu i curü maxü̃, rü nüma rü tá cuxna nadau, rü ñu̱xũchi tá cuxü̃́ nanatáeguxẽxẽ ga yema noxri cuxü̃́ yexmaxü̃.

⁷ Rü ngẽma curü ngẽmaxü̃gü i tá cuxü̃́ ngẽxmaxü̃ rü yema curü yemaxü̃gü ga noxri cuxü̃́ yexmagüxü̃arü yexera tá nixĩ.

⁸ ¡Rü nawa nangu̱x ga yema nũxcümaü̃güxü̃ ga duü̃xü̃gümaxã ngupetüxü̃ ga yexguma tama Tupanaga naxĩnüegu! ¡Rü nagu rüxĩnü ga yema namaxã ngupetüxü̃!

⁹ Yixema rü ngexwaca̱xtama tabue rü ngẽxguma mea nagu rüxĩnüegu rü taxuxü̃ma tacua̱x. Rü ngẽma tórü ngunexü̃gü i ñoma i naanewa rü ñoma naxchipeta i üpetümarexü̃rüxü̃ nixĩ.

¹⁰ Natürü yema nüxíraxü̃güxü̃ ga duü̃xü̃gü rü tá cuxü̃ nangu̱xẽxẽ. Rü tá cuxü̃ nüxü̃ nacua̱xẽxẽ i muxü̃tama i cua̱x.

^11-12 Rü ngẽma dexnegü i taxtüpechinüwa rüxüxü̃ rü ñu̱xũchi ngẽma papíru rü dexá íngemaxü̃waxicatama nixĩ i naxügüxü̃. Natürü ngẽxguma nataxu̱xgu i dexá, rü nadoxü̱xgu rü woo tama yadaxüchigu rü nüxíra narüñe̱xẽxẽ naxü̃pa i ngẽma togü i maxẽgü.

¹³ Rü ngẽmatama nixĩ i nüxü̃ ngupetüxü̃ i guxü̃ma i duü̃xü̃gü i chixexü̃arü üruü̃gü i Tupanaxü̃ rüngü̃maexü̃. Rü guxü̃ma i nagu naxĩnüexü̃ rü ngẽxma narüxomare.

¹⁴ Rü ngẽma norü poxü̃ruü̃gü i nagu yaxõgüãxü̃ rü ñoma pawüchiaü̃rüxü̃ tama natai.

¹⁵ Rü ngẽma duü̃xü̃gü rü nawata̱a̱x nichü̱xüxgü i ngẽma pawüchiãxü̃, natürü namaxã nicaweama. Rü ngẽxguma nawa yachü̱xüxgügu i ngẽma pawüchiãxü̃ rü tama nanangenagü i norü ya.

¹⁶ Rü ngẽma duü̃xü̃gü i chixexü̃gu maxẽxü̃ rü ñoma maxẽ i ya̱u̱xetaxü̃gürüxü̃ nixĩgü. Rü ngẽxguma üa̱xcü nüxü̃ báxixgu, rü guxü̃ma i naanewa rü paxãma narüxügü.

¹⁷ Rü nutagütanüwa nügü narüxü̱xchúma̱xãxẽẽgü.

¹⁸ Natürü ngẽxguma texé natuxuchigu i nachicawa rü taxúetama nüxü̃ tacua̱x nax yéma naxügüchiréxü̃.

¹⁹ Rü ngẽmaãcü nayu rü ngẽxma nayacua̱x nax nabaxcaxü̃. Rü nachicüxü narüxügü i to i maxẽgü.

²⁰ Tupana rü taguma nüxü̃ inayarüngüma ya yimá yatü ya taguma chixexü̃ ücü. Rü tama nüxü̃ narüngü̃xẽxẽ i ngẽma duü̃xü̃gü i chixexü̃gu maxẽxü̃.

²¹ Rü nüma ya Tupana rü tá wena cuxü̃ nacugüxẽxẽ rü tá taãẽmaxã aita cuxü̃ naxüxẽxẽ.

²² Natürü ngẽma curü uanügü rü ãne tá ningẽgü. Rü napatagü i ngẽma chixexü̃arü üruü̃gü rü wüxicana tá inayarüxogü —ñanagürü ga Biridá.