Yoná 3 - Tupanaarü Ore

Nínibecüã̱xgü rü nüxü̃ narüxoe ga nacümagü ga chixexü̃ rü Tupanaca̱x nadaugü

¹ Rü wenaxarü Yonámaxã nidexa ga Cori ya Tupana rü ñanagürü nüxü̃:

² —¡Ẽcü yima taxü̃ne ya ĩane ya Nínibewa naxũ rü duü̃xü̃gümaxã nüxü̃ ixu i ngẽma tá cumaxã nüxü̃ chixuxü̃! —ñanagürü.

³ Rü nüma ga Yoná rü Tupanaga naxĩnü rü inaxũãchi nax Nínibewa naxũxü̃ca̱x. Rü guma Nínibearü ĩane rü tomaepü̱x ga ngunexü̃ ninge nax nagu yaxũãgüchigüxü̃.

⁴ Rü nüma ga Yoná rü guma ĩanegu naxücu rü guxü̃ma ga yema ngunexü̃ rü nagu nixũãgüchigü, rü tagaãcü ñaxü̃maxã yexma nicaechigü: —Rü 40 i ngunexü̃wa nanguxgu rü Tupana tá nayanaxoxẽxẽ ya daa ĩane ya Nínibe —ñanagürü.

⁵ Rü yexguma yemaxü̃ naxĩnüegu ga yema Nínibecüã̱x ga duü̃xü̃gü ga iyaexü̃ rü buxü̃gü, rü Tupanaaxü̃́ nayaxõgü. Rü nanaxunagügü nax Tupanaca̱x naxaureexü̃ rü nagu yacu̱xgüxü̃ ga naxchirugü ga témüxü̃, yerü poraãcü nügümaxã nangechaü̃gü.

⁶ Rü yexguma Nínibearü ãẽ̱xgacüxü̃tawa nanguxgu ga yema dexa, rü nüma rü norü tochicaxü̃wa inachi rü ínacuxuchi ga norü ãẽ̱xgacüchiru rü témüxü̃ ga naxchirugu nicu̱x rü waixü̃müarü ãte̱xexü̃wa narütomare.

⁷ Rü ñu̱xũchi nüma ga ãẽ̱xgacü rü norü ngü̃xẽẽruü̃güxü̃ namu nax naxunagügüãxü̃ca̱x ga aurechiga. Rü ñanagürügü: —¡Taxúetama texé tachibü! ¡Rü ngẽxgumarüxü̃ ta rü taxúetama texé tanachibüexẽxẽ rü tayaxaxegüxẽxẽ i tümaarü wocagü rü carnérugü! —ñanagürügü.

⁸ Rü yexgumarüxü̃ ta nanaxunagü ga ãẽ̱xgacüarü ore ga ñaxü̃: —¡Guxãma i pemax, Pa Duü̃xü̃güx, rü témüxü̃ i naxchirugu picu̱xgü rü ngẽmaãcü ípenawe̱x nax pegümaxã pengechaü̃güxü̃! ¡Rü aixcüma Tupanana pecagü rü namaxã nüxü̃ pixu i perü chixexü̃gü! ¡Rü wüxichigü i pemax rü nüxü̃ perüxoe i pecüma i chixexü̃ rü ngẽma nax pegü pedaixü̃ rü pemáetawa̱xegüxü̃!

⁹ Rü bexmana ngẽxguma ya Tupana rü tá nüxü̃́ ingechaü̃tümüxü̃gü rü tá narüngüxmü nax tamaxã nanuxü̃, rü taxũtáma tüxü̃ nadai —ñanagürügü.

¹⁰ Rü Tupana rü nüxü̃ nadau ga yema Nínibecüã̱x ga duü̃xü̃gü ügüxü̃ nax ñuxãcü nüxü̃ naxoexü̃ ga nacüma ga chixexü̃. Rü yemaca̱x ga nüma ga Tupana rü ínayachaxãchi ga yema poxcu ga noxri namaxã naxueguxü̃.