Yeremía 49 - Tupanaarü Ore

Ore i Amóü̃chiga

¹ Ñaa nixĩ i Cori ya Tupanaarü ore i Amóü̃chiga. Rü yema Gáxarü naane, rü Iraétanüxü̃arüchire̱x nixĩ, natürü yema Iraétanüxü̃ rü tama chauga naxĩnüe. Rü ngẽmaca̱x i ngẽma naane rü ñu̱xma naxme̱xwa nangẽxma i ngẽma Amóü̃tanüxü̃ i tupananeta i Milcóü̃xü̃ icua̱xüü̃güxü̃.

² Rü nüma ya Cori ya Tupana rü ñanagürü: —Rü nawa tá nangu i ngunexü̃ nax yima Amóü̃tanüxü̃arü ĩane ya Rabáwa tá norü duü̃xü̃güxü̃ nüxü̃ chaxĩnüexẽẽxü̃ nax tagaãcü daimaxã aita naxüexü̃ i norü uanügü. Rü yima ĩane rü nachitaxü̃xica tá ngéma nayaxü. Rü ngẽma nachixü̃anearü ĩanegü rü tá ínagu. Rü ngẽxguma i ngẽma Iraétanüxü̃ rü wena tá nanayauxgü ya yima norü ĩanegü. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.

³ Rü ñanagürü ta: —¡Naxaxu Pa Ĩane ya Ebóü̃x! Erü yima ĩane ya Ái rü marü nagu napogüe. ¡Pexauxe, Pa Ngexü̃güx i Rabácüã̱x! ¡Rü ngechaü̃chirugu picu̱xgü! ¡Rü perü ngechaü̃maxã pegüremügu pecüxgüe! ¡Rü nu ne penaxü ñoma wüxi i ãũãẽxü̃rüxü̃! Erü ngẽma perü tupananeta rü to i nachixü̃anewa nanangegü wüxigu namaxã i norü chacherdótegü rü ngẽma duü̃xü̃gü i tachigagüxü̃.

⁴ Rü pemax, Pa Amóü̃tanüxü̃x, rü pegü picua̱xüü̃gü namaxã i ngẽma perü metachinüanexü̃gü i nanetü nawa mea rüxügüxü̃. Rü ngẽma muxü̃ i perü ngẽmaxü̃gügu peyaxõgü. Rü nagu perüxĩnüe nax tagutáma texé pexca̱x íyaxüãchixü̃.

⁵ Rü dücax rü choma rü guxü̃watama pexca̱x íchananguxẽxẽ i muü̃. Rü choma ya Cori ya Tupana ya Guxãétüwa Ngẽxmacü rü ngẽma ñachagürü. Rü wüxichigü i pema rü pema ípenaxwa̱xexü̃wa tá pibuxmü. Rü taxúetama wena pexü̃ tangutaque̱xexẽxẽ.

⁶ Natürü ngẽmawena rü tá Amóü̃tanüxü̃xü̃ charüngü̃xẽxẽxü̃ nax nawoeguxü̃ca̱x. Rü choma ya Cori ya Tupana nixĩ i ngẽma ñachaxü̃ —ñanagürü.

Ore i Edóü̃anechiga

⁷ Ñaa nixĩ i Cori ya Tupana ya Guxãétüwa Ngẽxmacüarü ore nachiga i Edóü̃ane. Rü ñanagürü: —Yima ĩane ya Temáü̃wa rü marü nataxuma i duü̃xü̃gü i aixcüma nüxü̃ cua̱xüchixü̃. Rü ngẽma nüxü̃ cuáxüra rü tama nüxü̃ nacua̱x i ta̱xacü tá naxügüxü̃. Rü Temáü̃wa nataxuma i duü̃xü̃gü i aixcüma nüxü̃ cuáxü̃ nax naxucu̱xẽãxü̃ i duü̃xü̃gü.

⁸ Pemax, Pa Ĩane ya Dedáü̃cüã̱x, ¡pibuxmü nax ãxmaxü̃gügu pegü peyarücu̱xgüxü̃ca̱x! Erü tá chanapoxcu i guxü̃ma i Edóü̃anecüã̱xgü i Echaútanüxü̃ ixĩgüxü̃. Rü marü nawa nangu i ngẽma ngunexü̃ i nagu tá chanapoxcuxü̃.

⁹ Rü ngẽxguma nabuxgüãgu i úbagü rü ngéma nayaxügüxẽxẽ i ñuxre i úbaya̱xagü. Rü ngẽxguma chütacü ngéma naxĩxgu i ngĩ́ta̱xagüxü̃ rü tama guxü̃ma i ngẽma úbagüca̱x nangĩ̱xgü. Rü naxca̱x nangĩgü i ngẽma nanaxwa̱xegüxü̃xicatama.

¹⁰ Natürü i chomax rü ngẽxguma Echaútanüxü̃xü̃ chapoxcugu rü taxũtáma ngéma chayaxüxẽxẽ. Rü tá nüxü̃ ichayangau i norü cu̱xchicagü rü taxúetama cha̱u̱xcha̱xwa iticu̱x. Rü naxacügü rü natanüxü̃ rü ngẽma napatagüarü ngaicamagu pegüxü̃ rü guxü̃táma nayue. Rü bai i wüxi tá ínayaxü i tá ñaxü̃:

¹¹ “¡Choxna namugü i curü taxcutagü nax choma nüxna chadauxü̃ca̱x! Rü choma rü tá nüxna chadau i ngẽma curü yutegüxü̃”, ñaxü̃.

¹² Erü choma ya Cori ya Tupana rü ñachagürü: “Nayexma ga duü̃xü̃gü ga tama poxcu namaxã chaxueguxü̃ natürü tá napoxcueama. ¿Rü ñuxãcü nagu perüxĩnüe nax ngẽma poxcuxcha̱xwa tá pibuxmüxü̃? Rü pemaxã nüxü̃ chixu rü aixcüma tá pepoxcue.

¹³ Choma ya Cori ya Tupana rü chauégagu pemaxã nüxü̃ chixu rü yima perü ĩane ya Bochrá rü wüxi i chianexü̃ tá nixĩ rü nachitaü̃ica tá ínayaxü. Rü ngẽma togü i nachixü̃anecüã̱x i duü̃xü̃gü rü chixri yima ĩanechiga tá nidexagü, rü tá namaxã naba̱i̱xãchie, rü tá nüxü̃ nacugüe. Rü yima ĩane rü tá nangeãcumare. Rü guxü̃nema ya yima naigü ya Edóü̃anearü ĩanegü rü guxü̃gutáma nachitaü̃ica ínayaxü” —ñanagürü.

¹⁴ Marü chauxü̃tawa nangu ga Cori ya Tupanaarü ore ga ñaxü̃: —Wüxi i orearü ngeruxü̃ rü tá guxü̃ i nachixü̃anegümaxã nüxü̃ nixuchigü i ore i ñaxü̃: “¡Pegümaxã pengutaque̱xegü nax Edóü̃aneca̱x ípeyaxüãchixü̃ca̱x! ¡Pegü pimexẽxẽgü nax Edóü̃maxã pegü pedaixü̃ca̱x! ñaxü̃.

¹⁵ Pa Edóü̃x, cuma tá nixĩ i guxü̃ i nachixü̃anegütanüwa cuturaxü̃. Rü tá cuxü̃ nacugüe rü tá cuxchi naxaie i duü̃xü̃gü.

¹⁶ Cuma rü cugü quicua̱xüxü̃ namaxã i curü pora i namaxã cunamuü̃xẽxẽ i ngẽma togü i nachixü̃anegü. Rü nutagüarü ãxmaxü̃güwa pemaxẽ ya ma̱xpǘnegüarü ngüchitaeruxü̃güwa. Natürü woo ñoma ĩyürüxü̃ ngüchitaeruxü̃gügu pexü̃́ nangẽxmagügu i pechica, rü choma rü ngéma tá pexü̃ ícharüxĩgüxẽxẽama. Rü choma ya Cori ya Tupana nixĩ i ngẽma ñachaxü̃” —ñanagürü.

¹⁷ Rü ñanagürü ta: —Ngẽxguma nagu napogüegu ya Edóü̃anearü ĩanegü rü duü̃xü̃gü rü tá poraãcü naba̱i̱xãchie. Rü guxãma ya yíxema ngéma üpetüxe rü tá taba̱i̱xãchi i ngẽxguma nüxü̃ tadaugügu i ngẽma norü poxcu.

¹⁸ Rü yexgumarüxü̃ nax iyanaxoxü̃ ga Chodóma, rü Gomóra, rü guxü̃nema ga guma ĩanegü ga nüxna ngaicamagüne, rü ngẽxgumarüxü̃ tá ta nixĩ ya Edóü̃arü ĩanegü nax inayanaxogüxü̃. Rü tagutáma texé ngéma tamaxẽ rü bai ngéma taxüpetü. Rü choma ya Cori ya Tupana nixĩ i ngẽma ñachaxü̃.

¹⁹ Rü ngürüãchi tá ngéma changu ñoma wüxi i leóü̃ i natü i Yudáü̃arü naixnecüwa igoxochixü̃ nax maxẽnecüwa naeü̃na yuxuxü̃rüxü̃. Rü ngẽxgumarüxü̃ tá namaxã chanaxü i Edóü̃anecüã̱xgü, rü nachixü̃anewa tá chayabuxmüxẽxẽ. Rü ngéma tá nüxü̃ chaxuneta i ngẽma ãẽ̱xgacü i choma chanaxwa̱xexü̃ nax ngẽma naanemaxã inacuáxü̃ca̱x. ¿Rü texé chomaxã tawüxigu? ¿Rü texé tá chomaxã tügü tadaixchaü̃? ¿Rü ta̱xacürü dauruxü̃ tá chope̱xewa nügü ínapoxü̃?

²⁰ ¡Íperüxĩnü i ngẽma poxcu i Edóü̃aneca̱x nagu charüxĩnüxü̃, rü ngẽma guxchaxü̃ i Temáü̃arü duü̃xü̃güca̱x íchamexẽẽxü̃! Rü woo naxacügü i íxraxü̃ rü norü uanügü tá nachixü̃anewa nanagagü. Rü Edóü̃anearü ĩanegü rü tá nagu napogüe.

²¹ Rü ngẽxguma Edóü̃ norü uanügümaxã nügü nadaixgu, rü norü uanügü nüxü̃ rüporamaegügu, rü tá natagatanüxü̃chi, rü ngẽmaca̱x tá nidu̱xruane. Rü ngẽma duü̃xü̃gü rü tá aita naxüe rü ngü̃xẽẽca̱x ínacagü. Rü ngẽma nax aita naxüexü̃ rü tá nüxü̃ naxĩnüe ñu̱xmata Már ya Dauchíüxü̃wa nangu.

²² Rü Edóü̃anearü uanügü rü ĩane ya Bochráca̱x tá ínayaxüãchi ñoma wüxi i ĩyü rü naeü̃ca̱x inagoxü̃rüxü̃. Rü Edóü̃arü churaragü rü tá norü muü̃maxã nidu̱xrue ñoma wüxi ya ngexe ya íxraxacüxerüxü̃ —ñanagürü.

Ore i Damácuchiga

²³ Rü ñanagürü ta: —Ñaa nixĩ i ore i Damácuca̱x ixĩxü̃. Rü yima ĩanegü ga Amá rü Arpáx rü naxoegaãẽgü, erü nachiga marü nüxna nangu i ore i chixexü̃. Rü poraãcü namuü̃e rü tama nataãẽgü.

²⁴ Rü Damácu rü inayanguãxẽ rü ínamemaregü nax naxĩgüxü̃. Rü poraãcü namuü̃e, rü naxoegaãxẽ, rü poraãcü ngúxü̃ ningẽgü ñoma wüxi i ngexü̃ i íxraxacüchaü̃xü̃rüxü̃.

²⁵ Rü yima ĩane ya Damácu ya tachigane ga noxri taãẽgu imaxü̃ne, rü ñu̱xma ngéma nata̱xmare rü nangeãcu.

²⁶ Rü ngẽxguma norü ngunexü̃wa nanguxgu nax norü uanügü tá nada̱i̱xü̃, rü norü ngextü̱xücügü rü namawa tá ninuagümare rü guxü̃ma i ngẽma norü churaragü rü tá nayue. Rü choma ya Cori ya Tupana nixĩ i ngẽma ñachaxü̃.

²⁷ Rü choma rü tá nawa chanangixichi i Damácuarü poxeguxü̃tápü̱xgü. Rü ngẽma üxü rü tá nayagu i ãẽ̱xgacü i Ben-adáxarü ãẽ̱xgacüpatagü —ñanagürü.

Ore i Quedáxchiga rü Achóxchiga

²⁸ Ñaa nixĩ i Cori ya Tupanaarü ore nachiga i Quedáxtanüxü̃ rü Achóxtanüxü̃arü ãẽ̱xgacügü ga Nabucudonochó ya Babiróniaanearü ãẽ̱xgacü nüxü̃ rüporamaexü̃. Rü nüma ya Cori ya Tupana rü Nabucudonochóxü̃ ñanagürü: —¡Inaxũãchi rü naxca̱x íyagoõchi i ngẽma Quedáxtanüxü̃ i éstewa maxẽxü̃! ¡Rü nadai!

²⁹ ¡Rü nüxna napuxü̃ ya napatagü ya naxchirunaxca̱x, rü norü carnérugü, rü guxü̃ma i napataarü ngẽmaxü̃gü! ¡Rü nüxna napuxü̃ i norü caméyugü! ¡Rü tagaãcü aita pexügü rü ñaperügügü: “Guxü̃wama nangẽxma i ãũcümaxü̃ rü muü̃”, ñaperügügü!

³⁰ Rü pemax, Pa Achóxcüã̱xgüx, ¡pibuxmü nax pegü peyarücu̱xgüxü̃ca̱x! Rü choma ya Cori ya Tupana nixĩ i pemaxã nüxü̃ chixu i ngẽma. Erü Nabucudonochó ya Babiróniaanearü ãẽ̱xgacü rü nagu narüxĩnü nax pexca̱x íyagoõchixü̃.

³¹ Rü Cori ya Tupana rü ñanagürü: “¡Naxca̱x ipexĩãchi i ngẽma duü̃xü̃gü i nagu rüxĩnüexü̃ nax taxuxü̃táma ta̱xacü nüxü̃ ngupetüxü̃! Rü ngẽma norü ĩanearü poeguxü̃ rü nataxuma i norü ĩã̱xgü rü nataxuma i norü tairuü̃gü. Rü ngẽma duü̃xü̃gü rü nüxicatama chianexü̃wa namaxẽ.

³² ¡Rü naxca̱x pengĩ́e i norü caméyugü rü guxü̃ma i norü wocagü! Rü choma rü guxü̃ i nachixü̃anegügu tá chanawoone i ngẽma duü̃xü̃gü i nügü idücatügüxü̃. Rü tá naxca̱x íchananguxẽxẽ i taxü̃ i guxchaxü̃gü i guxü̃ i nachixü̃anegüwa ne ĩxü̃. Rü choma ya Cori ya Tupana nixĩ i ngẽma ñachaxü̃.

³³ Rü ngẽma Achóxtanüxü̃arü naane rü guxü̃gutáma chianexü̃ tá nixĩ rü ngéma tá namaxẽ i dauxchitacüã̱x i airugü. Rü tagutáma texé wena nawa tamaxü̃ i ngẽma naane, rü bai i texé ngéma taxüpetümare” —ñanagürü.

Ore i Eráü̃chiga

³⁴ Rü yexguma Chedequía inaxügügu nax Yudáanearü ãẽ̱xgacü yaxĩxü̃ rü Cori ya Tupana Yeremíamaxã nüxü̃ nixu i ñaa ore i Eráü̃chiga. Rü ñanagürü nüxü̃:

³⁵ —Choma ya Cori ya Tupana ya Guxãxétüwa Ngẽxmaxe rü ñachagürü: “Choma rü tá chayabüyegü i Eráü̃arü würagü i naxne i meama nüxü̃ nacua̱xgüxü̃ nax namaxã nadaietaxü̃.

³⁶ Rü Eráü̃arü duü̃xü̃güca̱x tá íchanangugüxẽxẽ i norü uanügü i ñoma buanecügü ya guxü̃cüwawa ne ĩcürüxü̃. Rü ngẽmaãcü guxü̃ i nachixü̃anegügu tá chanawoonexẽxẽ i ngẽma Eráü̃tanüxü̃. Rü ngẽmaãcü guxü̃ i nachixü̃anegu tá nawoonemare.

³⁷ Rü choma rü tá norü muü̃maxã chayadu̱xruexẽxẽ i ngẽma Eráü̃tanüxü̃ nape̱xewa i norü uanügü i nadaixchaü̃xü̃. Rü chorü numaxã tá naxca̱x íchananguxẽxẽ i taxü̃ i guxchaxü̃gü. Rü ngẽma Eráü̃tanüxü̃ca̱x tá íchananguxẽxẽ i dai ñu̱xmatáta nagú i ngẽma duü̃xü̃gü. Rü choma ya Cori ya Tupana nixĩ i ngẽma ñachaxü̃.

³⁸ Rü Eráü̃anegu tá chanaxǘ i chorü toruxü̃ rü tá chanayuexẽxẽ i norü ãẽ̱xgacü rü norü ngü̃xẽẽruü̃gü. Rü choma ya Cori ya Tupana nixĩ i ngẽma ñachaxü̃.

³⁹ Natürü wüxi i ngunexü̃gu rü tá nüxü̃ charüngü̃xẽxẽ i ngẽma Eráü̃tanüxü̃ nax nachixü̃aneca̱x nawoeguxü̃ca̱x. Rü choma ya Cori ya Tupana nixĩ i ngẽma ñachaxü̃” —ñanagürü.