Wiyaegü 98 - Tupanaarü Ore

Nüma ya Cori ya Tupana rü uanügüxü̃ narüporamae

¹ ¡Rü ngexwaca̱xü̃xü̃ i wiyaegu Cori ya Tupanaca̱x pewiyaegü! Yerü muxü̃ma ga mexü̃ ga taxü̃gü norü poramaxã naxü. Rü nachacüxü ya üünene rü poranemaxã tórü uanügüxü̃ narüporamae.

² Rü nüma ya Cori rü nanaxunagü nax norü uanügüxü̃ naporamaexü̃. Rü guxü̃ma i nachixü̃anegüxü̃ nüxü̃ nadauxẽxẽ nax mea guxü̃maxã inacuáxü̃

³ Erü nüma rü tüxü̃ nangechaü̃ rü tama nüxü̃ narüngüma ga norü uneta ga Iraétanüxü̃maxã nüxü̃ yaxuxü̃. Rü yema nax tórü uanügüxü̃ naporamaexü̃ rü guxü̃ i naanewa nanguchiga.

⁴ Pa Duü̃xü̃gü i Ñoma i Naanewa Maxẽxü̃x ¡rü taãẽãcü naxca̱x pewiyaegü ya Tupana! ¡Rü tagaãcü perü wiyaegümaxã nüxü̃ picua̱xüü̃gü!

⁵ ¡Rü árpamaxã pepaxetagüãcüma naxca̱x pewiyaegü ya Cori! ¡Rü perü paxetaruü̃gü i ãcúnüxü̃maxã pegü pepaxpe̱xegüãcüma naxca̱x pewiyaegü!

⁶ ¡Rü perü paxetaruü̃gü i nagu picuegüxü̃maxã taãẽãcüma ãẽ̱xgacü ya Coripe̱xewa pewiyaegü!

⁷ Rü name nixĩ nax norü taãẽmaxã naxãũgaxü̃ i ngẽma már rü guxü̃ma i nawa ngẽxmagüxü̃. Rü ngẽxgumarüxü̃ ta i ñoma i naane rü guxü̃ma i duü̃xü̃gü i nawa maxẽxü̃ rü name nixĩ nax nataãẽgüxü̃.

^8-9 Rü guxü̃ma i natügü rü name nixĩ i Cori ya Tupanaca̱x naxãũgatanüxü̃ ñoma napéme̱xgüxü̃rüxü̃. Rü guxü̃nema ya ma̱xpǘnegü rü name nixĩ i Tupanape̱xewa nataãẽgü. Erü nüma rü nua naxũ nax ñoma i naanemaxã iyacuáxü̃ca̱x. Rü nüma rü aixcüma tá guxü̃ma i nachixü̃anecüã̱xmaxã meama inacua̱x.