Wiyaegü 97 - Tupanaarü Ore

Nüma ya Cori nixĩ i ãẽ̱xgacü yixĩxü̃

¹ ¡Nataãxẽ, Pa Ñoma i Naanex! Rü pema Pa Muxü̃ i Capaxũgüx ¡rü petaãxẽgü! Erü nüma ya Cori ya Tupana nixĩ i guxü̃arü ãẽ̱xgacü yixĩxü̃.

² Rü pamüemaxü̃ i caixanexü̃maxã ínaxümaeguãchi. Rü nüma nixĩ i ãẽ̱xgacü i aixcüma mea nangugüxü̃ i wüxichigü i duü̃xü̃güarü maxü̃. Rü aixcüma nawe̱xgu i ngẽma namaxã naxueguxü̃ i wüxichigü.

³ Rü wüxi i üxüema rü nape̱xegu nixũ, rü ngẽmamaxã ínanagu i norü uanügü i nacüwawa ngẽxmagüxü̃.

⁴ Rü yimá norü ãẽmacü rü ñoma i naanewa nanguema. Rü nüma i ñoma i naane rü nidu̱xru i ngẽxguma nüxna nanguemagu.

⁵ Rü nape̱xewa ya Cori ya ñoma i naanearü yora ixĩcü rü yima ma̱xpǘnegü rü inadexgü ñoma werarüxü̃.

⁶ Rü guxü̃ma i ngẽma dauxü̃wa nüxü̃ idauxü̃ rü tüxü̃ nüxü̃ nacua̱xẽxẽ nax nüma ya Tupana rü ãẽ̱xgacü ya mecü yixĩxü̃. Rü guxü̃ma i duü̃xü̃gü i ñoma i naanecüã̱x rü nüxü̃ nadaugü nax naxüünexü̃ i nümax.

⁷ Rü Tupanape̱xewa narümaachitanü i guxü̃ma i ngẽma duü̃xü̃gü i tupananetachicüna̱xãgümaxã taãẽgüxü̃ rü nüxü̃ icua̱xüü̃güxü̃. Erü guxü̃ma i ngẽma tupananetachicüna̱xãgü rü Cori ya Tupanape̱xegu narümaachitanü.

⁸ Pa Corix, yima ĩane ya Chióü̃ rü guxü̃ma ya yima Yudáanearü ĩanegü rü nataãẽgü namaxã i curü mugü.

⁹ Erü cumax, Pa Cori ya Guxãétüwa Ngẽxmaxex, rü namaxã icucua̱x i guxü̃ma i ñaa naane. Rü cuma rü guxü̃ma i ngẽma tupananetagüétüwa cungexma.

¹⁰ Rü nüma ya Cori ya Tupana rü tüxü̃ nangechaü̃ ya yíxema nüxü̃ oxe i ngẽma chixexü̃. Rü tüxna nadau ya yíxema aixcüma naga ĩnüexe rü tüxü̃ ínapoxü̃ naxme̱xwa i ngẽma chixexü̃gu maxẽxü̃ i duü̃xü̃gü.

¹¹ Rü ngẽma duü̃xü̃gü i mea maxẽxü̃ca̱x nixĩ i yangunexü̃xü̃. Rü ngẽma taãxẽ i aixcüma ixĩxü̃ rü ngẽma duü̃xü̃gü i tama chixexü̃ ügüxü̃ca̱x nixĩ.

¹² Pa Duü̃xü̃gü i Mea Maxẽxü̃x ¡namaxã petaãẽgü ya Cori, rü nüxü̃ picua̱xüü̃gü i naéga i üünexü̃!