Wiyaegü 96 - Tupanaarü Ore

¡Ngexwaca̱xü̃xü̃ i wiyaegu Cori ya Tupanaca̱x pewiyaegü!

¹ ¡Ngexwaca̱xü̃xü̃ i wiyaegu Cori ya Tupanaca̱x pewiyaegü i guxãma i pemax i ñoma i naanewa maxẽxü̃!

² ¡Rü naxca̱x pewiyaegü rü nüxü̃ picua̱xüxü̃gü! ¡Rü guxü̃ i ngunexü̃gügu penaxunagü nax nüma yixĩxü̃ i tüxü̃ namaxẽxẽxẽxü̃!

³ ¡Rü guxü̃ma i nachixü̃anecüã̱xmaxã nüxü̃ pixuchiga nax nüma rü naxüünexü̃ rü naxüaxü̃ i muxü̃ma i mexü̃gü i norü poramaxã naxüxü̃!

⁴ Erü nüma ya Cori ya Tupana rü guxãétüwa nangẽxma, rü ngẽmaca̱x name nax nüxü̃xicatama icua̱xüü̃güxü̃. Erü nüma rü naxãũcümaxü̃chi rü guxü̃ma i ngẽma duü̃xü̃gü namaxã tupanaã́xü̃étüwa nangẽxma.

⁵ Rü ngẽma togü i nachixü̃anegüarü tupanagü rü taxuxü̃ma nixĩgü. Natürü nüma ya Cori ya Tupana nixĩ ga naxüxü̃ i guxü̃ma i ngẽma dauxü̃wa nüxü̃ idauxü̃.

⁶ Rü nüma ínangexmaxü̃wa rü nangóone. Rü napatawa nangẽxma i pora rü guxü̃ma namexẽchi.

⁷ Pa Guxü̃ma i Nachixü̃anecüã̱x ¡rü nüxü̃ pixuchigagü nax nüma ya Tupana rü nüxicatama nixĩ i aixcüma naporaxü̃ rü naxüünexü̃!

⁸ ¡Rü nüxü̃ pengechaü̃güãcüma nüxü̃ picua̱xüxü̃gü! Erü nüma rü guxãétüwa nangẽxma. ¡Rü napataa̱xtügu pechocuxü̃ namaxã i perü ãmaregü!

⁹ ¡Rü nüxü̃ picua̱xüxü̃gü nawa ya yima napata ya mexẽchine! Rü name nixĩ nax guxü̃ma i duü̃xü̃gü i ñoma i naanewa maxẽxü̃ rü nape̱xegu nacaxã́pü̱xügü.

¹⁰ ¡Rü guxü̃ma i nachixü̃anecüã̱xgümaxã nüxü̃ pixu rü ñapegügü: —Nüma ya Cori ya Tupana nixĩ i ãẽ̱xgacü ya guxãétüwa ngẽxmacü yixĩxü̃ —ñapegügü! Rü nüma rü wüxitama ga namaxü̃gu nayaxũxẽxẽ ga ñoma ga naane nax tama ngẽma namaxü̃na yaxũgachixü̃ca̱x. Rü nüma nixĩ i meama guxü̃ma i nachixü̃anegümaxã inacuáxü̃.

¹¹ Rü nataãẽgü i daxũguxü̃ i naane rü ñoma i naane. Rü ngẽxgumarüxü̃ ta norü taãẽmaxã naxãũga i ngẽma már, rü naxãũgatanü i guxü̃ma i ngẽma nawa ngẽxmagüxü̃.

^12-13 Rü nataãxẽ ta i naane rü guxü̃ma i nanetügü i nagu togüxü̃. Rü ngẽma naigü i naixnecüwa ngẽxmagüxü̃ rü name nixĩ i taãẽãcü nicuxcu nape̱xewa ya Cori ya Tupana ya núma ũcü. Erü nüma ya Cori ya Tupana rü nua tá naxũ nax ñoma i naanemaxã inacuáxü̃ca̱x. Rü nüma rü aixcüma meama tá guxü̃ma i nachixü̃anegümaxã inacua̱x.