Wiyaegü 84 - Tupanaarü Ore

Choxü̃́ nangúchaü̃ nax Tupanapatawa changexmaxü̃

¹ Pa Cori Pa Tupanax ya Guxãétüwa Ücüx, rü namexẽchi ya cupata ya üünene.

² Rü poraãcü choxü̃́ nangúchaü̃ nax cupataã̱xtügu chaxücuxü̃. Rü guxü̃ma i chorü taãẽmaxã cuxca̱x chawiyaechaü̃ Pa Tupana ya Guxü̃guma Maxü̃cüx.

³ Rü woo i chirugü rü togü i werigü rü naxãchica i ngéma cupatawa nax ngẽxma naxüxchiãü̃güxü̃ca̱x, Pa Chorü Tupana Pa Chorü Ãẽ̱xgacü ya Guxãétüwa Ücüx.

⁴ Rü tataãẽgü ya yíxema cupatawa ngẽxmagüxe rü guxü̃guma cuxü̃ icua̱xüü̃güxe.

⁵ Rü tataãẽgü ya yíxema cuxü̃tagu tümaarü ngü̃xẽẽxü̃ iyanga̱u̱xe rü yíxema yáxü̃wa ne ĩxẽ nax yima curü ma̱xpǘnewa cuxü̃ tayarücua̱xüü̃güxü̃ca̱x.

⁶ Rü ngẽxguma ngẽma doxonexü̃ i pachitamaxü̃ i Naxgüxü̃ẽtügu ãégaxü̃wa tangupetütanügu rü cuma rü ngéma tá cunamu ya pucü nax ngẽmaãcü nayimaxü̃ca̱x ya bairawegü.

⁷ Rü wüxichigü i ngunexü̃gu rü yexeraãcü tá tiporaetanü. Rü ngẽxguma curü ma̱xpǘne ya üünene ya Chióü̃wa tangugügu, rü ngéma tá cuxü̃ tadaugü, Pa Tupanax.

⁸ Pa Cori Pa Tupana ya Guxãétüwa Ngẽxmacü ya Iraéarü Tupanax ¡rü nüxü̃ naxĩnü i chorü yumüxẽ!

⁹ Pa Tupana i Torü Poxü̃ruxü̃x ¡rü cuxü̃́ nangechaxü̃tümüxü̃ ya yimá cuma nüxü̃ cuxunetacü nax Iraéanecüã̱xgüarü ãẽ̱xgacü yixĩxü̃ca̱x!

¹⁰ Rü ngẽma 1,000 i ngunexü̃ i nagu ngextámare changexmaxü̃arü yexera rü narümemae nixĩ nax wüxitama i ngunexü̃ cupataã̱xtüwa changexmaxü̃. Rü narümemae nax cupataarü ĩã̱xarü dauruü̃mare chixĩxü̃, Pa Tupanax, rü tama chixexü̃ ínaxügüxü̃wa nax changexmaxü̃.

¹¹ Erü nüma ya Cori ya Tupana rü norü duü̃xü̃güxü̃ nibáixmaxü̃ rü ínanapoxü̃. Rü yíxema tama naxügüxe i ngẽma chixexü̃ rü nüma ya Tupana rü tüxü̃ nangechaü̃ rü tüxü̃ nicua̱xüxü̃ rü tama tüxna nanachu̱xu i norü mexü̃.

¹² Pa Cori Pa Tupana ya Guxãétüwa Ngẽxmacüx, rü tataãxẽgü ya yíxema aixcüma cugu yaxõgüxe.