Wiyaegü 83 - Tupanaarü Ore

Yumüxẽ i nawa Tupanaarü ngü̃xẽxẽca̱x ínacagüxü̃

¹ Pa Tupanax ¡taxṹ i curüchianexü̃, rü taxṹ i ngẽxma curüxã̱ũ̱xmarexü̃! ¡Rü nangãxü̃ i torü yumüxẽ rü toxü̃ ínanguxü̃xẽxẽ!

² ¡Dücax i ngẽma curü uanügü i cuxchi aiexü̃! Rü nümagü rü nananuexẽxẽ i duü̃xü̃gü nax tama cuga naxĩnüexü̃ca̱x.

³ Rü nüma rü meama nanangugügü rü naxca̱x nadaugü nax ñuxãcü tá curü duü̃xü̃gü i cumatama ícupoxü̃xü̃xü̃ naporamaegüxü̃.

⁴ Rü nagu narüxĩnüe nax ñuxãcü nua toxü̃tawa naxĩxü̃ nax toxü̃ nada̱i̱xü̃ca̱x nax ngẽmaãcü itayarüxoxochixü̃ca̱x rü taxúema nüxü̃ cuáxü̃ca̱x i ngẽma tochixü̃aneéga i Iraé.

⁵ Pa Tupanax, cuxca̱x nügümaxã nangutaque̱xegü rü wüxigu nügümaxã inaxügagü nax curü duü̃xü̃güxü̃ nada̱i̱xü̃ca̱x.

^6-7 Rü ngẽmaãcü toxca̱x ínayaxüãchichaü̃ i ngẽma Edóü̃anecüã̱xgü, rü Ismaétanüxü̃ ga Agátaagü, rü Moátanüxü̃, rü Guebátanüxü̃, rü Amóü̃tanüxü̃ rü Amaréxtanüxü̃ rü Firitéucüã̱xgü, rü Tírucüã̱xgü.

⁸ Rü woo i ngẽma Achíriaanecüã̱xgü rü ngẽma Loxtanüxü̃ rü natanügu naxãgü.

^9-10 Pa Tupanax ¡ẽcü ngẽma torü uanügüxü̃ nadai yexgumarüxü̃ nax cunada̱i̱xü̃ ga yema Madiáü̃tanüxü̃ rü ãẽ̱xgacü ga Chíchara rü ãẽ̱xgacü ga Yabíü̃ ga Quichóü̃arü natügu yuxü̃ ga Endóxarü ĩanewa! Rü nümagü rü ñu̱xma rü wamüanexü̃ ga waixü̃mü nixĩgü.

^11-12 Rü ngẽma churaragüarü ãẽ̱xgacügü i ñu̱xma toxca̱x íyaxü̃ãchichaü̃xü̃ ¡rü ẽcü nadai yexgumarüxü̃ nax cunada̱i̱xü̃ ga yema churaragüarü ãẽ̱xgacügü ga Oréx rü Chéx! ¡Rü nadai i norü ãẽ̱xgacügü yexgumarüxü̃ nax cunada̱i̱xü̃ ga yema ãẽ̱xgacügü ga Zéba rü Salmuná ga curü duü̃xü̃güarü wocachitaü̃gü nügüxü̃́ yauxgüchaü̃xü̃!

¹³ Pa Tupanax, ngẽma torü uanügü rü tanaxwa̱xe nax chuchuxü̃eta i buanecü idixgüxẽẽxü̃rüxü̃ cuyaxĩgüxẽxẽ. ¡Rü ñoma naixatü i pagüxü̃ i buanecü cuenagütanüxü̃rüxü̃ yaxĩgüxẽxẽ!

^14-15 Rü ñoma üxüema i naixnecü ixaxẽẽxü̃ rü nagu̱xẽẽxü̃rüxü̃ tanaxwa̱xe i curü numaxã nawe quingechigü i ngẽma torü uanügü. ¡Rü curü numaxã namuü̃exẽxẽ!

¹⁶ Pa Corix ¡naxãneexẽxẽ i ngẽma duü̃xü̃gü nax ngẽmaãcü cuxca̱x nadaugüxü̃ca̱x!

¹⁷ ¡Rü ẽcü naxãneexẽxẽ nax ngẽmaãcü guxü̃gutáma naxãneexü̃ca̱x rü nayuexü̃ca̱x!

¹⁸ Rü ngẽmaãcü tá nüxü̃ nacua̱xgü nax cuxicatama yixĩxü̃ i Cori ya Tupana quixĩxü̃, rü cuxicatama yixĩxü̃ i Guxãétüwa Cungexmaxü̃ i ñoma i naanewa.