Wiyaegü 68 - Tupanaarü Ore

Tupana rü Iraétanüxü̃arü uanügüxü̃ narüporamae

¹ Pa Tupanax ¡paxa nua naxũ rü ínawoxü̃ i ngẽma cumaxã rüxuanüã̱xgüxü̃! Rü ngẽmaãcü i ngẽma cuxchi aiexü̃ rü tá cuxcha̱xwa nibuxmü.

² Rü ngẽma chixexü̃ ügüxü̃ rü name i inarütauxe ñoma caixanexü̃ i buanecücha̱xwa rütaxuxü̃rüxü̃. Rü name i Tupanape̱xewa inarüxo ñoma wera üxüwa idexexü̃rüxü̃.

³ Natürü ngẽma mexü̃ ügüxü̃ rü tá nataãẽgü. Rü Tupanape̱xewa rü name nax poraãcü nataãẽgüxü̃.

⁴ Pa Duü̃xü̃güx ¡Tupanaca̱x pewiyaegü rü perü wiyaewa penataxẽxẽ! ¡Rü nüxü̃ picua̱xüü̃gü ya yimá caixanexü̃étügu ixũcü! ¡Rü namaxã petaãẽgü ya yimá Cori, rü nape̱xewa petaãẽgü!

⁵ Rü yimá Tupana ya napata ya üünenewa ngẽxmacü rü ngẽma tacutagümaxã inacua̱x rü ngẽma yutegüxü̃arü poxü̃ruxü̃ nixĩ.

⁶ Rü ngẽma duü̃xü̃gü i nüxü̃́ nataxuxü̃ i natanüxü̃ rü nüma ya Tupana rü nüxü̃́ nanangexmaxẽxẽ ya nachiü̃. Rü nüma rü ínananguxü̃xẽxẽ i ngẽma poxcuexü̃ nax mexü̃wa nangẽxmagüxü̃ca̱x. Natürü ngẽma tama ixĩnüechaxü̃xü̃ rü naane i taxuxü̃ma nawa rüxüxü̃wa tá nanamaxẽxẽxẽ.

⁷ Pa Tupanax, rü yexguma Equítuanewa ícunanguxü̃xẽẽgu ga curü duü̃xü̃gü rü chianexü̃gu cuyagagü.

⁸ Rü yexguma Tupana guma ma̱xpǘne ga Chinaíwa nguxgu, rü naxĩã̱xãchiane ga naane. Rü yima caixanexü̃gü rü inanaba ga dexá. Rü guma ma̱xpǘne rü naxĩã̱xãchi nape̱xewa ya Iraétanüxü̃arü Tupana.

⁹ Rü cuma rü cunapuechaxẽxẽ nax yemaacü cuyawaimüanexẽẽxü̃ca̱x ga yema curü naane ga ipaxü̃ nax nawa naxügüxü̃ca̱x ga nanetügü.

¹⁰ Rü yema curü duü̃xü̃gü rü yexma naxãchiü̃gü. Rü cumax, Pa Tupanax, rü namaxã cumecüma, rü yemaca̱x nüxna cunaxã ga norü õna ga yema nüxü̃́ taxuxü̃.

¹¹ Rü ngẽxguma Tupana idexagu rü muxü̃ma i orearü ngẽruxü̃gü nanaxunagü i norü ore rü ñanagürügü:

¹² —Yema uanügüarü ãẽ̱xgacügü rü norü churaragümaxã nibuxmü. Rü yema ngexü̃gü ga ĩpatawachigü yexmagüxü̃ rü nügümaxã nayatoye ga yema norü uanügüarü yemaxü̃gü ga nüxna yéma yabuxmüxü̃.

¹³ Rü ñoma muxtucu i naxã̱xmümaxã idüxüxü̃rüxü̃ nixĩ i ngẽma ngexü̃gü nax diẽrumümaxã rü úirumaxã yadügüxü̃. Rü cuma rü carnérutanügu cupe —ñanagürügü.

¹⁴ Rü yexguma Tupana ya Guxãétüwa Ngẽxmacü yabuxmüxẽẽgu ga tórü uanügü rü guma ma̱xpǘne ya Charmóü̃chitaeruwa rü ñoma gáuxü̃pütagürüxü̃ yéma narüyi.

¹⁵ Rü namáxchanexüchi ya yima ma̱xpǘne ya Bacháü̃. Rü nachitaerugü rü nadauxü̃guxüchi.

¹⁶ Rü pemax, Pa Ma̱xpǘnegü ya Máchanexü̃chigüne ¿rü tü̱xcüü̃ auxãchiãcü nüxü̃ perüdaunü ya yima ma̱xpǘne ya Chióü̃ ya Tupana nagu ãchiü̃chaü̃ne rü guxü̃gutáma ngéma nangẽxma?

¹⁷ Rü nüma ya Tupana rü guxü̃nema ya naweü̃maxã Chinaíarü ma̱xpǘnewa ínaxũxũ nax napata ya Chióü̃wa ngẽxmanewa naxũxü̃ca̱x.

¹⁸ Pa Tupanax, yexguma Chióü̃ ya ma̱xpǘnegu cuxĩnagügu rü cugüwe cuyagagü i ngẽma ícuyauxü̃xü̃ i curü uanügü. Rü duü̃xü̃gütanüwa cunayaxu i ãmaregü. Rü woo i ngẽma tama cuga ĩnüechaü̃xü̃ rü natanüwa cunayaxu i ãmaregü nax ngéma Chióü̃wa cuxãpataxü̃ca̱x.

¹⁹ Rü name nixĩ nax nüxü̃ picua̱xüü̃güxü̃ ya Cori ya tórü Tupana ya tórü maxẽxẽẽruxü̃ ixĩcü. Rü nüma rü guxü̃ i ngunexü̃gügu tórü guxchaxü̃wa tüxü̃ narüngü̃xẽxẽ.

²⁰ Rü nüma ya tórü Tupana rü tórü maxẽxẽẽruxü̃ nixĩ. Rü nüxü̃́ natauxcha nax yuwa tüxü̃ ínanguxü̃xẽẽxü̃.

²¹ Rü nüma ya Tupana rü tá napúmüerugü rü tá nanapi̱x i nayaecha̱xmü i ngẽma norü uanügü i tama nüxü̃ rüxoechaü̃xü̃ i norü pecadugü.

²² Rü nüma ya Tupana rü ñanagürü: —Pa Iraétanüxü̃x, choma rü tá Bacháü̃anewa ne chanagagü i perü uanügü, rü mártamawa tá ne chanagagü i ngẽma perü uanügü.

²³ Rü choma rü tá pegü piwaiecutüxẽxẽ nagümaxã i perü uanügü. Rü perü airugü rü tá yimá nagüwa naxaxegü —ñanagürü.

²⁴ Pa Tupanax, Pa Chorü Tupanax, Pa Chorü Ãẽ̱xgacüx, rü cupataã̱xtüwa nüxü̃ tadau i ngẽma curü duü̃xü̃gü i ngéma chocuchimüxü̃.

²⁵ Rü ngẽma wiyaegüxü̃ rü nape̱xegu naxãgü, rü ngẽma paxetagüxü̃ rü wixweama naxãgü, rü ngẽma paxü̃gü i paü̃déru pagüxü̃ rü ngãxü̃tanügu naxãgü.

²⁶ Rü guxãma i pema i ngẽxma chocuxe ¡rü nüxü̃ picua̱xüü̃gü ya Cori ya Tupana! Rü guxãma i pema i Iraétanüxü̃ ¡rü nüxü̃ picua̱xüü̃gü!

²⁷ Rü Bẽyamíü̃chimüxü̃ rü nape̱xewaama naxü, rü ngẽmaweama naxü i Yudáchimüxü̃ norü ãẽ̱xgacügümaxã. Rü ngẽmaweama naxügü i Chaburóü̃chimüxü̃ norü ãẽ̱xgacügümaxã, rü Netaríchimüxü̃ norü ãẽ̱xgacügümaxã.

²⁸ Pa Chorü Tupanax ¡inawe̱x i curü pora! ¡Rü wenaxarü toxca̱x naxü ga yema taxü̃ ga mexü̃gü ga nũxcüma curü poramaxã cuxüxü̃!

²⁹ Rü yima cupata ya ma̱xpǘnewa ngẽxmane i Yerucharéü̃wa rü ngẽma togü i nachixü̃anegüarü ãẽ̱xgacügü rü cuxca̱x ngéma nanana i ãmaregü.

³⁰ Pa Tupanax, ¡napoxcu i ngẽma Equítuanearü ãẽ̱xgacü i cumaxã rüxuanüxü̃ i ñoma wocagü i iyatüxü̃ i düraexü̃ i dexnenecüwa maxẽxü̃rüxü̃ ixĩgüxü̃! Rü Equítuanepe̱xewa rü ngẽma togü i nachixü̃anegü rü ñoma wocaxacügürüxü̃ naturae. ¡Naxãneexẽxẽ i ngẽma Equítuane nax cupatawa nanaãxü̃ca̱x i diẽrumena̱xãgü! ¡Rü nawoone i ngẽma nachixü̃anegü i daigu rüxĩnüexü̃!

³¹ Rü ngẽma Equítuanearü ãẽ̱xgacü rü tá cuxü̃tawa nanamu i norü ngü̃xẽẽruü̃gü. Rü ngẽma Etiopíaanecüã̱xgü rü tá cuxü̃tawa nanana i norü ãmaregü.

³² Pa Ñoma i Naanewa Ngẽxmagüxü̃ i Nachixü̃anegüarü Ãẽ̱xgacügüx ¡rü nüxü̃ picua̱xüxü̃gü ya Tupana! ¡Rü naxca̱x pewiyaegü ya Cori!

³³ Rü nüma ya Cori, rü ngẽma daxũguxü̃ i naane i nũxcümacürüwa ngẽxmaxü̃gu nixũ. Rü naga rü ñoma duruanexü̃rüxü̃ nataga.

³⁴ ¡Rü ngẽmawa nüxü̃ pecua̱x nax ñuxãcü naporaxüchixü̃ ya Tupana! Rü nüma rü guxü̃ma i Iraétanüxü̃maxã inacua̱x. Rü norü pora rü ya̱u̱xtüweanexü̃arü yexerawa nangu.

³⁵ Pa Tupanax, cupata ya üünenewa rü cuporaxüchi. Rü cuma nax Iraétanüxü̃arü Tupana quixĩxü̃ rü cunaporaexẽxẽ i curü duü̃xü̃gü. Rü cuma, Pa Tupanax rü cumecümaxü̃chi.