Wiyaegü 67 - Tupanaarü Ore

Name nixĩ i guxü̃ma i nachixü̃anegü rü Tupanaxü̃ nicua̱xüü̃gü

^1-2 Pa Tupanax ¡cuxü̃́ tangechaxü̃tümüxü̃gü rü toxü̃ rüngü̃xẽxẽ! ¡Rü taãẽãcü toxü̃ nadawenü nax ngẽmaãcü guxü̃ i nachixü̃anecüã̱xgü cuxü̃ cua̱xgüxü̃ca̱x, nax curü ngúchaü̃ yixĩxü̃ nax cunamaxẽxẽxẽxü̃ i duü̃xü̃gü!

³ Pa Tupanax, rü name nixĩ nax guxü̃ma i duü̃xü̃gü i guxü̃ i nachixü̃anegüwa ngẽxmagüxü̃ cuxü̃ nicua̱xüü̃gü.

⁴ Rü guxü̃ma i ngẽma nachixü̃anegü rü name nixĩ nax taãẽãcü cuxü̃ yacua̱xüü̃güxü̃ erü cuma rü norü ãẽ̱xgacü quixĩ rü mea namaxã icucua̱x.

⁵ Pa Tupanax, name nixĩ nax guxü̃ma i duü̃xü̃gü i guxü̃ma i nachixü̃anecüã̱x cuxü̃ yacua̱xüü̃güxü̃.

⁶ Rü ngẽma waixü̃müwa tá mea nayae i tonetügü rü tá namu i norü o. Erü tórü Tupana rü tá tüxü̃ narüngü̃xẽxẽ.

⁷ ¡Rü aixcüma nixĩ nax nüma ya Tupana rü tá tüxü̃ nangü̃xẽxẽxü̃! Rü guxü̃ma i duü̃xü̃gü i guxü̃ i naanewa ngẽxmagüxü̃ rü name nixĩ nax nüxü̃ namuü̃exü̃ rü naga naxĩnüexü̃.