Wiyaegü 60 - Tupanaarü Ore

Yumüxẽ i nawa Tupanaarü ngü̃xẽxẽca̱x íca̱xaxü̃

¹ Pa Tupanax, cuma rü curü numaxã toxna quixũgachi rü toxü̃ cuwoone. Rü tanaxwa̱xe i wenaxarü toxca̱x cutaegu nax noxrirüxü̃ taporaexü̃ca̱x.

² Cuma rü cunaxĩã̱xãchixẽxẽ ga ñaa naane rü yemaca̱x inangǘxcuane. ¡Rü ẽcü nügüna naxĩxẽxẽ i ngẽma norü ngǘcuane nax tama nabuxü̃ca̱x!

³ Rü cuma rü taxü̃ i guxchaxü̃gü toxca̱x ícunguxẽxẽ. Rü ñoma wüxi ya bínu ya toxü̃ ãũãẽxẽẽcürüxü̃ toxü̃ quixĩgüxẽxẽ namaxã i ngẽma guxchaxü̃gü.

⁴ Rü ñu̱xma i toma nax cuga taxĩnüexü̃ ¡rü toxca̱x inaxü i wüxi i cua̱xruxü̃ nax ngẽmawa nüxü̃ tacuáxü̃ca̱x nax aixcüma tá toxü̃ ícupoxü̃xü̃ nüxna i torü uanügüarü naxnegü!

⁵ ¡Rü toxü̃ nangãxü̃, rü curü poramaxã toxü̃ ínanguxü̃xẽxẽ i toma nax curü duü̃xü̃gü i toxü̃ cungechaü̃güxe tixĩgüxü̃!

⁶ Rü cumax, Pa Tupanax, rü cupatawa quidexa rü ñacurügü: —Ngẽma naane i Chiquéü̃wa ngẽxmaxü̃ rü tá ichayanu nüxü̃ i chorü duü̃xü̃gü. Rü ngẽxgumarüxü̃ tá ta ichayanu i ngẽma naane i metachinüxü̃ i Chucóxwa ngẽxmaxü̃.

⁷ Rü Garaáxarü naane rü Manachéarü naane rü choxrü nixĩ. Rü Efraíü̃ rü chopate̱xe i chaueruarü poxü̃ruxü̃ nixĩ rü Yudá rü chorü poraarü cua̱xruxü̃ nixĩ.

⁸ Rü ngẽma Moáane rü chorü yauxme̱xü̃páü̃ nixĩ. Rü Edóü̃aneétügu tá chanaña i chorü chapatu. Rü ngẽma naanegümaxã tá ichacua̱x. Rü ngẽma Firitéugüarü naane, rü tagaãcü tá nüxü̃ chixu nax nüxü̃ charüporamaexü̃ —ñanagürü ya Tupana.

^9-10 Pa Tupanax ¿Texé tá yima ĩane ya ípoxegunewa choxü̃ taga? ¿Rü texé tá choxü̃ tanawe̱x i ngẽma nama i Edóü̃wa nadaxü̃? ¿Ẽ̱xna tama cuma, Pa Tupanax, i toxü̃ cuxoxü̃? Cuma rü ñu̱xma marü tama torü churaragüxü̃ íquixümücü.

¹¹ ¡Rü torü uanügücha̱xwa toxü̃ rüngü̃xẽxẽ nax nüxü̃ tarüporamaegüxü̃ca̱x! Erü taxuwama toxü̃́ name i toxrüxü̃ i duü̃xü̃güarü ngü̃xẽxẽ.

¹² Pa Tupanax, ¡toxü̃ rüngü̃xẽxẽ! Rü curü ngü̃xẽẽmaxã tá nüxü̃ tarüporamae i ngẽma torü uanügü, erü cuma rü tá cuyayitanüxẽxẽ.