Wiyaegü 6 - Tupanaarü Ore

Ngẽxguma ngúxü̃ chingexgu rü chorü yumüxẽwa Cori ya Tupanaarü ngü̃xẽxẽca̱x íchaca

¹ Pa Corix ¡taxṹ i choxü̃ cuxüáxü̃ ega cunuxgu! Rü ega cunuxgu rü ¡taxṹ i choxü̃ cupoxcuxü̃!

² Pa Corix, ¡cuxü̃́ changechaü̃tümüxü̃ erü choma rü chatura! ¡Pa Corix, cha̱u̱xca̱x yataanexẽxẽ! Erü poraãcü chida̱xawe rü guxü̃ma i chauxune rü nidu̱xru.

³ Rü ñu̱xma rü poraãcü chamuü̃. Rü cumax, Pa Cori Pa Tupanax ¿rü ñuxguratáta i choxü̃ curüngü̃xẽxẽxü̃?

⁴ Pa Corix ¡nua naxũ rü cha̱u̱xca̱x yataanexẽxẽ! ¡Rü cuxü̃́ changechaü̃tümüxü̃gagu choxü̃ ínapoxü̃!

⁵ Erü yíxema yuxe rü marü taxucürüwa cuxna tacua̱xãchi. ¿Rü texé tá cuxü̃ ticua̱xüxüxü̃ ega tümamaxü̃wa tangexmagu?

⁶ Rü marü chipa nax charüdoxüxü̃. Rü guxü̃ i chütaxü̃gu rü poraãcü chaxaxu, rü ngẽmaca̱x düxwa chauxgüxü̃etümaxã niwai i chorü cüxeruxü̃.

⁷ Rü ngẽma ngúxü̃ nax chingexü̃gagu rü daa chauxetügü rü marü nixogü. Rü ngẽma chorü uanügügagu rü chaxoegaãxẽ rü chixogüxetü.

⁸ ¡Rü choxna pixĩgachix, Pa Chixexü̃arü Üruxü̃güx! Erü nüma ya Cori ya Tupana rü marü nüxü̃ naxĩnü i chorü axu.

⁹ Rü nüma ya Cori ya Tupana rü marü nüxü̃ naxĩnü nax nüxna chaca̱xaxü̃, rü marü choxü̃́ nanayaxu i chorü yumüxẽ.

¹⁰ Rü guxü̃ma i ngẽma chorü uanügü rü tá naba̱i̱xãchie rü namuü̃e. Rü cugüruxü̃ tá nixĩgü. Rü ngürüãchi norü ãnemaxã tá nibuxmü.