Wiyaegü 59 - Tupanaarü Ore

Nüma ya Cori ya Tupana nixĩ ya tórü poxü̃ruxü̃ ixĩcü

¹ Pa Chorü Tupanax ¡choxü̃ ínanguxuchixẽxẽ naxme̱xwa i ngẽma chomaxã rüxuanüã̱xgüxü̃! ¡Choxü̃ ínapoxü̃ nüxna i ngẽma choxü̃ ima̱xgüchaü̃xü̃!

² ¡Nüxna choxü̃ ínanguxuchixẽxẽ i ngẽma chixexü̃ ügüxü̃! ¡Rü choxü̃ ínapoxü̃ nüxna i ngẽma máetagüxü̃!

³ Erü nangẽxma i yatügü i máxwa̱xegüxü̃ i naxca̱x daugüxü̃ nax ñuxãcü tá choxü̃ yama̱xgüxü̃. Ngẽma duü̃xü̃gü i tama ngechaxü̃wa̱xegüxü̃ rü nagu narüxĩnüe nax ñuxãcü tá choxü̃ yama̱xgüxü̃ woo taxuxü̃ma i chixexü̃ chaxü̱xgu rü bai i ta̱xacürü pecadu chaxü̱xgu.

⁴ Pa Cori Pa Tupanax, ngẽma chorü uanügü rü ínamemaregü nax cha̱u̱xca̱x íyaxüãchixü̃ woo taxuxü̃ma i chixexü̃ chaxü̱xgu. ¡Rü paxa nua naxũ, rü choxü̃ yarüngü̃xẽxẽ! ¡Nüxü̃ nadau i ngẽma chomaxã üpetüxü̃!

⁵ Pa Cori ya Guxãétüwa Ngẽxmacü ya Iraétanüxü̃arü Tupana Ixĩcüx, ¡írüda rü paxa napoxcue i guxü̃ma i ngẽma togü i nachixü̃anecüã̱x! ¡Rü taxṹ i cuxü̃́ nangechaü̃tümüxü̃güxü̃ i ngẽma chixexü̃ ügüxü̃ rü taechitawa̱xegüxü̃!

⁶ Nümagü rü chütacü nanaxĩane rü ĩanemaxü̃güwa naxãũgatanü ñoma airugü i nügü da̱i̱xü̃rüxü̃.

⁷ Rü chixexü̃ i dexamaxã nanacaetanüane rü naguxchigagü rü ñanagürügü: —Nüetama ega texé tüxü̃ ĩnügu —ñanagürügü.

⁸ Natürü i cumax, Pa Corix, rü nagu quidauxcüraxü̃ rü nüxü̃ cucugü i guxü̃ma i ngẽma togü i nachixü̃anecüã̱xgü.

⁹ Cumax, Pa Chorü Tupanax, rü chorü poraxẽẽruxü̃ quixĩxü̃, rü cuxü̃ nixĩ íchanangu̱xẽẽxü̃ nax choxna cudauxü̃, erü cumax, Pa Tupanax, nixĩ i chorü poxü̃ruxü̃ quixĩxü̃.

¹⁰ Rü cuma nixĩ i chorü Tupana ya choxü̃ ngechaü̃cü. Rü chope̱xegu tá quixũ nax choxü̃ nüxü̃ cudauxẽxẽxü̃ca̱x i ngẽxguma nüxü̃ choxü̃ curüporamaexẽxẽgu i ngẽma chomaxã rüxuanügüxü̃.

¹¹ ¡Natürü taxṹ i cunada̱i̱xü̃! ¡Rü curü poramaxã namaxã nawoone rü naxãneexẽxẽ nax ngẽmaãcü i chautanüxü̃ tama paxa nüxü̃ iyanangümaexü̃ca̱x i ngẽma cuxüxü̃! Erü cumax, Pa Corix, rü torü poxü̃ruxü̃ quixĩ.

¹² Rü ngẽma duü̃xü̃gü i chixexü̃gu maxẽxü̃ rü norü ore i chixexü̃gagu, rü naberaarü dexagügagu, rü ngẽma nügü nax yacua̱xüü̃gügagu ¡rü napoxcue! ¡Rü norü ore i chixexü̃gagu rü norü doragügagu napoxcue!

¹³ ¡Rü curü numaxã yanaxoxẽxẽ i ngẽma duü̃xü̃gü! ¡Rü noxtacüma nayuexẽxẽ nax ngẽmaãcü guxü̃ma i duü̃xü̃gü nüxü̃ nacua̱xgüxü̃ca̱x nax cuma rü Iraétanüxü̃maxã icucuáxü̃ rü guxü̃ i ñoma i naanemaxã icucuáxü̃!

^14-15 Rü ngẽma duü̃xü̃gü i chixexü̃ rü ngẽxguma chütacü ñoma airugürüxü̃ naxãũgatanü rü ĩanegu ínayachoegu nax nawemüca̱x nadaugüxü̃ca̱x. Rü naxauxe ega tama nüxü̃́ yanguxgu i nawemüxü̃ i inayangaugü.

¹⁶ Natürü i chomax rü pa̱xmama tá cuxca̱x chawiyae. Rü ngẽma chorü wiyaewa rü tá nüxü̃ chixu nax cuporaxü̃ rü cuxü̃́ tangechaü̃tümüxü̃güxü̃. Erü cuma rü chorü dauruxü̃ quixĩ rü cuxü̃tagu nixĩ i chaugü charücúxü̃ i ngẽxguma ãũcümaxü̃wa changexmagu.

¹⁷ Rü ngẽmaãcü tá cuxca̱x chawiyae, Pa Tupanax, erü cuma nixĩ i chorü poraxẽẽruxü̃ quixĩxü̃, rü cuma nixĩ i choxna cudauxü̃. Rü cuma nixĩ i chorü Tupana i choxü̃ cungechaxü̃xü̃.