Wiyaegü 57 - Tupanaarü Ore

Yumüxẽ i nawa Tupanaarü ngü̃xẽxẽca̱x íca̱xaxü̃

¹ ¡Cuxü̃́ changechaü̃tümüxü̃, Pa Chorü Tupanax, cuxü̃́ changechaü̃tümüxü̃! Erü cuxca̱x chiña nax choxü̃ ícupoxü̃xü̃ca̱x. Rü cuxpe̱xatütüü̃gu chaugü chicúxchaü̃ ñu̱xmatáta nangupetü i ngẽma ãũcümaxü̃.

² Rü ñu̱xma rü tá nüxna chaca ya yimá Tupana ya Guxãétüwa Ngẽxmacü, erü nüma nixĩ i choxü̃ ínapoxü̃ rü choxü̃ nangü̃xẽẽxü̃.

³ Rü nüma rü dauxü̃wa cha̱u̱xca̱x ne nanamu i norü ngü̃xẽxẽ nax naxme̱xwa choxü̃ ínanguxuchixẽẽxü̃ca̱x i ngẽma nuãcüma chowe ingẽxü̃tanüxü̃. Erü nüma rü nixaixcüma rü poraãcü choxü̃ nangechaü̃.

⁴ Rü choma rü natanüwa changexma i uanügü i ñoma leóü̃rüxü̃ idüraexü̃. Rü napüta rü ñoma naxnegü i ãmaguxnerüxü̃ nixĩ rü norü conü rü ñoma tara i meama waixmaguxü̃rüxü̃ nixĩ.

⁵ Natürü cuma, Pa Chorü Tupanax, rü daxũguxü̃ i naanemaxã icucua̱x rü curü üüne rü ñoma i naane namaxã nanapá.

⁶ Ngẽma chomaxã rüxuanüã̱xgüxü̃ rü cha̱u̱xca̱x nanaxügü i wüxi i yauxruxü̃ nax ngẽmagu changuxü̃ca̱x. Rü chomaxü̃wa nanaxügü i ãxmaxü̃, natürü nümatama nagu nayi.

⁷ Pa Chorü Tupanax, choma rü aixcüma cuxü̃́ chayaxõ rü nüxü̃ chacua̱x nax cuma rü aixcüma tá choxü̃ ícupoxü̃xü̃. Rü ñu̱xma rü íchame nax chorü wiyaemaxã cuxü̃ chicua̱xüxü̃xü̃.

⁸ Rü pa̱xmama tá ícharüda naxca̱x i chorü paxetaruü̃gü i árpa rü árpaxacü. Rü ngẽmaãcü tá íchanabaixgü i ngẽma ngexwacaxü̃xü̃ i ngunexü̃.

⁹ Pa Cori Pa Tupanax, chautanüxü̃pe̱xewa tá cuxü̃ chicua̱xüxü̃. Rü chorü wiyaegümaxã tá cuxü̃ chicua̱xüxü̃ natanüwa i ngẽma togü i nachixü̃anecüã̱x i duü̃xü̃gü.

¹⁰ Erü ngẽma curü ngechaü̃ rü daxũguxü̃ i naanewa nangu. Rü ngẽxgumarüxü̃ ta i curü ore rü aixcüma nixĩ rü ya̱u̱xtüweanexü̃wa nangu.

¹¹ Pa Chorü Tupanax, cuma rü daxũguxü̃ i naanemaxã icucua̱x rü curü üüne rü ñoma i naane namaxã nanapá.