Wiyaegü 5 - Tupanaarü Ore

Noxri yangṍõnegu Tupanamaxã chidexa

^1-2 Pa Corix, Pa Chorü Ãẽ̱xgacüx, Pa Chorü Tupanax ¡choxü̃́ nüxü̃ naxĩnü i ñaa chorü dexa i cumaxã nüxü̃ chixuxü̃! ¡Rü choxü̃́ nayaxu i ñaa chorü yumüxẽ i auxãcüma cumaxã nüxü̃ chixuxü̃! ¡Rü nüxü̃ naxĩnü i ngẽma cuxna naxca̱x chaca̱xaxü̃! Erü cumaxã nixĩ i chidexaxü̃ i chorü yumüxẽwa.

³ Rü ẽxü̃wa noxri yangóonegu rü tá nüxü̃ cuxĩnü i chorü yumüxẽ. Rü pa̱xmama tá cumaxã nüxü̃ chixu i ngẽma cuxna naxca̱x chaca̱xaxü̃. Rü íchanangu̱xẽxẽ nax choxü̃ cungãxü̃xü̃.

⁴ Rü cumax, Pa Tupanax, rü tama namaxã cutaãxẽ i ta̱xacürü chixexü̃. Rü ngẽma duü̃xü̃gü i chixexü̃gu maxẽxü̃ rü taxucürüwama cuxü̃tawa nangẽxmagü.

⁵ Rü cupe̱xewa rü nangechica i ngẽma nügü icua̱xüü̃güxü̃. Rü cuma rü naxchi cuxai i ngẽma chixexü̃ ügüxü̃.

⁶ Rü ngẽma idorata̱a̱xgüxü̃ rü icuyanaxoxẽxẽ. Rü cuma rü nüxü̃ cuxo i ngẽma womüxẽẽwa̱xegüxü̃ rü máetagüxü̃.

⁷ Natürü i chomax rü ngẽma curü ngechaü̃gagu choxü̃́ natauxcha nax yima cupatagu chaxücuxü̃. Rü ngẽxguma cupata ya üünenewa changexmagu rü choxü̃́ natauxcha nax cupe̱xegu chanangü̃cuchixü̃ rü cuxü̃ changechaü̃ãcüma cuxü̃ chicua̱xüü̃xü̃.

⁸ Pa Corix ¡choxna nadau naxcha̱xwa i ngẽma chorü uanügü! ¡Rü curü namawaama choxü̃ naxũxẽxẽ!

⁹ Erü ngẽma chorü uanügü rü taguma ñuxgu aixcümaxü̃ nixugü. Rü chixexü̃guxicatama narüxĩnüe. Rü ngẽma naã̱x rü ñoma wüxi i yuetamaxü̃ i ngenaxü̃rüxü̃ nixĩ. Rü yimá norü conü rü nidorata̱a̱x.

¹⁰ Rü ngẽmaca̱x, Pa Tupanax, ¡napoxcue i ngẽma duü̃xü̃gü! ¡Rü ngẽma chixexü̃ i nümatama nagu naxĩnüexü̃gu nayixẽxẽ! ¡Rü norü muxü̃ i máetaxü̃gagu nüxü̃ naxo, erü cumaxã nixĩ i nanuexü̃!

¹¹ Natürü name nixĩ nax tataãẽgüxü̃ ya guxãma ya yíxema ya curü ngü̃xẽẽca̱x daugüxe. Rü guxü̃gutáma taãẽãcüma tawiyaegü, erü cuma nixĩ i tüxü̃ ícupoxü̃xü̃. Rü guxãma ya yíxema cuxü̃ ngechaü̃güxe rü tá cugagu tataãẽgü.

¹² Erü cuma rü mexü̃ tümamaxã cuxuegu ya yíxema aixcüma cuga ĩnüxe. Rü ngẽma curü ngechaü̃ rü tümaarü poxü̃ruxü̃ nixĩ.