Wiyaegü 49 - Tupanaarü Ore

Tórü maxü̃ rü tama diẽrumaxã naxca̱x tataxe

¹ ¡Dücax, Pa Guxü̃ma i Duü̃xü̃gü i Ñoma i Naanewa Maxẽxü̃x, rü mea iperüxĩnüe i ñaa ore!

² Rü guxãma i pema i diẽruã̱xgüxe, rü pema ya ingearü diẽruã̱xgüxe, rü pema i duü̃xü̃gümaxã icua̱xgüxe, rü pema i togüme̱xẽwa ngẽxmagüxe ¡rü mea iperüxĩnüe i ñaa ore!

³ Rü ñu̱xmax rü tá chidexa namaxã i ore i cua̱x tüxna ãxü̃. Rü choma rü chauãẽxü̃ chacuáãcüma tá nüxü̃ chixu i ngẽma nagu charüxĩnüxü̃.

⁴ Rü ore i ucu̱xẽruü̃gügu tá charüxĩnü rü árpamaxã chapaxetaãcü ore i ẽxü̃guxü̃chiga tá chawiyae.

⁵ ¿Rü ta̱xacüca̱x tá chamuü̃ i ngẽxguma ínangugügu i ngunexü̃gü i ãũcümaxü̃ rü ngẽxguma ngẽma chauxchi aiexü̃ i duü̃xü̃gü choxü̃ íchomaeguãchigu namaxã i norü chixexü̃gü?

⁶ Rü nümagü rü norü diẽruguama narüxĩnüe rü muxü̃ i norü ngẽmaxü̃gümaxã nügü nicua̱xüü̃gü.

⁷ Natürü taxúema tüxü̃́ nangẽxma i pora nax tügütama tamaxẽẽxü̃ca̱x. Rü tama diẽrumaxã Tupanaxü̃tawa naxca̱x tataxe i tümaarü maxü̃.

^8-9 Rü taxuxü̃ma i diẽru ningu nax naxca̱x itaxexü̃ca̱x i wüxi i duü̃xü̃arü maxü̃ nax ngẽmaãcü nüxna ínanguxuchixü̃ca̱x i ngẽma yu.

¹⁰ Nüxü̃ tadau nax guxü̃ma i duü̃xü̃gü yuexü̃ woo i ngẽma nüxü̃ cua̱xüchigüxü̃ rü nayue, rü woo i ngẽma naechitamare maxẽxü̃ rü nayue. Guxü̃ma nayue rü ngẽma norü ngẽmaxü̃gü rü togüca̱x ngéma nawogü.

¹¹ Rü ngẽma diẽruã̱xgüxü̃ rü nügügu nanaxüéga i norü naane ñoma guxü̃gutáma noxrü yixĩxü̃rüxü̃. Natürü ngẽxguma nayu̱xgux rü ngẽma naxma̱xü̃ tá nixĩ i napata ixĩxü̃ i guxü̃gutáma.

¹² Rü wüxi i duü̃xü̃ rü tama nixĩ i namaxechaxü̃ ega woo nadiẽruã̱xü̃chigux, erü ñoma naeü̃gürüü̃tama nayu.

¹³ Rü ngẽmaãcü nixĩ i nayuexü̃ i ngẽma duü̃xü̃gü i nügügutama yaxõgüxü̃. Rü ngẽmaãcütama nayue i ngẽma duü̃xü̃gü i nügütama icua̱xüü̃güxü̃.

¹⁴ Rü ngẽma yu nixĩ i namaxã icuáxü̃ i duü̃xü̃gü, erü naxmaxü̃wa nanagagü ñoma carnérugü i daiwa gagüxü̃rüxü̃. Rü duü̃xü̃gü rü napatagü ya imexẽchinearü yáxü̃gu rü naxmaxü̃gu tá niyixe i naxü̃negü. Natürü ngẽma ngunexü̃ i nagu yuwa ínadagüxü̃ i duü̃xü̃gü rü ngẽma mexü̃gu maxẽxü̃ rü tá ngẽma chixexü̃gu maxẽxü̃maxã inacua̱xgü.

¹⁵ Natürü nüma ya Tupana tá nixĩ i yuwa choxü̃ ínanguxuchixẽẽxü̃, rü nügüxü̃tawa tá choxü̃ naga.

¹⁶ ¡Rü taxṹ i naxca̱x quixãũxãchixü̃ ega texé muarü diẽruã̱xgu rü yamuxgu i norü meruü̃gü i napatawa!

¹⁷ Erü ngẽxguma nayu̱xgux rü taxũtáma ta̱xacü ninge. Rü woo i ngẽma norü meruü̃gü rü taxũtáma naxmaxü̃wa namaxã naxũ.

^18-19 Rü woo ñu̱xma nax maxü̃gu rü nataãxẽ, rü duü̃xü̃gü rü nüxü̃ nicua̱xüü̃gü naxca̱x i norü ngẽmaxü̃gü, natürü wüxi i ngunexü̃gu rü tá nayu rü marü tagutáma ñomaarü ngóonexü̃xü̃ nadau.

²⁰ Rü duü̃xü̃gü rü woo namuarü ngẽmaxü̃ã̱xgux, natürü tama namaxecha. Rü nayuama ñoma naeü̃gürüü̃tama.