Wiyaegü 48 - Tupanaarü Ore

Namexẽchi ya Tupanaarü ĩane ya Chióü̃

¹ Nüma ya Cori ya Tupana rü guxãétüwa nangẽxma rü name nax nüxü̃ icua̱xüü̃güxü̃ nawa ya yima norü ĩane ya norü ma̱xpǘne ya üünene ya Chióü̃wa ngẽxmane.

² Namexẽchi ya yima ma̱xpǘne ya Chióü̃ i nórtewaama ngẽxmane. Rü yima nixĩ ya namaxã nataãẽgüne i guxü̃ma i ñoma i naanecüã̱x i duü̃xü̃gü. Rü yimawa nixĩ i nangẽxmaxü̃ i norü ĩane ya yimá Ãẽ̱xgacü ya Guxãétüwa Ngẽxmacü.

³ Rü Yerucharéü̃wa ngẽxmane ya ãẽ̱xgacüpatagüwa nixĩ i nangẽxmaxü̃ ya Tupana. Rü nüma ya Tupana rü nügü nango̱xẽxẽ nax yima ĩanearü poxü̃ruxü̃ ya aixcüma poracü yixĩxü̃.

⁴ Rü ñoma i naanecüã̱x i nachixü̃anegüarü ãẽ̱xgacügü rü nügümaxã nangutaque̱xegü rü wüxigu yima ĩaneca̱x ínayachoõchi.

⁵ Natürü yexguma yima ĩanexü̃ nadaugügu rü nañu̱xãẽgü rü nibuxmü.

⁶ Rü poraãcü namuü̃e. Rü nanaxĩ̱xãchiãẽgü ñoma wüxi i nge i ixíxraxacüchaü̃cürüxü̃.

⁷ Rü nüma ya Tupana rü wüxi ya tacü ya buanecü ya éstewaama ne namuãcümaxã nagu napogü ya yima Tárchixcüã̱xarü wapurugü.

⁸ Rü yima Tupanaarü ĩane rü namexẽchi yema tórü o̱xigüwa nüxü̃ taxĩnüechigaxü̃rüxü̃. Rü ñu̱xma i yixema rü ta rü taxetümaxã nüxü̃ tadaugü i ngẽma. Rü nümatama ya Tupana ya Guxãétüwa Ngẽxmacü rü guxü̃gutáma yima ĩanexü̃ ínapoxü̃.

⁹ Pa Tupanax, nua cupatawa nüxna tacua̱xãchie nax poraãcü toxü̃ cungechaü̃xü̃ i cumax.

¹⁰ Pa Tupanax, guxü̃wama i ñoma i naanewa rü cuxü̃ nicua̱xüü̃gü, rü nüxü̃ nicua̱xüü̃gü i cuéga. Rü yima curü tügünechacüüarü poramaxã mea tomaxã icucua̱x.

¹¹ Rü cuma, Pa Tupanax, aixcüma mexü̃ tomaxã cuxuegu. Rü ngẽmaca̱x nataãẽgü i Chióü̃cüã̱xgü rü Yudáanearü ĩanegücüã̱xgü.

¹² ¡Rü ẽcü, nüxü̃ ípeyachoegu ya yima ĩane ya Chióü̃ rü peyaxugü i ngẽma norü dauxü̃taechicagü rü ñuxre yixĩxü̃!

¹³ ¡Rü mea penangugü i norü poxeguxü̃tápü̱xgü rü yima ãẽ̱xgacüpatagü nax pexü̃́ natauxchaxü̃ca̱x nax namaxã nüxü̃ pixuchigaxü̃ca̱x i petaagü!

¹⁴ Erü nüma ya Tupana rü guxü̃gutáma tórü Tupana nixĩ. Rü nüma rü guxü̃gutáma mea tamaxã inacua̱x.