Wiyaegü 45 - Tupanaarü Ore

Ãẽ̱xgacüarü ngĩchixüguarü wiyae

¹ Chauãxẽwa nangu i mexü̃ i dexagü, rü chorü conü rü ñoma wüxi i ümatüxü̃ruü̃rüxü̃ nixĩ. Rü ñaa chorü ore i chaxümatüxü̃ rü ãẽ̱xgacüpe̱xewa tá nüxü̃ chixu.

² Rü cumax, Pa Ãẽ̱xgacüx, rü guxü̃ i yatügüxü̃ curümemae. Rü ngẽma curü dexa i cua̱xwa ixũxũxü̃ rü namexẽchi. Erü ya Tupana rü guxü̃guma cuxü̃ narüngü̃xẽxẽ.

³ Pa Poracüx ¡ẽcü cugücüwawa yanga̱xcuchi i ngẽma curü tara! Rü ngẽma nixĩ i curü poraarü cua̱xruxü̃ ixĩxü̃.

⁴ Rü cumax, Pa Ãẽ̱xgacüx, rü ngẽma curü poramaxã nüxü̃ curüyexera i guxü̃ma i tórü uanügü rü ícunapoxü̃ i ngẽma ore i aixcüma ixĩxü̃. Rü yíxema duẽxẽgü i tama tügü icua̱xüü̃güxe rü cuma rü tüxü̃ ícupoxü̃. Rü yima curü tügünechacüxümaxã rü taxü̃ i mexü̃gü cuxü.

⁵ Pa Ãẽ̱xgacüx, yima cuxnegü ya meama ixãmagune rü ngẽma curü uanügüarü maxü̃newa tá nayarüwa̱xgü rü ngẽma togü i nachixü̃anecüã̱xgü rü cuxme̱xgu tá nayi.

⁶ Pa Tupanax, cuma rü guxü̃guma ãẽ̱xgacü quixĩ rü aixcüma mea guxü̃ma i duü̃xü̃gümaxã icucua̱x.

⁷ Rü cumax, Pa Ãẽ̱xgacüx, namaxã cutaãxẽ i ngẽma mexü̃ ixĩxü̃, natürü naxchi cuxai i ngẽma chixexü̃. Rü yemaca̱x nixĩ ga Tupana chixü̃ ga paacaxü̃maxã cuxü̃ nabaeruxü̃ rü cuxü̃ naxunetaxü̃ nax cumücügüarü yexera taãxẽ cuxü̃́ ngẽxmaxü̃ca̱x.

⁸ Rü guxü̃ma i cuxchirugü rü pumara i paacaxü̃ i míra rü aroé rü canelamaxã napaacaematanü. Rü paxetaruü̃gü i ãtü̱xüxü̃maxã cuxü̃ nataãẽxẽẽgü nawa ya cupata ya marfíxmaxã nga̱xãẽne.

⁹ Rü natanüwa i ngẽma paxü̃gü i cupatawa ngẽxmagüxü̃ rü nangẽxmagü i to i nachixü̃anegüarü ãẽ̱xgacügüxacügü. Rü curü tochicaxü̃arü tügünecüwawa irüto i cuxma̱x i úiru i mexẽchixü̃maxã nga̱xãẽcü.

¹⁰ ¡Rü irüxĩnü, Pa Chauxacüx, rü mea nangugü i ngẽma tá cumaxã nüxü̃ chixuxü̃! ¡Rü nüxü̃ irüngüma i ngẽma cutanüxü̃ rü ngẽma curü duü̃xü̃gü!

¹¹ Erü nüma ya yimá ãẽ̱xgacü rü nüxü̃́ cungúchaü̃. Rü nüma nixĩ i curü cori yixĩxü̃ rü name nixĩ i naga cuxĩnü.

¹² Pa Pacü i Tírucüã̱x, ngẽma duü̃xü̃gü i curü ĩanewa poraãcü diẽruã̱xü̃chigüxü̃ rü mexẽchixü̃ i ãmare tá cuxna naxãgü nax ngẽmamaxã cuxü̃ íyapuxẽẽgüxü̃ca̱x.

¹³ Rü ngẽxguma yaxücugu i ngẽma pacü i meama nga̱xãẽcü, rü ngĩxchiru rü úirumaxã nanga̱xãxẽ.

¹⁴ Rü meama nga̱xãẽxãcü ãẽ̱xgacüpe̱xewa ngĩxü̃ nagagü. Rü ngẽma ngĩmücügü i pacügü rü ngĩwe yaxãxü̃tanü.

¹⁵ Rü taãẽãcüma iyaxĩ rü taãẽãcü nagu ichocu ya yima ãẽ̱xgacüpata.

¹⁶ Rü yimá cunegü, Pa Ãẽ̱xgacüx, rü nümagü tá nixĩ i cuchicüxü ãẽ̱xgacügü yixĩgüxü̃. Rü nawa tá narütogü ga yema tochicaxü̃ ga curü o̱xigü nawa rütogüxü̃. Rü cuma rü naxme̱xwa tá cunangexmaxẽxẽ i ñaa nachixü̃ane nax nüma namaxã inacua̱xgüxü̃ca̱x.

¹⁷ Rü choma rü tá nüxü̃ nüxü̃ chacua̱xẽxẽ i cuéga nax ngẽmaãcü guxü̃ma i ngẽma ngexwaca ingóetanüxü̃ i duü̃xü̃gü rü nüxü̃ nacua̱xgüxü̃ca̱x i cuéga. Rü ñu̱xũchi guxü̃ma i nachixü̃anecüã̱xgü rü guxü̃gutáma cuxna nacua̱xãchie rü cuxü̃ natachigagü.