Wiyaegü 39 - Tupanaarü Ore

Tórü maxü̃ rü nanuxũ rü paxa nagu̱x

¹ Choma rü marü chaugümaxã ñachagürü: —Chaugüna tá chadau nax ngẽmaãcü tama chixexü̃ chaxüxü̃ca̱x i ngẽxguma chidexagu. Rü tá changea̱xmare i ngẽxguma chope̱xewa nangẽxmagügu i duü̃xü̃gü i chixexü̃gu rüxĩnüexü̃ —ñachagürü.

² Rü ñoma wüxi ga tama idexaxü̃rüxü̃ chaugü chixĩxẽxẽ. Rü taxuxü̃ma chixu rü bai ga wüxi ga dexa ga mexü̃xü̃ chixu. Natürü yexeraãcü ningúchigü i ngẽma ngúxü̃ i chingexü̃.

³ Rü poraãcü chauãẽwa nangu̱x i ngẽma choxü̃ üpetüxü̃. Rü yexguma yexeraãcü nagu charüxĩnügu rü yexeraãcü chanuãxẽ. Rü yemaca̱x düxwa tagaãcü ñachagürü:

⁴ —Pa Cori Pa Tupanax ¡choxü̃ nüxü̃ nacua̱xẽxẽ nax ngexta tá yacuáxü̃ i chorü maxü̃ rü ñuxre i ngunexü̃ tá choxü̃́ ngẽxmaxü̃! ¡Rü choxü̃ nüxü̃ nacua̱xẽxẽ nax nanuxũxü̃ i ñaa chorü maxü̃!

⁵ Erü ñaa maxü̃ i choxna cuxãxü̃ rü aixcüma nanuxũ. Rü cupe̱xewa rü chorü maxü̃ rü wüxi i paxaãchica̱x nixĩ. Rü wüxichigü i duü̃xü̃arü maxü̃ rü ñoma wüxi i ngü̃ãcüürüxü̃ nixĩ.

⁶ Rü wüxichigüarü maxü̃ rü ñoma wüxi i gáuxchipeta i ngupetüxü̃rüxü̃ nixĩ. Rü natüca̱xma nananutaque̱xe i norü ngẽmaxü̃gü, natürü tama nüxü̃ nacua̱x i texéarü tá yixĩxü̃ i nawena.

⁷ Rü ngẽmaca̱x, Pa Corix ¿rü ta̱xacürü to chi nixĩ i íchanangu̱xẽxẽxü̃? Erü cuxicatama nixĩ i íchanangu̱xẽẽxü̃.

⁸ ¡Rü choxü̃ ínanguxuchixẽxẽ nawa i chorü pecadugü! ¡Rü taxṹ i nüxü̃́ cunatauxchaxẽxẽxü̃ i ngẽma chixexü̃ i duü̃xü̃gü nax choxü̃ nacugüexü̃!

⁹ Pa Corix, cupe̱xewa rü changea̱x rü taxu ñachagürü, erü cuma nixĩ i namaxã cucuáxü̃ i chorü maxü̃.

¹⁰ ¡Rü marütama nax choxü̃ cucua̱xixü̃! Erü curü cua̱ximaxã rü tá chayu.

¹¹ Rü cuma rü cuyaxucu̱xẽ rü cuyacua̱i̱xgü i ngẽma duü̃xü̃gü i chixexü̃gu maxẽxü̃. Rü ñoma nawerüxü̃ cunaxüte̱xe i ngẽma yexeracü nüxü̃́ ngúchaü̃xü̃. Rü wüxichigüarü maxü̃ rü ñoma wüxi i ngü̃ãcüürüxü̃ nixĩ.

¹² Pa Cori Pa Tupanax ¡choxü̃́ nüxü̃ naxĩnü i chorü yumüxẽ! ¡Rü choxü̃́ nüxü̃ naxĩnü i ngẽma auãcü cuxna naxca̱x chacaxü̃! ¡Rü taxṹ i cungea̱xmarexü̃ naxca̱x i chorü axu! Erü choma rü cupe̱xewa rü wüxi i tama choxü̃ cucuáxe chixĩ. Rü yema chorü o̱xigü ga nu ne naxĩmarexü̃rüxü̃ chixĩ.

¹³ Pa Corix ¡taxṹ i numaxã choxü̃ cudawenüxü̃! ¡Rü cha̱u̱xca̱x yataanexẽxẽ nax wena chataãẽxü̃ca̱x naxü̃pa nax chayuxü̃! —ñachagürü.