Wiyaegü 36 - Tupanaarü Ore

Duü̃xü̃gü rü guxü̃wama nachixe natürü Tupana rü guxü̃guma namecüma

¹ Rü ngẽma duü̃xü̃ i tama Tupanaga ĩnüxü̃ rü ngẽma pecadu nixĩ i norü ĩnüwa nüxü̃́ nangúchaü̃xẽẽxü̃ nax chixexü̃ naxüxü̃ca̱x. Rü ngẽmaca̱x taguma nagu narüxĩnü nax Tupanaxü̃ namuü̃xü̃.

² Rü nügügu narüxĩnü nax namexü̃ i ngẽma chixexü̃ i naxüxü̃ rü ngẽmamaxã nügü nicua̱xüxü̃.

³ Rü ngẽma duü̃xü̃ i chixexü̃ rü ngẽxguma yadexagu rü taguma mexü̃ i orexü̃ nixu rü doraxü̃xicatama nixu. Rü wüxi i duü̃xü̃ i tama naãẽxü̃ cuáxü̃ nixĩ, rü taguma mexü̃ naxü.

⁴ Rü ngẽxguma norü pechicaxü̃gu nacaxgu rü ngéma nagu narüxĩnü nax chixexü̃ naxüxü̃. Rü ngẽma nax poraãcü nüxü̃́ nangúchaü̃ i ngẽma chixexü̃ i naxüxü̃ rü ngẽmaca̱x tama ínanangéxchaü̃.

⁵ Natürü i ngẽma curü ngechaü̃, Pa Cori Pa Tupanax, rü daxũguxü̃ i naanewa nangu. Rü ngẽma nax quixaixcümaxü̃ rü ya̱u̱xtüweanexü̃arü yexerawa nangu.

⁶ Rü ngẽma nax mea guxü̃maxã icucuáxü̃ rü guxü̃guma name, ñoma ma̱xpǘnegü ya taxü̃negürüxü̃. Rü ngẽma curü mugü rü guxü̃guca̱x nixĩ ñoma már i taxü̃rüxü̃. Rü cumax, Pa Cori Pa Tupanax, rü mea nüxna cudau i duü̃xü̃gü rü naeü̃gü.

⁷ Rü ngẽma curü ngechaü̃, Pa Tupanax, rü namexẽchi. Rü ngẽmaca̱x i duü̃xü̃gü rü cuxpe̱xatütüxü̃ca̱x nibuxmü nax ícupoxü̃xü̃ca̱x.

⁸ Rü cupatawa mea cunachibüexẽxẽ i duü̃xü̃gü ñu̱xmata meama nüxü̃́ yangu. Rü natü i mechiüxü̃wa cuyaxaxegüxẽxẽ.

⁹ Rü cuma nixĩ i maxü̃arü yora quixĩxü̃. Rü cuma nixĩ i toxca̱x cunangóonexẽẽxü̃.

¹⁰ Rü ngẽma curü duü̃xü̃gü i cuxü̃́ yaxõgüxü̃, rü ¡nüxü̃ nangechaü̃! Rü ngẽma duü̃xü̃gü i mexü̃gu rüxĩnüexü̃, rü mea namaxã inacua̱x!

¹¹ ¡Natürü taxṹ i cunaxüchicaxü̃ nax chauétü nachigüxü̃ i ngẽma nügü icua̱xüü̃güxü̃, rü bai i choxü̃ nax ínata̱xüchigüxü̃ i ngẽma tama cuga ĩnüexü̃!

¹² Dücax, ngẽxma nayayitanü i ngẽma chixexü̃arü üruü̃gü. Nayayitanü rü marü taxucürüwa inachigü.