Wiyaegü 3 - Tupanaarü Ore

Yumüxẽ i nawa Tupanaarü ngü̃xẽxẽca̱x íca̱xaxü̃

¹ Pa Corix, namuxũchi i chorü uanügü rü namuxũchi i ngẽma chauxchi aiexü̃.

² Rü namuxũchi i ngẽma chauchigagu ñagüxü̃: —Tupana rü taxũtáma ínanapoxü̃ —ñagüxü̃.

³ Natürü cumax, Pa Corix, rü chorü poxü̃ruxü̃ quixĩ. Rü cuma nixĩ i choxü̃ cuporaxẽẽxü̃, rü choxü̃́ cunangúchaü̃xẽẽxü̃ nax tama chamuü̃xü̃ca̱x.

⁴ Rü Cori ya Tupanaca̱x aita chaxü nax choxü̃ nangü̃xẽẽxü̃ca̱x. Rü nüma rü yima norü ma̱xpǘne ya üünenewa choxü̃ nangãxü̃.

⁵ Rü ngẽmaca̱x ichaca, rü mea chape, rü taãẽãcü chaba̱i̱xãchi, erü nüma ya Cori ya Tupana rü choxna nadau.

⁶ Rü tama naxca̱x chamuü̃ i ngẽma muxũchixü̃ i chorü uanügü i choxü̃ íchomaeguãchixü̃ nax choxü̃ yama̱xgüxü̃ca̱x.

⁷ Pa Corix, Pa Chorü Tupanax, ¡chauétüwa ínayuxu rü choxü̃ ínapoxü̃ nüxna i chorü uanügü! ¡Rü nachiwe idagü rü nabüü̃püta i ngẽma chorü uanügü i chauxchi aiexü̃!

⁸ Rü cuma nixĩ, Pa Corix, i ãũcümaxü̃wa toxü̃ ícunguxü̃xẽẽxü̃. ¡Rü mexü̃ namaxã naxuegu i curü duü̃xü̃gü!